اقتاۋدا ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتى جانىنان تەڭىز اكادەمياسىنىڭ جاڭا وقۋ عيماراتى اشىلدى. جاڭا عيمارات Yessenov University-ءدىڭ جەكە قاراجاتى ەسەبىنەن سالىندى. قۇنى 1,430 ملرد تەڭگەنى قۇرايتىن ءۇش قاباتتى كەشەننىڭ جالپى اۋماعى 4 600 شارشى مەتردى قۇرايدى. بۇل نىسان 900 ءبىلىم الۋشىعا ارنالعان.
ترانسكاسپي حالىقارالىق كولىك باعىتىن دامىتۋعا قاجەتتى كادرلاردى دايارلاۋعا باعىتتالعان اكادەميادا تەڭىز كولىگى, لوگيستيكا, كەمە قاتىناسى جانە پورتتىق ينفراقۇرىلىم سالالارى بويىنشا ماماندار دايارلانىپ, قولدانبالى عىلىمي زەرتتەۋلەر جۇرگىزىلەدى. سونداي-اق اكادەميا حالىقارالىق دەڭگەيدەگى زاماناۋي تەڭىز سيمۋلياتورلارىمەن جابدىقتالعان. اتاپ ايتقاندا, «Kongsberg» كومپانياسىنىڭ ناۆيگاتسيالىق جانە ينجەنەرلىك ترەناجەرلەرى ورناتىلىپ, تەڭىز ماماندارىن دايارلاۋعا ارنالعان ارنايى باعدارلامالىق جۇيەلەر ەنگىزىلگەن. بۇل كەشەندەر شىنايى كەمە جۇرگىزۋ جاعدايلارىن مودەلدەۋگە مۇمكىندىك بەرەدى. اكادەميا «ستورم» كومپانياسىنىڭ ترەناجەرلارىمەن, «International Maritime Organization» (IMO) حالىقارالىق ستاندارتتارىنا سايكەس مۋلتيمەديالىق وقۋ مودۋلدەرىمەن جابدىقتالعان. جۇيە ۆاحتالىق وفيتسەرلەردى, كاپيتانداردى, مەحانيكتەردى, تەڭىز فلوتى ماماندارىن دايارلايدى.
ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي, عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, مەملەكەتتىك ورگانداردىڭ وكىلدەرى, سالا ماماندارى, پروفەسسور-وقىتۋشىلار قۇرامى, ستۋدەنتتەر مەن تەڭىز سالاسىنىڭ ارداگەرلەرى قاتىستى.
– بۇگىن ەلىمىز ءۇشىن تاريحي ءسات. مەملەكەت باسشىسى قاسىم-جومارت توقاەۆ لوگيستيكا جانە تەڭىز سالاسىن دامىتۋعا, سونداي-اق وسى باعىتتاعى كادر دايارلاۋ ماسەلەسىنە ەرەكشە ءمان بەرىپ كەلەدى. بۇگىنگى شارا – سونىڭ ناقتى كورىنىسى. بۇل – ەلىمىزدەگى تەڭىز سالاسىنا ارنالعان ماڭىزدى جوبا. ماڭعىستاۋدىڭ كولىك-لوگيستيكالىق الەۋەتى ارتىپ كەلە جاتقان كەزەڭدە مۇنداي اكادەميانىڭ ماڭىزى زور. وسى ىسكە اتسالىسقان بارشا ازاماتقا ەلدىڭ اتىنان العىس ايتامىن, – دەگەن ءوڭىر باسشىسى نۇرداۋلەت قيلىباي جاڭا نىساننىڭ ءوڭىردىڭ تەڭىز سالاسىن دامىتۋداعى ماڭىزىنا توقتالدى.
قازىر تەڭىز اكادەمياسىندا 350 ستۋدەنت ءبىلىم الادى. ماماندار دايارلاۋ باكالاۆرياتتىڭ 6, ماگيستراتۋرانىڭ 4 ءبىلىم بەرۋ باعدارلاماسى بويىنشا جۇزەگە اسىرىلادى. ولاردىڭ قاتارىندا كەمە جۇرگىزۋ, كەمە ەنەرگەتيكالىق قوندىرعىلارىن پايدالانۋ, تەڭىز تەحنيكاسى مەن تەحنولوگيالارى, سۋ كولىگىن باسقارۋ جانە كولىك لوگيستيكاسى باعىتتارى بار. جاڭا كەشەن قۇرامىندا اسكەري كافەدرا ستۋدەنتتەرىنە ارنالعان ساپتىق الاڭ, قاراۋىل قالاشىعى, زاماناۋي كەدەرگىلەر جولاعى بار. جاڭا عيماراتتىڭ اشىلۋى كۇنى 130-دان استام كۋرسانت اسكەري انت قابىلدادى.
ماڭعىستاۋ وبلىسى