استانا. 18 تامىز. بۇگىن «استانا» ۋەفا چەمپيوندار ليگاسى ىرىكتەۋ ءتۋرنيرىنىڭ پلەي-وفف باسەكەسىندەگى العاشقى ويىنىن وينايدى. قارسىلاسى كيپردىڭ اپوەل كومانداسى. «استانا ارەنا» سپورت كەشەنىندە بولاتىن ماتچ جەرگىلىكتى ۋاقىتپەن ساعات 22:00-دە باستالادى. بۇل تۋرالى egemen.kz حابارلادى.
ويىندى «تاڭ» تەلەارناسى تىكەلەي ەفيردە كورسەتەدى دەپ كۇتىلۋدە. وسى رەتتە, «تاڭ» چەمپيوندار ليگاسى مەن ەۋروپا ليگاسىنىڭ 2015-2016 جىلعى ماۋسىمداعى ويىندارىن تىكەلەي ەفيردە كورسەتۋ قۇقىعىنا يە ەلىمىزدەگى جالعىز تەلەارنا ەكەنىن ايتا كەتەيىك.
اپوەل ەۋروكۋبوكتىق تۋرنيرلەرگە 1963-1964 جىلعى ماۋسىمنان بەرى قاتىسىپ كەلە جاتقان تاجىريبەلى كوماندا. چەمپيوندار ليگاسىندا ىرىكتەۋ سىنىنداعى ويىنداردى قوسقاندا 66 ماتچ وتكىزگەن. ونىڭ 19-ىندا جەڭىسكە جەتسە, 18 كەزدەسۋدى تەڭ اياقتاعان. ال 29 ويىندا قارسىلاستارىنا ەسە جىبەرگەن.
كيپردىڭ كومانداسى 2011-2012 جىلعى ماۋسىمدا چەمپيوندار ليگاسىنىڭ توپتىق كەزەڭىنە شىعىپ قانا قويماي, دودانىڭ شيرەك فينالىنا دەيىن جەتىپ, جانكۇيەرلەردىڭ نازارىن اۋدارعان ۇجىم.
ءوز كەزەگىندە «استانا» بۇل ءتۋرنيردىڭ دەبيۋتانتى بولىپ سانالادى. سەبەبى, 2009 جىلى عانا قۇرىلعان كلۋب بيىلعا دەيىن چەمپيوندار ليگاسىندا ويناعان جوق. كوماندانىڭ كارى قۇرلىقتاعى ەڭ جوعارى ناتيجەسى ەۋروپا ليگاسى ىرىكتەۋ ءتۋرنيرىنىڭ پلەي-وفف ساتىسى. بۇل سىندا «استانا» وتكەن ماۋسىمدا ونەر كورسەتكەن ەدى. ەلوردالىقتاردىڭ جولىنا ول كەزدە يسپانيانىڭ «ۆيليارەال» كومانداسى توسقاۋىل بولدى.
مامانداردىڭ ايتۋىنشا, بۇگىنگى ويىندا «استانا» ءسال عانا باسىمدىققا يە. كەيبىر بۋكمەكەرلىك كەڭسەلەردىڭ پىكىرىنە سۇيەنسەك, ءبىزدىڭ كلۋب 1:0 ەسەبىمەن جەڭىسكە جەتەدى.
ايتا كەتەيىك, وسى ويىنعا «استانانىڭ» شابۋىلشىسى پاتريك تۆۋماسي قاتىسا المايدى. ول حيك-كە قارسى قارىمتا كەزدەسۋدە قىزىل قاعاز الىپ, الاڭنان قۋىلعان بولاتىن.
دەگەنمەن, وتاندىق جانكۇيەرلەر بولگار مامانى ستانيمير ستويلوۆتان ءتالىم الاتىن «استانا» ويىنشىلارىنىڭ جەڭىسىنە سەنەتىنىن الەۋمەتتىك جەلىلەر ارقىلى بىلدىرۋدە. استانا قالاسى اكىمدىگىنىڭ حابارلاۋىنشا, ماتچتى ستاديوننان 30 مىڭعا جۋىق جانكۇيەر تاماشالايدى.
«استانا» مەن اپوەل اراسىنداعى ويىنعا ۆەنگر مامانى ۆيكتور كاششاي تورەلىك جاسايدى.
ەلامان قوڭىر.
دەرەك: egemen.kz.
سۋرەت: 24.kz.