دەنساۋلىق ساقتاۋ مينيسترلىگى جىل باسىنان بەرى ەلدەگى ءبىلىم بەرۋ ۇيىمدارىندا 347 تەكسەرۋ جۇرگىزدى. ونىڭ ىشىندە 49-ى تاماقتانۋ بلوكتارىنا قاتىستى بولىپ, ولاردىڭ جارتىسىنان استامى جوسپاردان تىس وتكىزىلگەن. بۇل تۋرالى بۇگىن ۇكىمەت وتىرىسىندا ۆەدومستۆو باسشىسى اقمارال ءالنازاروۆا مالىمدەدى, دەپ جازادى Egemen.kz.
مينيستر ءبىلىم بەرۋ ۇيىمدارىنداعى سانيتاريالىق-ەپيدەميولوگيالىق قاۋىپسىزدىكتى قامتاماسىز ەتۋ, جازعى ساۋىقتىرۋ لاگەرلەرىن دايىنداۋ, سونداي-اق مەكتەپ مەديتسيناسىن دامىتۋ ماسەلەلەرى جونىندە ءسوز قوزعادى.
«انىقتالعان بۇزۋشىلىقتاردىڭ قاتارىندا ءۇي-جايلاردىڭ سانيتاريالىق جاعدايىنىڭ قاناعاتتانارلىقسىز بولۋى, سونداي-اق سانيتاريالىق-ەپيدەميولوگيالىق قورىتىندىلاردىڭ بولماۋى بار. سوڭعى ءۇش جىلدىڭ ىشىندە ءبىلىم بەرۋ ۇيىمدارىندا توپتىق ينفەكتسيالىق اۋرۋلار جاعدايلارىنىڭ ەكى ەسە ءوسۋى بايقالادى», دەپ مينيستر سىن ايتتى. ەلىمىزدە بالالار لاگەرلەرىنە قانداي تالاپتار ەنگىزىلدى؟بۇعان دەيىن مەملەكەت باسشىسى بيۋدجەت قاراجاتى ەسەبىنەن قارجىلاندىرىلاتىن بالالار نىساندارىنا مەملەكەتتىك باقىلاۋدىڭ ەرەكشە ءتارتىبىن ەنگىزۋدى كوزدەيتىن زاڭعا قول قويعان بولاتىن.
جاڭا شارالاردىڭ شەڭبەرىندە 1 ماۋسىمنان باستاپ ەلىمىزدىڭ مەكتەپتەرىندە سانيتاريالىق-ەپيدەميولوگيالىق احۋالعا مونيتورينگ جۇرگىزۋ باستالادى, ال 1 شىلدەدەن باستاپ ءبىلىم بەرۋ جانە بالالاردىڭ جازعى دەمالىس نىساندارىنا جوسپارلى تەكسەرۋلەر قايتا جانداندىرىلادى.
«وتكەن جىلى رۇقسات قۇجاتتارىنسىز جۇمىس ىستەگەن لاگەرلەر انىقتالدى. اتالعان فاكتىلەر بويىنشا ماتەريالدار پروكۋراتۋرا ورگاندارىنا جولدانىپ, ءتيىستى شارالار قابىلداندى. حالىقتى اقپاراتتاندىرۋ ماقساتىندا «سەنىم تەلەفونى» جۇمىسىن جالعاستىرۋدا, سونداي-اق سانيتاريالىق-ەپيدەميولوگيالىق باقىلاۋ كوميتەتىنىڭ سايتىندا سانيتاريالىق-ەپيدەميولوگيالىق قورىتىندىسى بار لاگەرلەردىڭ تىزبەسى اپتا سايىن وتىرادى», دەدى اقمارال ءالنازاروۆا. ليتسەنزياسى جوق لاگەرلەر جابىلا ما؟وقۋ-اعارتۋ مينيسترلىگىنىڭ مالىمەتىنشە, جازعى ماۋسىمدا 187 ساۋىقتىرۋ ۇيىمىنىڭ جۇمىسى جوسپارلانعان. بۇگىنگى تاڭدا ءوتىنىم بەرگەن 99 لاگەردىڭ 33-ءى سانيتاريالىق-ەپيدەميولوگيالىق قورىتىندى العان.