ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى بۇكىلرەسەيلىك سىرتقى ساۋدا اكادەمياسىمەن (بسسا) ىنتىماقتاستىق تۋرالى كەلىسىمگە قول قويدى, دەپ حابارلايدى Egemen.kz.
قۇجاتقا ەۇۋ رەكتورى ەرلان سىدىقوۆ پەن بسسا رەكتورى ۆيتتوريا يدريسوۆا قول قويدى. قول قويۋ ءراسىمى بۇكىلرەسەيلىك سىرتقى ساۋدا اكادەمياسى دەلەگاتسياسىنىڭ ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنە رەسمي ساپارى اياسىندا ءوتتى. كەزدەسۋ رەسەي فەدەراتسياسى پرەزيدەنتى ۆلاديمير ءپۋتيننىڭ قازاقستان رەسپۋبليكاسىنا مەملەكەتتىك ساپارىنا وراي ۇيىمداستىرىلىپ, جوعارى ءبىلىم مەن عىلىم سالاسىنداعى قازاقستاندىق-رەسەيلىك ىنتىماقتاستىقتى نىعايتۋ اياسىندا ۇيىمداستىرىلدى. تاراپتاردىڭ اتاپ وتۋىنشە, بۇل كەلىسىم ءبىلىم جانە عىلىم سالاسىنداعى حالىقارالىق ارىپتەستىكتى دامىتۋداعى ماڭىزدى قادامداردىڭ ءبىرى بولدى.
كەزدەسۋ بارىسىندا تاراپتار اكادەميالىق ۇتقىرلىقتى دامىتۋ, بىرلەسكەن ءبىلىم بەرۋ باعدارلامالارىن جۇزەگە اسىرۋ, عىلىمي زەرتتەۋلەر جۇرگىزۋ جانە حالىقارالىق جوبالاردى قولداۋ ماسەلەلەرىن تالقىلادى. سونداي-اق قوس ديپلومدى باعدارلامالاردى ىسكە قوسۋ, پروفەسسور-وقىتۋشىلار قۇرامىنىڭ تاجىريبە الماسۋى جانە جاس عالىمداردى قولداۋ باعىتىنداعى ىنتىماقتاستىقتى كەڭەيتۋگە ەرەكشە نازار اۋدارىلدى.
قازاقستاندا ەكى ۋنيۆەرسيتەت ليتسەنزياسىنان ايىرىلۋى مۇمكىن
ەۇۋ رەكتورى ەرلان سىدىقوۆ ءوز سوزىندە ەكى ەلدىڭ جوعارى وقۋ ورىندارى اراسىنداعى بايلانىستاردىڭ تۇراقتى تۇردە دامىپ كەلە جاتقانىن اتاپ ءوتتى.
«رەسەيدىڭ جەتەكشى جوعارى وقۋ ورىندارىمەن ارىپتەستىگىمىز جۇيەلى تۇردە جالعاسىپ كەلەدى. بۇگىندە كوپتەگەن ستۋدەنتتەرىمىز ماسكەۋ, نوۆوسيبيرسك, ومبى سياقتى ءىرى عىلىمي-ءبىلىم بەرۋ ورتالىقتارىندا ءبىلىم الىپ ءجۇر. بۇل بايلانىستار جاستاردىڭ كاسىبي تاجىريبە جيناقتاۋىنا جانە حالىقارالىق دەڭگەيدە باسەكەگە قابىلەتتى مامان بولىپ قالىپتاسۋىنا مۇمكىندىك بەرەدى. الداعى ۋاقىتتا بۇل سەرىكتەستىك ەكى ەلدىڭ ءبىلىم جانە عىلىم سالاسىنداعى ىنتىماقتاستىعىن جاڭا دەڭگەيگە كوتەرەدى دەپ سەنەمىز», دەدى رەكتور.
ءوز كەزەگىندە بسسا رەكتورى ۆيتتوريا يدريسوۆا مەموراندۋمنىڭ ەكى تاراپ ءۇشىن دە ءتيىمدى ەكەنىن جەتكىزدى.
«ەۋرازيا ۇلتتىق ۋنيۆەرسيتەتىمەن ورناتىلعان سەرىكتەستىكتى ءبىز جوعارى باعالايمىز. بۇل ارىپتەستىك تەك ەكى جوعارى وقۋ ورنى اراسىنداعى رەسمي بايلانىس قانا ەمەس, سونىمەن قاتار ءبىلىم مەن عىلىمدى دامىتۋعا باعىتتالعان ۇزاق مەرزىمدى ستراتەگيالىق ىنتىماقتاستىقتىڭ ماڭىزدى بولىگى. مۇنداي بايلانىستار وقىتۋشىلار مەن ستۋدەنتتەرگە جاڭا اكادەميالىق ورتادا تاجىريبە الماسۋعا, زاماناۋي ءبىلىم بەرۋ ادىستەرىن مەڭگەرۋگە جانە حالىقارالىق دەڭگەيدە كاسىبي قۇزىرەتتەرىن ارتتىرۋعا مۇمكىندىك بەرەدى», دەدى ول.
ايتا كەتەيىك, بۇكىلرەسەيلىك سىرتقى ساۋدا اكادەمياسى – سىرتقى ەكونوميكالىق قىزمەت سالاسىنا ماماندار دايارلايتىن ماسكەۋدەگى جەتەكشى جوعارى وقۋ ورىندارىنىڭ ءبىرى. اكادەميا 1931 جىلى قۇرىلعان.
بۇگىندە اكادەميا ەكونوميكا, مەنەدجمەنت جانە قۇقىقتانۋ باعىتتارى بويىنشا باكالاۆريات, ماگيستراتۋرا جانە اسپيرانتۋرا باعدارلامالارىن جۇزەگە اسىرادى. ءاربىر باكالاۆريات باعدارلاماسىندا ەكى شەتەل ءتىلىن مىندەتتى تۇردە وقۋ قاراستىرىلعان. قازىرگى تاڭدا ستۋدەنتتەر اعىلشىن, نەمىس, فرانتسۋز, يسپان, يتاليان, پورتۋگال, قىتاي, كورەي, ۆەتنام جانە اراب تىلدەرىن مەڭگەرە الادى.
ەسكە سالا كەتەيىك, بۇعان دەيىن مينيستر بيىل تالاپكەرلەرگە 89 مىڭنان استام مەملەكەتتىك گرانت بولىنگەنىن ايتقان بولاتىن.