ءماجىلىس ەكىنشى وقىلىمدا جانۋارلار دۇنيەسى, ورمان جانە اڭشىلىق شارۋاشىلىعى جانە كاسىپكەرلىك ماسەلەلەرى بويىنشا وزگەرىستەر مەن تولىقتىرۋلاردى, سونداي-اق اكىمشىلىك قۇقىق بۇزۋشىلىق تۋرالى كودەكسكە (اقبتك) ەنگىزىلەتىن ىلەسپە تۇزەتۋلەرى قابىلدادى, دەپ حابارلايدى Egemen.kz.
ءماجىلىستىڭ ءباسپاسوز قىزمەتىنىڭ مالىمدەۋىنشە, دەپۋتاتتار باستاماشى بولعان زاڭ جوباسى جانۋارلار دۇنيەسىن قورعاۋ, ءوسىمىن مولايتۋ جانە پايدالانۋ سالاسىنداعى مەملەكەتتىك رەتتەۋدى جەتىلدىرۋگە باعىتتالعان. اتاپ ايتقاندا, قولدان نەمەسە جارتىلاي ەرىكتى جاعدايلاردا وسىرىلگەن سيرەك كەزدەسەتىن جانە جويىلىپ كەتۋ قاۋپى بار جانۋارلاردى تىركەۋ ءتارتىبىن بەلگىلەۋ قاراستىرىلادى. بۇل زاڭسىز اۋلانعان جانۋارلاردى زاڭداستىرۋعا جول بەرمەۋگە ىقپال ەتەدى. سونداي-اق وسى سالاعى قوعامدىق باقىلاۋ كۇشەيتىلەدى.
اتىراۋدا اڭشىلىق كەزىندە ەر ادام سەرىگىن اتىپ ولتىرگەن
زاڭ بويىنشا, اڭ اۋلاۋ كەزىندە تۇنگى كورۋ قۇرالدارىن, سونىڭ ىشىندە ينفراقىزىل, ەلەكتروندىق-وپتيكالىق جانە تەپلوۆيزيالىق قۇرىلعىلاردى پايدالانۋعا, سونداي-اق قورىقشىنىڭ ەرىپ ءجۇرۋىنسىز ساڭىراۋقۇرلاردىڭ ۇيىرگە ءتۇسۋ كەزەڭىندە جينالاتىن ورىندارىندا اڭ اۋلاۋعا تىيىم سالىنادى. اڭ اۋلاۋ جانە جانۋارلار دۇنيەسىن پايدالانۋ قاعيدالارىن بۇزعانى, سونىڭ ىشىندە جابايى جانۋارلاردى, وسىمدىكتەر مەن ولاردىڭ دەريۆاتتارىن, سونىڭ ىشىندە اقبوكەن مۇيىزدەرىن زاڭسىز جارنامالاعانى, تاسىمالداعانى, ساقتاعانى جانە وتكىزگەنى ءۇشىن جاۋاپكەرشىلىك ارتادى.
«بۇدان بولەك, ينفراقۇرىلىم وبەكتىلەرىن ورنالاستىرۋ جانە پايدالانۋ كەزىندە جانۋارلاردىڭ مەكەندەيتىن ورتاسىن, ءورىس اۋدارۋ جولدارىن ساقتاۋ جانە ولاردىڭ قۇرىپ كەتۋ قاۋپىنە قاتىستى تالاپتار بەلگىلەنەدى. «ەلەكتر جەلىلەرىندەگى قۇستاردى قورعاۋ قۇرىلعىلارى» ۇعىمى ەنگىزىلەدى. جانۋارلارعا قاتىگەزدىك تانىتقانى ءۇشىن اكىمشىلىك جانە قىلمىستىق جاۋاپكەرشىلىك كۇشەيەدى», دەلىنگەن حابارلامادا.
زاڭ جوبالارى بويىنشا جۇمىس بارىسىندا دەپۋتاتتار ەكولوگيالىق تالاپتاردى ساقتاي وتىرىپ, جەكەلەگەن اۋماقتاردا ءىرى تۋريستىك جوبالاردى ىسكە اسىرۋ مۇمكىندىگىن, سونداي-اق قازاقستان ازاماتتارى مەن زاڭدى تۇلعالارىنا سۇرەكتى تەرەڭ وڭدەۋ جانە ورمان ورتتەرىنىڭ سالدارىن جويۋ جونىندەگى جوبالار ءۇشىن ۇزاق مەرزىمدى ورمان پايدالانۋ قۇقىعىن بەرۋدى كوزدەيتىن تۇزەتۋلەر ەنگىزدى.
قوسىمشا رەتىندە قورىقشىلار مەن اڭشىلىق شارۋاشىلىقتارى باسشىلارىنىڭ اكىمشىلىك قۇقىق بۇزۋشىلىقتاردىڭ جولىن كەسۋ بويىنشا وكىلەتتىگى كەڭەيەدى, ەكولوگيالىق قۇقىق بۇزۋشىلىقتاردى تىركەلگەن اۆتوماتتاندىرىلعان مونيتورينگ جۇيەلەرىمەن باقىلاۋ كۇشەيتىلەدى.
جانۋارلاردى قورعاۋ جانە قوعام قاۋىپسىزدىگى: قاڭعىباس يتتەردىڭ شابۋىلىنا قالاي توسقاۋىل قويامىز؟