ءبىلىم بەرۋ جۇيەسىنىڭ نەگىزگى مىندەتتەرىنىڭ ءبىرى – دارىندى بالالاردى ەرتە انىقتاۋ جانە ولاردىڭ الەۋەتىن جان-جاقتى دامىتۋ. وسى باعىتتاعى ماڭىزدى باستامالاردىڭ ءبىرى – «سيريۋس-قازاقستان» جوباسى. جوبا تالانتتى وقۋشىلاردى قولداۋدىڭ ءتيىمدى ەكوجۇيەسىن قالىپتاستىرۋعا, سونداي-اق عىلىم مەن تەحنولوگيا سالاسىنا قىزىعۋشىلىعى جوعارى جاستاردىڭ قابىلەتىن دامىتۋعا باعىتتالعان, دەپ حابارلايدى Egemen.kz.
«سيريۋس-قازاقستان» جوباسى مەملەكەت باسشىسى قاسىم-جومارت توقاەۆتىڭ تاپسىرمالارىن ىسكە اسىرۋ اياسىندا جۇزەگە اسىرىلىپ وتىر. باستامانىڭ نەگىزگى ماقساتى – ءبىلىم ساپاسىن ارتتىرۋ, قازاقستاندىق وقۋشىلاردىڭ حالىقارالىق دەڭگەيدەگى باسەكەگە قابىلەتتىلىگىن كۇشەيتۋ جانە ادامي كاپيتالدى دامىتۋ.
وقۋ-اعارتۋ ءبىرىنشى ۆيتسە-ءمينيسترى مايرا مەلدەبەكوۆا جوبا اياسىندا ءبىلىم بەرۋ مازمۇنى زاماناۋي تالاپتارعا سايكەس ۇيىمداستىرىلاتىنىن ايتادى.
«اتاپ ايتقاندا, ماتەماتيكا, جاراتىلىستانۋ عىلىمدارى, ينجەنەريا, روبوتوتەحنيكا, جاساندى ينتەللەكت جانە جوبالىق-زەرتتەۋ قىزمەتى باعىتتارىنا باسىمدىق بەرىلەدى. بۇل وقۋشىلاردىڭ تەك تەوريالىق ءبىلىمىن جەتىلدىرىپ قانا قويماي, ولاردىڭ زەرتتەۋ داعدىلارى مەن پراكتيكالىق قۇزىرەتتەرىن دامىتۋعا مۇمكىندىك بەرەدى», دەدى ۆيتسە-مينيستر.
ول سونىمەن قاتار جوبا ۇلتتىق قۇندىلىقتاردى دارىپتەۋگە ەرەكشە نازار اۋداراتىنىن اتاپ ءوتتى.
«وقۋ باعدارلامالارىنا «دومبىرا», «ۇلتتىق ونەر», «ۇلتتىق سپورت» كۋرستارى جانە «ادال ازامات» تاربيە باعدارلاماسى ەنگىزىلەدى. بۇل ءوز كەزەگىندە جاس ۇرپاقتىڭ ۇلتتىق مادەنيەتكە قۇرمەتىن ارتتىرىپ, زاماناۋي ءبىلىم مەن ۇلتتىق تاربيەنى ۇيلەستىرۋگە جاعداي جاسايدى», دەدى مايرا تۇرعانبايقىزى.
جوبانىڭ ماڭىزدى باعىتتارىنىڭ ءبىرى – پەداگوگ كادرلاردىڭ كاسىبي الەۋەتىن كۇشەيتۋ.
«پەداگوگيكالىق قۇرامنىڭ 80 پايىزى قازاقستاندىق مامانداردى قۇرايدى. سونىمەن قاتار حالىقارالىق تاجىريبەنى ەنگىزۋ جانە «تالانت جانە تابىس» قورىنىڭ بىلىكتىلىكتى ارتتىرۋ باعدارلامالارىن پايدالانۋ كوزدەلىپ وتىر. بۇل وتاندىق ءبىلىم بەرۋ جۇيەسىنە وزىق تاجىريبەلەردى ءتيىمدى ەنگىزۋگە مۇمكىندىك بەرەدى», دەدى ۆيتسە-مينيستر.
«سيريۋس – قازاقستان» جوباسى «سيريۋس» فەدەرالدىق اۋماعىمەن جانە «تالانت جانە تابىس» قورىمەن ىنتىماقتاستىق نەگىزىندە جۇزەگە اسىرىلادى. اتالعان ارىپتەستىك دارىندى بالالارمەن جۇمىس ىستەۋدىڭ ۇزدىك تاجىريبەلەرىن ەنگىزۋگە, ءبىلىم بەرۋ ادىستەمەلەرىن جەتىلدىرۋگە جانە حالىقارالىق ىنتىماقتاستىقتى دامىتۋعا باعىتتالعان.
عالىمجان الماتوۆ: «سيريۋس» مەكتەپتەرى زاماناۋي ءبىلىمدى ۇلتتىق قۇندىلىقتارمەن ۇشتاستىرادى
ۆيتسە-ءمينيستردىڭ ايتۋىنشا جوبا قازاقستاندىق وقۋشىلاردىڭ وليمپيادالارعا, عىلىمي جوبالار بايقاۋلارىنا جانە زەرتتەۋ قىزمەتىنە قاتىسۋ مۇمكىندىكتەرىن ارتتىرادى. سونىمەن قاتار عىلىمي-تەحنولوگيالىق باعىتتار بويىنشا ەرتە كاسىبي باعدار بەرۋگە جاعداي جاسايدى.
«جوبانى الماتى جانە استانا قالالارىندا ىسكە اسىرۋ جوسپارلانعان. بۇل وڭىرلەردەگى تالانتتى بالالار ءۇشىن زاماناۋي ءبىلىم بەرۋ مۇمكىندىكتەرىن قالىپتاستىرىپ قانا قويماي, بولاشاقتا ەلىمىزدىڭ بارلىق اۋماعىنا تارالاتىن ءتيىمدى ءبىلىم بەرۋ مودەلىنىڭ نەگىزىن قالايدى», دەدى ول.
ايتا كەتەيىك, بۇگىن قاسىم-جومارت توقاەۆ پەن ۆلاديمير پۋتين استاناداعى «سيريۋس» مەكتەبىنىڭ كاپسۋلاسىن سالۋ راسىمىنە قاتىستى.