استانا. 1 ناۋرىز. ماسكەۋدە پوليتسەيلەر بەلگىلى ساياساتكەر بوريس نەمتسوۆتى ءولتىرۋشى كيللەردىڭ سوزبەن جاسالعان پورترەتىن كۋالاردىڭ ايتۋلارى بويىنشا جاساپ شىقتى. بۇل تۋرالى «پراۆدا.رۋ» حابارلادى.
سول كۇنى تۇندە نەمتسوۆتىڭ جانىندا بولعان 23 جاسار ۋكراين قىزى, مودەل اننا دۋريتسكايا مەن كۋاگەر ۆيكتور م. تەرگەۋگە تۇسىندىرمە بەردى. وسىدان كەيىن پوليتسەيلەر وپپوزيتسيونەردى اتىپ ءولتىرۋشىنىڭ سىرتقى كەلبەتىن سۋرەتتەپ كوردى. «ولار كىسى ءولتىرۋشىنىڭ كەسكىن-كەلبەتىن سۋرەتتەپ بەردى», - دەپ حابارلايدى LifeNews.
كيللەردىڭ بويى 170-175 سانتيمەتر كەلەدى, دەنەسى ادەتتەگىدەي, شاشى قارا, قىسقارتىلىپ الىنعان. ۇستىندە كوك ءتۇستى دجينسى شالبارى مەن قوڭىر ءتۇستى سۆيتەرى بولعان.
كىسى ءولتىرۋشىنى كۋاگەر ۆيكتور م. ەستە ساقتاپ قالىپتى. ول بوريس نەمتسوۆتى قۇتقارۋعا بىردەن ۇمتىلعان. ال اننا دۋريتسكايا ەسىنەن تانىپ قالعاسىن, ويىنا ەشتەڭە ساقتاپ قالا الماعانىن ايتقان.
تەرگەۋ قازىر وسىعان وراي بوريس نەمتسوۆتى ولتىرۋشىلەردىڭ كەڭ اۋقىمدى ۆەرسيالارىن قاراستىرىپ جاتىر. رف تەرگەۋ كوميتەتىنىڭ رەسمي وكىلى ۆلاديمير ماركين قىلمىسكەرلەردى مۇنداي قادامعا بارۋعا يتەرمەلەگەن بەس ءتۇرلى بولجامنىڭ بار ەكەنىن ايتادى. تەرگەۋشىلەر بەينەباقىلاۋ كامەراسىنىڭ جازبالارىن مۇقيات زەرتتەۋ ۇستىندە.
اقپاننىڭ 27-ءسى, جۇما كۇنى تۇندە ماسكەۋدىڭ ورتالىعىندا رەسەي ساياساتكەرى بوريس نەمتسوۆ كرەملگە تاياۋ ماڭدا قىدىرىپ جۇرگەنىندە اتىپ ءولتىرىلدى. 55 جاستاعى وپپوزيتسيونەرگە اتىلعان وقتاردىڭ تورتەۋى ونىڭ دەنەسىنە تيگەن. ونىڭ جانىندا كەلە جاتقان قىز زارداپ شەكپەگەن. وقيعا تۇنگى 23:40 شاماسىندا بولعان.
قازىر وسى وقيعاعا بايلانىستى تەكسەرۋ ءجۇرىپ جاتىر.
مۇرات ايتقوجا.