دوستىق ءۇيىنىڭ ىرگەتاسى قالاندى

سالتاناتتى راسىمگە وبلىستىق ءماسليحات دەپۋتاتتارى, باسقارما باسشىلارى, زيالى قاۋىم وكىلدەرى مەن كاسىپكەرلەر, ەتنومادەني بىرلەستىكتەردىڭ, اقساقالدار مەن انالار كەڭەسىنىڭ مۇشەلەرى, قوعامدىق كەلىسىم جانە دامۋ ورتالىعىنىڭ قىزمەتكەرلەرى قاتىستى. ءىس-شارادا وبلىس اكىمى مارات سۇلتانعازيەۆ پەن پارلامەنت سەناتى­نىڭ دەپۋتاتى جانبولات جورگەنباەۆ وبلىستىق ەتنومادەني بىرلەستىكتەر­دىڭ توراعالارىمەن بىرگە عيماراتتىڭ ىرگەتاسىنا ۋاقىت كاپسۋلاسىن سالدى. بۇل ماڭىزدى جوبانى جەرگىلىكتى ءىرى كاسىپكەرلەر ءوز قاراجاتى ەسەبىنەن جۇزەگە اسىرۋدى كوزدەپ وتىر.

جۇزدەن اسا ەتنوس وكىلى ءتۇتىن تۇتەتىپ وتىرعان وبلىستا 34 ەتنومادەني بىرلەستىك پەن قوعامدىق ۇيىم تىركەلىپ, ءتۇرلى الەۋمەتتىك جوبانى قولعا الىپ, ءوزارا تاتۋلىق پەن سەنىمدى ارتتىرۋعا قىزمەت ەتىپ جاتىر. سوندىقتان بۇل دوستىق ءۇيى اتالعان قۇرىلىمداردىڭ باسىن بىرىكتىرەتىن قارا شاڭىراققا اينالارى ءسوزسىز. مۇندا ولاردىڭ ناتيجەلى جۇمىس ىستەۋىنە بارلىق جاعداي جاسالىپ, جاستار باستامالارىن قولداۋعا, پىكىر الماسۋعا, مادەني جانە قوعامدىق جوبالاردى جۇزەگە اسىرۋعا مۇمكىندىك بەرەتىن زاماناۋي ورتا قالىپتاسادى.

سالتاناتتى ءىس-شارا بارىسىندا وبلىس اكىمى م.سۇلتانعازيەۆ بۇل قۇرىلىستىڭ ءوڭىر تاريحى ءۇشىن اسا ماڭىزدى وقيعا ەكەنىن اتاپ ءوتتى.

«مەملەكەت باسشىسى قاسىم-جومارت توقاەۆ بىلتىر وتكەن قازاقستان حالقى اسسامبلەياسىنىڭ ءحححىV سەسسياسىندا كوپەتنوستى الماتى وبلىسىندا دوستىق ءۇيىن سالۋ قاجەتتىگى جونىندە ناقتى تاپسىرما بەرگەن ەدى. بۇگىن سول ماڭىزدى تاپسىرمانىڭ جۇزەگە اسۋىنا كۋا بولىپ وتىرمىز. وزدەرىڭىزگە بەلگىلى, مەملەكەت تاراپىنان وبلىسىمىزدىڭ الەۋمەتتىك-ەكونوميكالىق دامۋىنا ءاردايىم ايرىقشا قولداۋ كورسەتىلىپ كەلەدى. سونىڭ ناتيجەسىندە وڭىرىمىزدە كاسىپكەرلىك پەن ءوندىرىستىڭ وركەندەۋىنە مول مۇمكىندىك اشىلدى. اتاپ ايتقاندا, 2022–2025 جىلدار ارالىعىندا الماتى وبلىسىنا 3,7 ترلن تەڭگە ينۆەستيتسيا تارتىلدى. جالپى قۇنى 930,3 ملرد تەڭگە بولاتىن 120 جوبا پايدالانۋعا بەرىلىپ, ونىڭ اياسىندا 14 مىڭ جاڭا جۇمىس ورنى قۇرىلدى. وسى مۇمكىندىكتەردى ءتيىمدى پايدالانىپ, ءوڭىر ەكونوميكاسى­نىڭ وركەندەۋىنە ەلەۋلى ۇلەس قوسقان كاسىپكەرلەرىمىز بۇگىن دوستىق ءۇيىن ءوز قاراجاتى ەسەبىنەن سالۋعا قولداۋ ءبىل­دىرۋ ارقىلى ەل الدىنداعى ازاماتتىق جاۋاپكەرشىلىكتىڭ جوعارى ۇلگىسىن كور­سەتىپ وتىر. بۇل شاڭىراق ەل بىرلىگى مەن تاتۋلىقتىڭ ورداسىنا اينالادى دەپ سەنەمىن», دەدى ايماق باسشىسى.

«اسسامبلەيا جاستارى» رەسپۋبليكالىق قوعامدىق بىرلەستىگىنىڭ الماتى وبلىسى بويىنشا توراعاسى ۆەرا پلەتنەۆا ءسانى مەن ساۋلەتى ۇيلەسە بوي كوتەرەتىن بۇل عيمارات جاڭا مۇمكىندىكتەرگە جول اشاتىنىن قۋانا جەتكىزدى.

«بۇگىن ءبارىمىز تاريحي ءساتتىڭ كۋاسى بولىپ وتىرمىز. قازىرگى تاڭدا قازاقستان 100-دەن اسا ەتنوس وكىلىن ءبىر شاڭىراق استىنا بىرىكتىرىپ, شىنايى دوستىقتىڭ جارشىسى بولىپ وتىر. «بىرلىك بار جەردە تىرلىك بار» دەپ بەكەر ايتىلماعان. ءبىزدىڭ باستى ماقساتىمىز – تاتۋلىقتى تۋ ەتىپ, ەلىمىزدىڭ دامۋىنا ۇلەس قوسۋ. ال الماتى وبلىسىندا دوستىق ءۇيىنىڭ بوي كوتەرۋى ءبىزدىڭ جۇمىسىمىزعا سەرپىن بەرىپ, جاڭا بەلەستەردى باعىندىرۋعا سەپتىگىن تيگىزە­دى. اسىرەسە اسسامبلەيا جاستارىنا ۇلكەن ءۇمىت پەن جىگەر سىيلايدى», دەگەن ول وبلىس اكىمدىگى مەن جوباعا ۇيىتقى بول­عان كاسىپكەرلەرگە العىس ايتتى.

قالاعا كورىك بەرىپ, كوپ ۇلتتىڭ ىن­تىماق-بىرلىگىنىڭ ۇيىتقىسىنا اينالاتىن جاڭا نىسان 2 قاباتتى, 1 بلوكتان تۇرادى. جوبا بويىنشا ەتنو-مادەني ورتالىقتار مەن بىرلەستىكتەر كابينەتتەرى, 56 ورىندى كونفەرەنتس-زال, 300 ورىندى ءماجىلىس زالى سالىنادى. سونداي-اق عيمارات الدىنا بيىكتىگى­ 92 مەتر بولاتىن تۋ تۇعىر ورناتىلا­دى. نىسان قۇرىلىسى ءۇش اي بويى جۇرگىزىلىپ, جىل سوڭىنا دەيىن پايدالانۋعا بەرىلەدى.

الماتى وبلىسى