قازاقستان پرەزيدەنتى قاسىم-جومارت توقاەۆ استانادا ەاەو مەملەكەتتەرى باسشىلارىنىڭ قاتىسۋىمەن وتكەن ەۋرازيالىق ەكونوميكالىق فورۋمنىڭ پلەنارلىق وتىرىسىندا ءسوز سويلەدى, دەپ حابارلايدى Egemen.kz
مەملەكەت باسشىسى الەمدىك ەكونوميكا ءداستۇرلى سىن-قاتەرلەرمەن قاتار تسيفرلىق تەحنولوگيالاردىڭ قارقىندى دامۋىمەن بايلانىستى ەلەۋلى وزگەرىستەر كەزەڭىن باستان وتكەرىپ جاتقانىن اتاپ ءوتتى. ونىڭ ايتۋىنشا, جاساندى ينتەللەكت جاھاندىق ەكونوميكالىق دامۋدىڭ نەگىزگى فاكتورلارىنىڭ بىرىنە اينالدى.
ء«بىز جاساندى ينتەللەكت تەحنولوگيالارىنىڭ قارقىندى دامۋى جاھاندىق ەكونوميكانىڭ ىرگەلى فاكتورىنا اينالعانىن كورىپ وتىرمىز», – دەدى توقاەۆ.
پرەزيدەنت جاساندى ينتەللەكتىنى ەنگىزۋ ەڭبەك نارىعىندا اۋقىمدى وزگەرىستەرگە الىپ كەلەتىنىن جانە بۇكىل الەم بويىنشا ميلليونداعان ادامدى قايتا دايارلاۋدى قاجەت ەتەتىنىن ايتتى. وسى جاعدايدا قازاقستان ەاەو اياسىنداعى ينتەگراتسيالىق ۇدەرىستەردى دامىتۋ ءۇشىن جاساندى ينتەللەكت تەحنولوگيالارىن بەلسەندىرەك پايدالانۋدى ۇسىنادى.
«ماسەلەن, حالىقارالىق ۆاليۋتا قورىنىڭ باعالاۋىنشا, الداعى جىلدارى جاساندى ينتەللەكت تەحنولوگيالارىن ەنگىزۋگە بايلانىستى الەمدىك ەڭبەك نارىعىندا جۇمىس ورىندارىنىڭ شامامەن 40%-ى قىسقارادى. ارينە, بۇل الەمنىڭ تۇكپىر-تۇكپىرىندەگى جۇزدەگەن ميلليون ادامدى قايتا وقىتۋدى تالاپ ەتەدى», – دەپ اتاپ ءوتتى مەملەكەت باسشىسى.
توقاەۆ سونداي-اق 2026 جىلدىڭ قازاقستاندا جاساندى ينتەللەكت جانە تسيفرلىق دامۋ جىلى بولىپ جاريالانعانىن ەسكە سالدى. سونىمەن قاتار, جەكە دەرەكتەردى قورعاۋ مەن ازاماتتاردىڭ تسيفرلىق ورتاداعى قاۋىپسىزدىگىنە ەرەكشە نازار اۋدارىلىپ وتىر.