ۇلىتاۋ وبلىسى, جاڭاارقا اۋداندىق مادەني-ساۋىق ورتالىعىندا اقمارال التاەۆا اتىنداعى I رەسپۋبليكالىق «ارقا ارۋى – 2026» سۇلۋلىق بايقاۋى ءوتتى. قازاقستان رەسپۋبليكاسى تاۋەلسىزدىگىنىڭ 35 جىلدىعىنا وراي وتكەن بايقاۋدىڭ ماقساتى – ۇلتتىق قۇندىلىقتاردى دارىپتەۋ, قازاق قىزدارىنىڭ ونەرى مەن ءبىلىمىن, مادەنيەتى مەن سۇلۋلىعىن ناسيحاتتاۋ, دەپ جازادى Egemen.kz.
بايقاۋعا ەلىمىزدىڭ تۇكپىر-تۇكپىرىنەن كەلگەن ارۋلار قاتىسىپ, وزدەرىنىڭ شىعارماشىلىق قابىلەتىن, ساحنا مادەنيەتىن جانە ۇلتتىق ونەرگە دەگەن قىزىعۋشىلىعىن كورسەتتى.
شاراعا ۇلىتاۋ وبلىسى اكىمىنىڭ ورىنباسارى باقىتجان جايلاۋباەۆ, جاڭاارقا اۋدانىنىڭ اكىمى قانات قوجىقاەۆ, اۋداندىق ءماسليحات توراعاسى يۋرجان بەكقوجين, ءماجىلىس دەپۋتاتتارى امانجول ءالتاي مەن قازىبەك الىشەۆ قاتىستى.
سونىمەن قاتار بايقاۋدىڭ قۇرمەتتى قوناقتارى مەن قازىلار القاسىنىڭ قۇرامىندا قازاقستاننىڭ ەڭبەك سىڭىرگەن قايراتكەرلەرى قانات ايتباەۆ پەن سۆەتا ايتباەۆا, تەلەجۇرگىزۋشى دينارا ءساتجان, اقىن قالقامان سارين, قازاقستاننىڭ ەڭبەك سىڭىرگەن قايراتكەرى سەرجان مۇسايىن, كاسىپكەر مەرۋەرت ىبىشەۆا بولدى.
بايقاۋعا قازاقستاننىڭ ەڭبەك ەرى, قازاقستاننىڭ حالىق ءارتىسى قايرات بايبوسىنوۆ, قازاقستاننىڭ حالىق ءارتىسى مەرۋەرت وتەكەشەۆا, ايتىسكەر اقىندار جۇلدىز قوجابەكوۆا مەن ءومىرجان كوپبوسىنوۆ, قازاقستاننىڭ ەڭبەك سىڭىرگەن ءارتىسى سەرىك وسپانوۆ, كاسىپكەرلەر مەيرام ايدابولوۆ پەن الماز جاقاەۆ, اماندوس مۇقانوۆ, «ايگۇل» زەرگەرلىك سالونىنىڭ يەسى ايگۇل مۇقانوۆا, قالقاش ەرجانوۆ جانە باسقا دا قۇرمەتتى قوناقتار قاتىستى.
وسى تاعىلىمى مول شارادا قازاق كينو ونەرىندە اتى اڭىزعا اينالعان, «قىز جىبەك» فيلمىندەگى جىبەك ءرولىن ويناپ, حالىقتىڭ ىستىق سۇيىسپەنشىلىگىنە بولەنگەن قازاقستاننىڭ حالىق ءارتىسى مەرۋەرت وتەكەشوۆانى جاڭاارقا جۇرتشىلىعى ايرىقشا قۇرمەتپەن قارسى الدى. ۇلتتىق ءداستۇردى ۇستانعان ارقا جۇرتشىلىعى ارداقتى ونەر يەسىنە اق بوز ات مىنگىزىپ, سىي-قۇرمەت كورسەتتى. بۇل كورىنىس كوپشىلىكتىڭ كوڭىلىنەن شىعىپ, بايقاۋدىڭ مازمۇنىن تەرەڭدەتە تۇسكەن اسەرلى ءساتتىڭ ءبىرى بولدى.
بايقاۋ قورىتىندىسى بويىنشا باس جۇلدەنى استانا قالاسىنىڭ ارۋى تولعاناي ناۋرىزباي جەڭىپ الىپ, جۇلدە قورىنداعى 1 500 000 تەڭگەنىڭ سەرتيفيكاتى تابىس ەتىلدى. ءى ورىندى قىزىلوردا وبلىسىنىڭ ارۋى باعدات باقىت (1 000 000 تەڭگە), ءىى ورىندى اتىراۋ وبلىسىنىڭ ارۋى ينديرا مۇقتار (500 000 تەڭگە), ال ءىىى ورىندى اقمولا وبلىسىنىڭ ارۋى ايعانىم شاقمۇراي (350 000 تەڭگە) يەلەندى. سونىمەن قاتار «كورەرمەن كوزايىمى» اتالىمى جۇلدەسى مەن بارلىق قاتىسۋشىلارعا ىنتالاندىرۋ سىيلىعى تارتۋ ەتىلدى.
بايقاۋدىڭ جوعارى دەڭگەيدە وتۋىنە قولداۋ ءبىلدىرىپ, جەڭىمپازدار مەن قاتىسۋشىلاردى ماراپاتتاۋ قورىن قالىپتاستىرۋعا ۇلەس قوسقان ازاماتتارعا ۇيىمداستىرۋشىلار ەرەكشە العىس ءبىلدىردى.
ۇلتتىق قۇندىلىقتى ۇلىقتاپ, قازاق قىزىنىڭ پاراساتى مەن كوركەم بولمىسىن دارىپتەگەن تاعىلىمدى جوبانىڭ اۆتورى ءارى پروديۋسەرى – ءلاززات نۇرلانقىزى.
ۇلت دامۋىنا ۇلەس قوساتىن, اقىلىنا كوركى ساي قازاق قىزدارىنىڭ قوعامداعى ورنىن ناسيحاتتاۋعا ارنالعان وسىنداي رەسپۋبليكالىق دەڭگەيدەگى بايقاۋدىڭ بەرەر تاعىلىمى مول.
ۇلىتاۋ وبلىسى