استانا. 18 تامىز. «ورداباسى» فۋتبول كومانداسىنىڭ باس جاتتىقتىرۋشىسى ۆيكتور كۋمىكوۆ قىزمەتىنەن كەتتى. جاتتىقتىرۋشى مەن كلۋب باسشىلىعى ەكىجاقتى كەلىسىمنىڭ ناتيجەسىندە وسىنداي شەشىمگە كەلىپ وتىر. بۇل تۋرالى vesti.kz حابارلادى.
رەسەيلىك ماماننىڭ ورنىن ەندى بەلگىلى جاتتىقتىرۋشى باحتيار بايسەيىتوۆ باسۋى مۇمكىن.
ايتا كەتەيىك, ۆيكتور كۋمىكوۆ قازاقستانعا 2000 جىلى كەلدى. سودان بەرى ول «ەسىل», «ەلىماي», «قايسار» جانە «شاحتەر» كلۋبتارىندا قىزمەت ەتتى. ال «ورداباسىن» كۋمىكوۆ مىرزا 2014 جىلدان بەرى جاتتىقتىرىپ كەلەدى.
شىمكەنتتىڭ كومانداسى بيىلعى ماۋسىمدا پرەمەر-ليگانىڭ العاشقى اينالىمىن ءبىرىنشى التىلىقتىڭ قاتارىندا اياقتاۋدى باستى تاپسىرما رەتىندە بەكىتكەن بولاتىن. ۆيكتور كۋمىكوۆ ول سەنىمدى اقتاپ شىقتى. سوعان قاراماستان, ەكىنشى اينالىم ەندى عانا باستالعان شەشۋشى ساتتە ونىڭ قىزمەتتەن كەتۋى جانكۇيەرلەردى تاڭ قالدىرۋدا.
ۆيكتور باليۋتوۆيچ قازاقستاندىق جانكۇيەرلەردىڭ ەسىندە قاراعاندىنىڭ «شاحتەرىن» جاتتىقتىرعان كەزدەگى جارقىن جەڭىستەرىمەن قالارى ءسوزسىز. «كەنشىلەرمەن» جۇمىس ىستەگەن 2011-2014 جىلدار ارالىعىندا ول ەكى مارتە قازاقستان چەمپيونى (2011, 2012 جج.) اتاندى. ودان بولەك, 2013 جىلى قازاقستان كۋبوگىن جانە قازاقستان سۋپەركۋبوگىن يەمدەندى.
ەڭ باستى جەتىستىكتەرىنىڭ ءبىرى, ارينە, «شاحتەردى» 2013-2014 جىلعى ماۋسىمدا چەمپيوندار ليگاسى ىرىكتەۋ ءتۋرنيرىنىڭ پلەي-وفف باسەكەسىنە الىپ شىعۋى. سونداي-اق, سول جىلى كومانداسىمەن بىرگە ەۋروپا ليگاسىنىڭ توپتىق كەزەڭىندە وينادى. ودان بولەك, 2011, 2012 جانە 2013 جىلدارى قازاقستاننىڭ ەڭ ۇزدىك جاتتىقتىرۋشىسى اتانعانىن ايتا كەتەيىك.
ەلامان قوڭىر.
دەرەك: vesti.kz.
سۋرەت: armsport.am.