وقۋ جىلى باستالار الدىندا وبلىس اكىمى بەيبىت اتامقۇلوۆ ايماقتىڭ جاڭا وقۋ جىلىنا دايىندىعى مەن وقۋلىقپەن قامتاماسىز ەتۋ ماسەلەسى بويىنشا جيىن وتكىزىپ, اتقارىلعان جۇمىستاردى پىسىقتادى.
اۋدان, قالا اكىمدەرى قاتىسقان جيىندا كۇن تارتىبىنە قويىلعان ماسەلە بويىنشا وبلىس اكىمىنىڭ ورىنباسارى ەرلان ايتاحانوۆ بايانداما جاسادى.
بالاباقشا سانى وبلىستا 1454-كە جەتىپ, وندا 157780 بالا تاربيەلەنۋدە. باسقا وڭىردەي ەمەس وڭتۇستىكتە بالا سانى كوپ بولعاندىقتان بالاباقشالار جەتىسە بەرمەيدى. سوندىقتان, مەملەكەتتىك مەكەمەلەردەن ءبولەك جەكەمەنشىك بالاباقشالارعا قاتتى كوڭىل بولىنگەن. سونىڭ ناتيجەسىندە مەملەكەتتىك-جەكەمەنشىك ارىپتەستىكتە 647 بالاباقشا ىسكە قوسىلدى. وسىنداي جاقسى جۇمىستاردىڭ ناتيجەسىندە 3-6 جاستاعى بالالاردى بالاباقشامەن قامتۋ 78,3 پايىزعا جەتتى.
بىلتىرعى وقۋ جىلىندا 1022 مەكتەپتە 562621 وقۋشى ءبىلىم الىپ, ۇبت-عا مەكتەپ بىتىرۋشىلەردىڭ 69,8 پايىزى قاتىسقان. وبلىستىڭ ورتا باللى وتكەن جىلدان 4,2 باللعا كوتەرىلىپ, 78,7 باللدى قۇرادى. ال, «التىن بەلگىگە» 608 تۇلەك يە بولىپ, وتكەن جىلمەن سالىستىرعاندا 172 تۇلەككە ارتقان.
– بۇل رەسپۋبليكاداعى «التىن بەلگى» يەگەرلەرىنىڭ 30 پايىزىن قۇرايدى, – دەدى ەرلان ايتاحانوۆ.
بۇدان كەيىن ءبىلىم بەرۋ ۇيىمدارىنىڭ قۇرىلىسى مەن جوندەۋ جۇمىستارى باياندالدى. ءبىلىم مەكەمەلەرىنىڭ قىسقى جىلىتۋ ماۋسىمىنا دايىندىعى جونىندە اقپار بەرگەن وبلىس اكىمىنىڭ ورىنباسارى 1479 ءبىلىم بەرەتىن مەكەمەلەردىڭ جىلۋ جۇيەلەرىنە قىسىمداۋ-سىعىمداۋ جۇمىستارى 94 پايىزعا اتقارىلعاندىعىن, قاجەتتى قاتتى وتىننىڭ 72 پايىزى, سۇيىق وتىننىڭ 80 پايىزى تاسىمالدانعاندىعىن, تابيعي گازبەن جىلىتىلاتىن 355 ءبىلىم مەكەمەلەرى گاز تاسىمالداۋشى مەكەمەلەرمەن كەلىسىمشارتتار تۇزگەندىگىن ايتىپ ءوتتى.
بيىل وڭتۇستىكتەگى 1022 مەكتەپتە 562621 وقۋشى ءبىلىم الادى. مەكتەپ وقۋشىلارىن وقۋلىقپەن قامتۋ جۇمىستارى كەزەڭ-كەزەڭىمەن اتقارىلىپ جاتىر.باسپالارمەن كەلىسىمشارت تۇزىلگەن.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.