ۇلىتاۋ وبلىسىنا قارايتىن جەزدى كەنتىندە توق جەلىسىنىڭ توزعانى, يەسىز قالعانى تۋرالى وبلىس اشىلعاننان بەرى ايتىلىپ كەلەدى. ەشقانداي ناتيجە جوق. اقىرى ادام ولىمىنە اپاردى. ناقتىراق ايتسام, وسى سالادا ەلەكتريك بولىپ جۇمىس ىستەگەن قۋانىش گ ۇلىمبەتوۆ قايتىس بولدى.
بۇعان دەيىن ەل باسىلىمى «ەگەمەن قازاقستان» گازەتىنە «جارىعى ءجيى سونەتىن جەزدى» اتتى ماقالام جارىققا شىقتى. وندا ۇلىتاۋ وبلىسىنا قارايتىن جەزدى كەنتىندە تۇراتىن جەرگىلىكتى تۇرعىندار جارىقتىڭ ءجيى ءسونۋى, بىرنەشە ساعاتقا دەيىن ەلەكتردىڭ بولماۋىنان ۇزاق جىل بەينەت شەگىپ كەلە جاتقانىن ايتىپ, ماسەلە كوتەرگەن ەدىك.
وسىعان جاۋاپتى ۇلىتاۋ اۋداندىق كوممۋنالدىق-شارۋاشىلىق كاسىپورنى تەك قاعاز جۇزىندە يەسى بولىپ تىركەلگەنمەن, بانكروتتىق مەكەمە دەپ تانىلعان. جەزدى كەنتىندە ەلەكتر جەلىلەرى كەڭەس كەزەڭىندە سالىنعان, بارلىعى ەسكى, سىمدارى توزعان. توزىعى جەتكەن ترانسفورماتورلار ءجيى ىستەن شىعىپ, حالىقتىڭ تۇرمىستىق تەحنيكالارى كۇيىپ كەتىپ جاتادى. وعان باس قاتىرىپ جاتقان ەشكىم جوق.
جەزدى كەنتىنىڭ اكىمى مۇراتبەك جۇمابەك اكىم بولىپ سايلانعان 2021 جىلدان بەرى وسى ماسەلەنى جاۋاپتى مەكەمەگە بارىپ, ايتىپ, باق-تا كوتەرىپ كەلەدى. بۇل شەتىن ماسەلەنى شەشىپ بەرەتىن ۇلىتاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى شابان قيمىلدايدى. جىلدىڭ باسىندا وسى باسقارمانىڭ باسشىسى الماس جانداربەكوۆتەن «ەلەكتر جارىعى ماسەلەسى قاشان شەشىلەدى؟» دەپ سۇراعاندا «جەزقازعان ەنەرگيا تاراتۋ كومپانياسىن (جرەك) سوتقا بەرىپ جاتىرمىز» دەپ قىسقا جاۋاپ بەرگەن. سودان بەرى بەس اي ءوتتى. ەلەكتر ماسەلەسى ەلەنبەي, سول كۇيى قالدى.
سوڭى قايعىلى جاعدايعا اكەلدى. جەزدى كەنتىنىڭ ەلەكتريگى گ ۇلىمبەتوۆ قۋانىش 2026 جىلدىڭ 24 ءساۋىر كۇنى جەزدى كەنتىندە جاڭادان اشىلعان دەنە شىنىقتىرۋ – ساۋىقتىرۋ كەشەنى اۋلاسىندا جارىقتاندىرۋ جەلىسىن جوندەۋ كەزىندە بيىكتەن قۇلاپ, قايتىس بولدى. ق.گ ۇلىمبەتوۆ « ۇلىتاۋ اۋداندىق كوپسالالى كوممۋنالدىق شارۋاشىلىق كاسىپورنى» كوممۋنالدىق مەملەكەتتىك كاسىپورنىندا ەلەكتريك بولىپ 2001 جىلدان بەرى جۇمىس ىستەگەن. كەنت تۇرعىندارىنىڭ ايتۋىنشا, ءوز ىسىنە جاۋاپكەرشىلىكپەن قارايتىن, سىيلى ازامات.
جەزدى كەنتىنىڭ اكىمى مۇراتبەك دوسىمبەك ۇلىنان قايعىلى وقيعانىڭ ءمان-جايىن سۇراعاندا:
«1975 جىلى تۋعان قۋانىش گ ۇلىمبەتوۆ كەنتتىڭ ەلەكتريگى بولىپ تىركەلسە دە ايلىعى ۋاقىتىلى تولەنبەي, كەنت اكىمدىگىنەن الاتىن «كۇزەتشى» ايلىعى دا اۋدارىلماي, اقشاعا ابدەن تارىققان. ءتۇرلى جۇمىستار ىستەپ, العان ازىن-اۋلاق ناپاقاسى ەشقايدا جەتپەدى. سودان, بار ءۇمىتى جەزدى كەنتىندە جاڭادان اشىلعان دەنە شىنىقتىرۋ – ساۋىقتىرۋ كەشەنىنە تۇراقتى جۇمىسقا تۇرۋ ەدى. سول كۇنى اتالعان مەكەمەنىڭ باسشىسى ن.بىرىمجانوۆقا جولىعىپ, قاجەتتى قۇجاتتار جيىنتىعىنىڭ ءتىزىمىن الىپ, كەتەرىندە العاشقى قول ۇشىمدى تيگىزەيىن دەپ, تال بۇتاعى ءتيىپ تۇرعان جارىقتاندىرۋ جەلىسىن دۇرىستاماق ويىمەن, تالعا شىققان. سول مەزەتتە جانىنداعى بولعان ادامدار وعان «شىقپاي-اق قوي, ارقانمەن تارتىپ تۇزەۋگە بولادى» دەگەن. جۇمىس دەسە جانىپ تۇراتىن گ ۇلىمبەتوۆ قۋانىش بۇل جۇمىستى وڭاي كورىپ, جىلدام جاساۋعا تىرىسقان. وكىنىشكە قاراي, تاعدىردىڭ جازمىشى سولاي بولدى. تەرگەۋ جۇمىستارى ءجۇرىپ جاتىر», دەپ جاۋاپ بەردى.
قايتىس بولعان ازامات كۇزەتشىنىڭ جالاقىسىنا ەلەكتريك بولىپ جۇمىس ىستەپ جۇرگەن ەكى ازاماتتىڭ ءبىرى ەدى. ۇلىتاۋ اۋداندىق كوممۋنالدىق-شارۋاشىلىق كاسىپورنىنان قايران بولماعان سوڭ شاراسىز كەنت اكىمى وسىنداي قادامعا بارعان. كۇزەتشىنىڭ بار بولعانى 85 مىڭ تەڭگەسى قاي جىرتىعىن جاماسىن. قوسىمشا ناپاقا تابامىن دەپ تالقانى تاۋسىلدى.
بۇل قايعىلى جاعداي ءبىزدىڭ قوعامدا كەي مەكەمەلەردىڭ وزىندە جۇمىس ىستەيتىن ادامنىڭ ومىرىنە نەمقۇرايدى قارايتىنىن كورسەتەدى. ەڭبەك ەتكەن جۇمىس ورنى ۋاقىتىلى ەڭبەك اقىسىن تولەپ كەلسە, جۇمىس ىستەۋ كەستەسىن, قاۋىپسىزدىك تەحنيكاسىن ساقتاسا, الەۋمەتتىك قولداۋ جاساپ وتىرسا, وسىنداي ورنى تولماس وقيعاعا اپارماس ەدى. كەيبىر جۇمىس بەرۋشىلەر جۇمىسشىعا جاعداي جاساي الماي وتىرىپ, وڭ ناتيجە تالاپ ەتەتىنى جاسىرىن ەمەس.
قىسقاسى ۇلىتاۋ وبلىسىنا قارايتىن جاڭاارقا, ۇلىتاۋ اۋداندارى مەن قاراجال قالاسىنىڭ ەلەكتر جۇيەسىن ۇستاپ تۇراتىن جاۋاپتى مەكەمە كەرەك.
بىلتىر 28 قاراشادا استانادا اۋىلدىق وكرۋگتەر اكىمدەرىنىڭ فورۋمى ءوتتى. وندا مەملەكەت باسشىسى قاسىم-جومارت توقاەۆ اۋىلدىق اۋماقتاردى دامىتۋ جانە اۋىل اكىمدەرى ينستيتۋتىن ودان ءارى جەتىلدىرۋ جونىندەگى مىندەتتەردى ايقىنداپ, بايانداما جاسادى. وسى اشىق فورماداعى ديالوگ-پلاتفورمادا جەزدى كەنتىنىڭ اكىمى مۇراتبەك جۇمابەك كەنتتەگى ەلەكتر جەلىلەرىن جوندەۋ, جارىقتاندىرۋ ماسەلەسى قيىن جاعدايدا ەكەنىن جەتكىزدى. وسى سالاعا قاتىستى مينيسترلىكتەگى ماماندار سىرعىتپا جاۋاپ, ۋادە بەرىپ, شىعارىپ سالدى. ودان كەيىن ءبىرتالاي ۋاقىت ءوتتى. ازىرگە جەزدىدەگى جارىق ماسەلەسىن جارىلقاپ جاتقان ەشكىم جوق. جەزدىدەگى قوسالقى ستانساعا جوندەۋ جۇمىسى جۇرگىزىلگەن جوق, ترانسفورماتورلار سىنعان, اپاتتى جاعدايدا تۇر.
سوڭى ەلەكتريك بولىپ ىستەيتىن ادام ولىمىمەن ءبىتتى. وسىدان ارتىق جاعا ۇستاتار سۇمدىق جاعداي بار ما؟
ەندى كەنتتە جارىقتاندىرۋ ماسەلەسىن شەشۋدە ەنەرگەتيكا مينيسترلىگىنىڭ جانە ەنەرگيا سالاسىنا جاۋاپتى قۇزىرلى ورىنداردان جاۋاپ كۇتەمىز.
ۇلىتاۋ وبلىسى