بۇگىن بوتانيكالىق ساياباقتا وبلىس اكىمى مۇرات ەرگەشباەۆتىڭ قاتىسۋىمەن «تازا قازاقستان» رەسپۋبليكالىق ەكولوگيالىق باعدارلاماسى اياسىنداعى كەڭ كولەمدى تازالىق اكتسياسى ءوتتى, دەپ جازادى Egemen.kz.
اۋقىمدى اكتسياعا وبلىس بويىنشا 17694 ادام قاتىستى. ولاردىڭ قاتارىندا زيالى قاۋىم وكىلدەرى, وبلىستىق ءماسليحات دەپۋتاتتارى, باسقارما, دەپارتامەنت جانە ينسپەكتسيا باسشىلارى, «AMANAT» پارتياسىنىڭ وكىلدەرى, مەملەكەتتىك مەكەمە قىزمەتكەرلەرى, جاستار ۇيىمدارى مەن ەكوبەلسەندىلەر بولدى.
«مەملەكەت باسشىمىز قاسىم-جومارت كەمەل ۇلى: «تازالىق – وركەنيەتتى قوعامنىڭ ايناسى, دامۋعا ۇمتىلعان كەز كەلگەن ەلدىڭ مىزعىماس ۇستانىمى»,- دەگەن بولاتىن. قورشاعان ورتانى قورعاۋ, ونى كۇتىپ ۇستاۋ تەك مەملەكەتتىڭ عانا ەمەس, ءار ازاماتتىڭ مىندەتى جانە قوعامنىڭ ورتاق نەگىزگى قۇندىلىقتاردىڭ ءبىرى بولۋى ءتيىس. وڭىرىمىزدە سانيتارلىق تازالىق, اباتتاندىرۋ, تۇرعىنداردىڭ ءومىر سۇرۋىنە قولايلى جاعداي جاساۋ باعىتىندا كەشەندى جۇمىستار قارقىندى جۇرۋدە. قىزىلوردا قالاسىنداعى ورتالىق الاڭ, قالالىق مادەني-دەمالىس پاركى جانە قورقىت اتا سكۆەرى, بۇگىنگى شارامىز ءوتىپ جاتقان بوتانيكالىق ساياباق قايتا جاڭعىرتىلىپ, پايدالانۋعا بەرىلدى. وڭىرىمىزدە ديزاين كود بەكىتىلىپ, وبلىس ورتالىعىنان باستاپ بارلىق ەلدى مەكەندەر بىرەگەي ارحيتەكتۋرالىق تالاپتارعا سايكەستەندىرىلدى. وبلىس ورتالىعىنداعى 80-نەن اسا ەسكى كوپقاباتتى تۇرعىن ءۇيدىڭ قاسبەتتەرى زاماناۋي پانەلمەن قاپتالدى. بيىل دا بۇل جۇمىستار جالعاسىن تاۋىپ, قوسىمشا 21 تۇرعىن ءۇي جاڭعىرتۋدان وتۋدە», دەدى ايماق باسشىسى.
ءىس-شارادا قورشاعان ورتانى قورعاۋعا جانە تازالىق جۇمىستارىن تۇراقتى جۇرگىزۋگە ۇلەس قوسقان 100 قىزمەتكەر ماراپاتتالدى. ەكولوگيالىق ينفراقۇرىلىمدى نىعايتۋ ماقساتىندا سالالىق مەكەمەلەرگە 26 ارنايى تەحنيكا تابىستالدى. ونىڭ ىشىندە قالدىق تاسىمالداۋشى كولىكتەر, ءورت ءسوندىرۋ تەحنيكالارى, تراكتورلار جانە كىشى ءورت ءسوندىرۋ كەشەندەرى بار.
بوتانيكالىق ساياباق اۋماعى كوگالداندىرىلىپ, 500 ءتۇپ قىلقان جاپىراقتى اعاش وتىرعىزىلدى. بۇل جۇمىستار ءوڭىردى جاسىل جەلەككە بولەۋگە, اۋا ساپاسىن جاقسارتۋعا جانە قالا تۇرعىندارى ءۇشىن قولايلى ەكولوگيالىق ورتا قالىپتاستىرۋعا باعىتتالدى.
«تازا قازاقستان» باعدارلاماسى شەڭبەرىندە وبلىستىڭ بارلىق ەلدى مەكەنىندە ءبىر مەزگىلدە اۋقىمدى سەنبىلىك جانە اباتتاندىرۋ جۇمىستارى ۇيىمداستىرىلدى.
وبلىس اكىمى بوتانيكالىق باق اۋماعىندا ورنالاسقان قورقىت اتا اتىنداعى قىزىلوردا ۋنيۆەرسيتەتىنىڭ باستاماسىمەن قولعا الىنعان جىلىجاي جۇمىسىمەن تانىسىپ, وقىتۋشىلارىمەن پىكىر الماستى. جىلىجايدا كوكونىس وسىرىلەدى.
ايتا كەتۋ كەرەك, جىل باسىنان بەرى وڭىردەگى ەكولوگيالىق شارالارعا 121 992 ادام, ياعني ەرىكتىلەر, قوعام قايراتكەرلەرى, بيۋدجەت سالاسىنىڭ جانە كاسىپورىن قىزمەتكەرلەرى بەلسەنە قاتىستى.
وسى ۋاقىت ارالىعىندا 3 030 تونناعا جۋىق تۇرمىستىق قالدىق شىعارىلىپ, 3 367 سكۆەر مەن پارك, 256 تاريحي-مادەني ەسكەرتكىش, 1 019 الەۋمەتتىك نىسان, 669 ونەركاسىپ جانە بيزنەس نىسانى, 210 سۋ وبەكتىسى جانە 5 383 كوشە بويى تازارتىلدى. بۇل جۇمىستارعا 548 ارنايى تەحنيكا جۇمىلدىرىلدى.
سونىمەن قاتار, جىل باسىنان بەرى وبلىس اۋماعىنا جەرگىلىكتى كليماتقا بەيىمدەلگەن 88 567 ءتۇپ اعاش كوشەتى وتىرعىزىلدى. ولاردىڭ قاتارىندا قاراعاش, تەرەك, سىر تالى جانە باسقا دا كوشەت تۇرلەرى بار.
بۇگىنگى اكتسيا – وڭىردەگى ەكولوگيالىق مادەنيەتتى دامىتۋعا, تابيعاتتى قورعاۋدى جۇيەلى جولعا قويۋعا جانە تۇرعىنداردىڭ قورشاعان ورتاعا دەگەن جاۋاپكەرشىلىگىن ارتتىرۋعا باعىتتالعان ماڭىزدى باستاما.