استانادا 21–27 مامىر ارالىعىندا وتكەن تۇرىك اسحاناسى اپتالىعى اياسىندا قازاق جانە تۇرىك حالقىنىڭ كونە تۇركى تاريحىنان تامىر تارتقان ورتاق تاعامدارى ازىرلەنىپ, كوپشىلىككە تانىستىرىلدى, دەپ حابارلايدى Egemen.kz
تۇركى دۇنيەسىن بىرىكتىرەتىن گاسترونوميالىق مۇرانى جاڭعىرتۋ, تانىستىرۋ جانە ناسيحاتتاۋ ماقساتىن تۇتقان تۇرىك اسحاناسى اپتالىعى الەم بويىنشا بيىل بەسىنشى رەت ۇيىمداستىرىلىپ وتىر. جىل سايىنعى شارانىڭ نەگىزىن قالاۋشى – تۇركيا پرەزيدەنتى رەجەپ تايپ ەردوعاننىڭ جۇبايى ەمينە ەردوعان.
بيىل اپتالىق «داستارحان باسىنداعى مۇرا» تاقىرىبىمەن ءوتتى. ادەتتە, جايىلعان داستارحان ۇستىنە ءتۇرلى حالىقتاردىڭ تاعامدارى ۇسىنىلۋى مۇمكىن. الايدا, ولاردىڭ عاسىرلار بويعى تاريحتان سىر شەرتەتىنە ءمان بەرمەيمىز. دەمەك, «داستارحان» – ءتۇرلى ۇلتتاردى, مادەنيەتتەردى, تاريحتى ءوزارا توعىستىراتىن الاڭ.
قازاقستانداعى تۇركيا ەلشىلىگى ۇسىنعان مالىمەتكە سايكەس, استاناعا شاقىرىلعان شەف-اسپازدار مەيرامحانالاردىڭ بىرىندە قازاق جانە تۇرىك حالىقتارىنا ورتاق تاعامداردى دايارلاپ, جاس اسپازدارمەن تاجىريبە ءبولىستى, جينالعان قاۋىمعا ولاردىڭ شىعۋ تاريحىن بايانداپ بەردى.
ازىرلەنگەن استىڭ ءبىرى – ءمانتى. تاعامداردىڭ شىعۋ تاريحىن 25 جىلدان استام زەرتتەپ كەلە جاتقان شەف-اسپاز ءارى كوپتەگەن شاكىرتتىڭ ۇستازى – الي رونايدىڭ ايتۋىنشا, ءمانتى – كوشپەندىلەردىڭ اسى ءارى گاسترونوميانىڭ تاماشا ۇلگىسى. «سەبەبى بۇل تاعام ورتا ازيادان باستاۋ الىپ, انادولىعا جەتكەن, كەيىن ەۋروپاعا تاراعان. ونىڭ دامپلينگ دەگەن اتاۋى بار, ازەربايجاندا – دۇشپارا, بىزگە ءمانتى بولىپ كەلەدى. ال ەۋروپاعا بارعاندا راۆيولي, تورتەلليني بولادى. تاعام مادەنيەتپەن بىرگە قوزعالىپ, اتاۋى وزگەرە بەرگەن. ءمانتى – ەسكىدەن كەلە جاتقان كوشپەندىلەر اسى. ول قۇنارلى ءالى تويىمدى», - دەيدى.
«قالدىقسىز اس ازىرلەۋ» قاعيداتىن قاتاڭ ۇستاناتىن شەف-اسپاز گوكحان چىلاك پەن الي روناي مانتىدەن بولەك, تۇزدىعى قىمىزدان دايىندالعان تۇشپارا دا ۇسىندى. بۇدان بولەك, داستارحانعا جاپىراققا ورالعان سارما, ءىشلي كوفتە جانە ءتۇرلى سالماسى بار قامىر تاعامدارى قويىلدى. نەگىزگى تاعام رەتىندە يۋنەسكو تىزىمىنە ەنگەن – كەشكەك تارتۋ ەتىلدى (قوزى ەتى بيداي جانە وزگە جارمالارمەن بىرگە ۇزاق ۋاقىت باياۋ وتتا دايىندالادى).
ال «تاتتىلەر» بولىمىندە قايماقتان جاسالعان بالمۇزداق تىس, تۇرىكتىڭ ءداستۇرلى دەسەرتتەرى مەن قازاقتىڭ ۇلتتىق تاعامدارى جەنت پەن قوسپا ءبىر داستارحان باسىندا ۇندەستىرىلدى.
1890 جىلدان بەرى اتادان ميراس بولىپ قالعان ناۋبايشىلىق ءداستۇردى جالعاستىرىپ كەلە جاتقان حاكان دوعاننىڭ ايتىپ وتكەندەي, نان ءپىسىرۋدىڭ مىڭداعان ءمازىرى اراسىنان اپتالىق ءۇشىن بىرنەشەۋىن عانا تاڭداپ الۋ قيىنعا سوققان. ناۋبايشى جۇقا نان, بازلاما, شاعىن پيدە جانە تابيعي اشىتقىمەن نان ءپىسىرىپ, ونى قورىتىلعان مايمەن جانە ءتۇرلى شوپتەردەن دايىندالعان مايمەن ۇسىندى.
ايتا كەتەيىك, شەف-اسپاز الي روناي انادولى مەن ۇلى دالا اراسىنداعى عاسىرلار بويى قالىپتاسقان ورتاق ءومىر سالتى مەن داستارحان مادەنيەتى جونىندە Jibek Joly تەلەارناسىنداعى «Demdi.life» باعدارلاماسىندا كەڭىنەن اڭگىمەلەپ بەردى.