كەشە پرەمەر-ءمينيستردىڭ ورىنباسارى بەردىبەك ساپارباەۆ وبلىسقا كەلگەن جۇمىس ساپارى بارىسىندا كاسىپتىك-تەحنيكالىق كادرلاردى دايىنداۋ بويىنشا ۇلتتىق كەڭەستىڭ سەلەكتورلىق وتىرىسىن وتكىزدى. جيىنعا ورتالىق جانە جەرگىلىكتى اتقارۋشى ورگانداردىڭ, ۇلتتىق كاسىپكەرلەر پالاتاسىنىڭ, ءبىلىم بەرۋ مەكەمەلەرىنىڭ, ۇلتتىق كومپانيالاردىڭ, قوعامدىق جانە حالىقارالىق ۇيىمداردىڭ باسشىلارى قاتىستى. وتىرىسقا قاتىسۋشىلار دۋالدى ءبىلىم بەرۋ جۇيەسىن ەنگىزۋ, كوللەدجدەردى ءىرى كومپانيالاردىڭ باسقارۋىنا بەرۋ, سونداي-اق ەڭبەك نارىعىنىڭ كادرلارعا دەگەن سۇرانىسىن بولجاۋ ماسەلەلەرىن قىزۋ تالقىلادى.
ءبىلىم جانە عىلىم ءمينيسترى اسلان ءسارىنجىپوۆ دۋالدى وقىتۋ جۇيەسىن دامىتۋعا قازىر مەملەكەت كوڭىل ءبولىپ وتىرعانىن ايتتى. ال وزدەرىنە قاجەت كادرلاردى دايىنداۋعا بيزنەس قۇرىلىمداردىڭ ىقىلاسى ازدىعىن العا تارتتى. ءبىلىم جانە عىلىم ءمينيسترى مالىمدەگەندەي, قازىرگى ۋاقىتتا دۋالدى وقىتۋ جۇيەسى ەلىمىزدەگى 3225 كاسىپورىن مەن 280 كوللەدجدىڭ ىنتىماقتاستىعى اياسىندا ەنگىزىلۋدە. بىراق سوعان قاراماستان, وڭىرلەردە ءالى دە بولسا جۇيەلى جۇمىستار جۇرگىزۋ قاجەتتىگىن اتاپ ءوتتى. بۇنىڭ نەگىزگى سەبەبى جۇمىس ىستەيتىن ونەركاسىپ كاسىپورىنداردا كوللەدج شاكىرتتەرىن وندىرىسكە جىبەرۋ ءۇشىن قاجەتتى بازا جوق. مۇنداي جاعدايدا وقۋ ورىندارىندا نەمەسە رەسۋرس ورتالىقتارىندا وندىرىستىك ورتاعا ولاردى بەيىمدەۋ جانە ءىس جۇزىندەگى تاجىريبەلىك جۇمىستاردى كاسىپورىندار الاڭدارىنا بىرتىندەپ كوشۋمەن دۋالدى ءبىلىم بەرۋدىڭ بەيىمدەلگەن ادىستەرىن ەنگىزگەن دۇرىس, دەپ اتاپ ءوتتى ول.
ەلىمىز 2050 جىلى الەمنىڭ ەڭ وزىق 30 ەلىنىڭ قاتارىنا ەنۋى قاجەت. بۇل بەلەستى باعىندىرۋ ءۇشىن ەڭ الدىمەن, ءبىلىمدى دە بىلىكتى كادرلار قاجەت بولادى. بۇل ماقساتقا جەتۋ ءۇشىن ەلباسى ەلىمىزدە دۋالدى وقىتۋ جۇيەسىن ەنگىزۋدى تاپسىردى. دۋالدى وقىتۋ جۇيەسى دەگەنىمىز – وقۋشىنى وقۋ ورنى مەن وندىرىستە قاتار وقىتۋ. ياعني, بولاشاق مامان وندىرىستە ءوز ءبىلىمىن ءىس-تاجىريبە رەتىندە سىناپ كورە الادى. الايدا, ەلىمىزدەگى كاسىپتىك-تەحنيكالىق كوللەدجدەردىڭ تەك 8 پايىزى عانا دۋالدى جۇيە بويىنشا ءبىلىم بەرەدى ەكەن.
بۇل ماسەلەگە قاتىستى ۇلتتىق كاسىپكەرلەر پالاتاسى توراعاسىنىڭ ورىنباسارى نۇرجان التاەۆ ءوز ويىن ءبىلدىردى. ونىڭ ايتۋىنشا, كوللەدجدەردىڭ وقىتۋ ۇدەرىسى كەي كەزدە كاسىپورىنداردىڭ تالاپ-ۇدەسىنەن شىقپاي جاتادى. جالپى, كاسىپكەرلەر تاراپىنان قىزىعۋشىلىق جوق ەمەس. ماسەلەن, بىلتىرعى جىلى 13 مىڭ مامان دايىنداۋعا 666 ءوتىنىش تۇسكەن.
– جالپى, 2014 جىلى كاسىبي-تەحنيكالىق مامانداردى دايىنداۋعا مەملەكەت تاراپىنان 96 ملرد. تەڭگە قارجى ءبولىنگەن. قارجىلاندىرۋ جىل وتكەن سايىن ءوسىپ وتىرادى. تەك جەرگىلىكتى بيلىكتەگىلەر, بۇل جۇمىستى قاتاڭ باقىلاۋعا الۋ كەرەك, – دەدى بەردىبەك ساپارباەۆ.
ب.ساپارباەۆ مەملەكەت باسشىسىنىڭ تاپسىرماسىن ورىنداۋ اياسىندا ەلىمىزدە «نۇرلى جول» جانە يندۋستريالىق-يننوۆاتسيالىق دامۋ باعدارلامالارىن جۇزەگە اسىرۋ ءۇشىن 35 مىڭعا دەيىن جاس ماماندى, ونىڭ ىشىندە, 18 مىڭ كاسىپتىك-تەحنيكالىق ءبىلىمى بار ماماندى تارتۋ جوسپارلانعانىن ايتتى. ۆيتسە-پرەمەر مەملەكەتتىڭ دۋالدى ءبىلىم بەرۋدى دامىتۋعا جان-جاقتى قولداۋ كورسەتىپ جاتقانىن, ال, بۇل جاڭاشىلدىقتان قوعام ناقتى ناتيجەلەر كۇتەتىنىن ايتىپ ءوتتى.
«كوللەدجدەردى كومپانيالاردىڭ سەنىمدى باسقارۋىنا بەرۋ مىسالدارى بار, بىراق ولار جەتكىلىكسىز. ەلباسىنىڭ تاپسىرمالارىنا سايكەس وقۋ ورىندارىنىڭ بەيىنىن ساقتاۋدىڭ مىندەتتى شارتىمەن بۇل ۇدەرىستى جەدەلدەتۋ قاجەت. مەملەكەت بيزنەس ءۇشىن بارىنشا قولايلى جاعداي جاساۋدا جانە بيزنەس تە قىزىعۋشىلىق پەن الەۋمەتتىك جاۋاپكەرشىلىك تانىتۋى ءتيىس», دەدى ب.ساپارباەۆ.
ال, وبلىس اكىمى قانات بوزىمباەۆ وبلىستاعى كوللەدج تۇلەكتەرىنىڭ 72 پايىزى جۇمىسقا ورنالاسۋدا, دەپ اتاپ ءوتتى. ويتكەنى, ءوندىرىستى وڭىردە ءىرىلى-ۇساقتى كاسىپورىندار كوپ. مىسالى, حيميالىق-تەحنيكالىق كوللەدج وقۋشىلارى بۇل كۇندەرى مۇناي-حيميا زاۋىتىندا دۋالدى جۇيە بويىنشا ءبىلىم الۋدا. سول سياقتى, «قازاقستان اليۋميني» زاۋىتىنا قاراستى 7 ليتسەيدە دە دۋالدى وقىتۋ جۇيەسى جاقسى جولعا قويىلعان. ەكىباستۇزدا, اقسۋداعى كاسىپورىندار تۇگەلدەي وسى جاڭاشىل جۇيەنىڭ ناتيجەلەرىن كورۋدە.
جيىندى قورىتىندىلاعان ۆيتسە-پرەمەر دۋالدى ءبىلىم بەرۋ جۇيەسىن ەنگىزۋدىڭ, كاسىپورىندارعا ارناپ كريتەريلەر دايىنداۋدىڭ ناقتى ءناتيجەلەرىنە جەتۋگە قاتىستى ءتيىستى مەملەكەتتىك ورگاندارعا بىرقاتار ناقتى تاپسىرمالار بەردى, ولار كوللەدجدەردى سەنىمدى باسقارۋدى, سونداي-اق ەكونوميكا سالاسىنىڭ ناقتى سۇرانىستارىن ەسكەرە وتىرىپ, كادرلار دايارلاۋدى ءوز قولدارىنا الادى.
تۇستەن كەيىن ب.ساپارباەۆ وبلىستاعى ءبىلىم بەرۋ, دەنساۋلىق ساقتاۋ مەكەمەلەرى مەن كاسىپورىنداردى ارالادى.
فاريدا بىقاي,
«ەگەمەن قازاقستان».
پاۆلودار وبلىسى.