اتىراۋدا بۇرىنعى ايەلىنىڭ ءتورت تۋىسىن ءولتىردى دەپ ايىپتالعان سۇلتان سارسەماليەۆتىڭ ءىسى بويىنشا سوت وتىرىسى ءوتىپ جاتىر, دەپ حابارلايدى Egemen.kz.
سوت تەرگەۋى كەزەڭىندە ايىپتالۋشىعا تاعىلعان ايىپتار مەن قىلمىسقا قاتىستى دەرەكتەر قايتا قارالدى. تەرگەۋ مالىمەتتەرى بويىنشا, مارقۇم ناۋرىز مۇقانعاليەۆ 10 رەت پىشاقتالعان, ماكسوت قارابالين – 9, ناسيپ ۋتەشكاليەۆا – 8, ال مەيرامگۇل قارابالينوۆاعا 32 رەت پىشاق جاراقاتى سالىنعان.
سۋديانىڭ سۇراعىنا جاۋاپ بەرگەن سارسەماليەۆ بۇل ارەكەتتەردىڭ ءبارىن جاساعانىن مويىندادى. الايدا ناۋرىز مۇقانعاليەۆتىڭ ءولىمىن ول ءوز-ءوزىن قورعاۋ ماقساتىندا بولعان دەپ ءتۇسىندىرىپ, بۇل ەپيزود بويىنشا ايىپپەن كەلىسپەيتىنىن ايتتى. ال قالعان ەپيزودتار بويىنشا ايىپتالۋشى كىناسىن مويىنداپ, بۇنىڭ ءبارى العاشقى قىلمىسىن جاسىرۋ ءۇشىن بولعانىدىعىن ايتتى.
«مەن ولاردى ناۋرىزدىڭ ءولىمىن جاسىرۋ ءۇشىن ءولتىردىم», دەدى ول سوتتا.
بۇعان دەيىنگى سوت وتىرىسىندا سارسەماليەۆ قىلمىسقا وتباسىلىق جانجال تۇرتكى بولعانىن ايتقان بولاتىن. الايدا جابىرلەنۋشى تاراپ ايىپتالۋشىنىڭ بۇل ۋاجىنە سەنبەيتىنىن جەتكىزدى.
ەسكە سالا كەتەيىك, بۇعان دەيىن كۇدىكتى ولىم جازاسىنا دا دايىن ەكەندىگىن مالىمدەگەن بولاتىن.