يندونەزيادا جەكسەنبى كۇنى راداردان جوعالىپ كەتكەن «Tringana Air Service» اۆياكومپانياسى ۇشاعىنىڭ سىنىقتارى تابىلدى. بۇل جونىندە «رەيتەر» اگەنتتىگى ەلدىڭ كولىك مينيسترلىگى وكىلىنىڭ ايتقاندارىنا سىلتەمە جاساي وتىرىپ حابارلادى.
اۋە كەمەسىنىڭ سىنىقتارى تاپۋا پروۆينتسياسىنداعى وكتابە وكرۋگىنىڭ اۋماعىندا تابىلعان. ۇشاقتىڭ بورتىندا 49 جولاۋشى جانە بەس ەكيپاج مۇشەسى بولعان. كەيبىر مالىمەتتەرگە قاراعاندا, اۋە كەمەسى وكسيبيل قالاسىنان شامامەن 25 شاقىرىمداي جەردەگى تاۋعا سوعىلعان سياقتى. بۇل قالا جاڭا گۆينەيا ارالىنىڭ اۋماعىندا ورنالاسقان. يندونەزيا كولىك مينيسترلىگى وكىلىنىڭ ايتۋىنشا, ۇشاق بورتىمەن بايلانىس اۋەجايدان ۇشىپ شىققاننان 33 مينۋت وتكەندە ۇزىلگەن. ال رەيستىڭ ۇشۋ ۇزاقتىعى ءبىر ساعات شاماسىندا.
پاراقوردىڭ اقشاسىن ساناۋعا 24 ساعات جۇمسالدى
ءۇندىستاننىڭ باتىس بەنگاليا شتاتىندا ءبىر شەنەۋنىكتىڭ پارا رەتىندە العان اقشانى ساناۋعا پوليتسەيلەر ءبىر كۇن ۋاقىتىن جۇمساپتى. مۇنى وسى ەل تەلەارناسى حابارلادى.
تەلەارنانىڭ حابارى بويىنشا, قۇقىق قورعاۋ ورگاندارىنىڭ قىزمەتكەرلەرى الگى شەنەۋنىكتىڭ بەللي قالاسىنداعى ۇيىنەن 200 ميلليون (3 ميلليون دوللاردان استام) رۋپي تاۋىپتى. ول اقشا ەدەنگە توسەلگەن پليتانىڭ استىنا, شكاف پەن ماتراستارعا, ديۆانعا, جۋىناتىن بولمەگە, تاعى باسقا جەرلەرگە جاسىرىلعان ەكەن. وسى اقشالاردى ساناپ شىعۋعا ءۇش ەسەپتەگىش ماشينا قولدانىلعان, ال اقشانى ساناۋعا 24 ساعات ۋاقىت كەتكەن. جەمقوردىڭ اتى-ءجونى – پرانابۋ ادحيكاري. ول 25 جىل بويى قۇرىلىس سالۋعا رۇقسات بەرەتىن مەكەمەدە ىستەپ كەلگەن ءارى وسىعان جاۋاپتى بولعان.
اۆياسوققىدان بەيبىت تۇرعىندار قازا تاپتى
سيريانىڭ اسكەري اۋە كۇشتەرى داماسك قالاسىنان 15 شاقىرىمداي قاشىقتىققا ورىن تەپكەن دۋما قالاسىنداعى بازاردى اتقىلادى. سونىڭ سالدارىنان 80 بەيبىت تۇرعىن قۇربان بولىپ, 200-دەن استام ادام جاراقات الدى.
سيريانىڭ ادام قۇقىعى جونىندەگى وكىلىنىڭ ايتۋىنشا, يسترەبيتەلدەردەن بازارعا قاراي كەم دەگەندە ون زىمىران جىبەرىلگەن. سوققى بەرۋ وقيعا بولعان جەرگە قۇتقارۋشىلار كەلگەن كەزدە دە جالعاسقان. جەرگىلىكتى تۇرعىندار بازارداعى ساۋدا الاڭدارىنىڭ بارلىعى تۇگەلدەي قيراعانىن ايتادى. ال «رەيتەر» اقپارات اگەنتتىگى سيريا ارمياسىنىڭ بۇل وپەراتسياسى ەل پرەزيدەنتى باشار اسادتىڭ رەجىمىنە قارسى توپتاردى جويۋ ءۇشىن بەرىلگەن سوققى ەكەندىگىن كەلتىرەدى. ويتكەنى, 15 تامىزدا Islam Army توپتارىنىڭ سودىرلارى ۇكىمەتتىك اسكەردىڭ پوزيتسياسىنا شابۋىل جاساعان ەكەن.
قىسقا قايىرىپ ايتقاندا:
ءۇندىستان پرەمەر-ءمينيسترى نارەندرا مودي بىرىككەن اراب امىرلىكتەرىنە رەسمي ساپارمەن باردى. بۇل وسى ەل ۇكىمەتىنىڭ 34 جىلدان كەيىنگى ءباا-گە جاساعان العاشقى ساپارى بولىپ تابىلادى.
سولتۇستىك كورەيا بيلىگى اقش پەن وڭتۇستىك كورەيا بىرلەسكەن وقۋلارىنا «بەلگىسىز قارۋمەن» جاۋاپ بەرەتىنى جونىندە قوقان-لوقى كورسەتتى. «قحدر حالقى مەن اسكەرى بۇرىنعىداي وسال ەمەس», – دەدى وسى جونىندە قورعانىس كوميتەتىنىڭ وكىلى.
يراكتىڭ پرەمەر-ءمينيسترى حەيدار ءال-ابادي جوعارى مەملەكەتتىك لاۋازىمداردى قىسقارتۋ جانە بىرقاتار مينيسترلىكتەردى بىرىكتىرۋ تۋرالى جارلىق شىعاردى. وسىعان بايلانىستى مينيسترلىكتەر سانى 33-تەن 22-گە قىسقارتىلادى.
مىسىر پرەزيدەنتى ابدەل فاتتاح سيسي ەلدە تەررورشىلدىققا قارسى شارالاردى كۇشەيتۋ تۋرالى زاڭدى ماقۇلدادى. اتالعان قۇجاتقا سايكەس تەررورشىل ۇيىمعا جەتەكشىلىك ەتكەن ادام ءومىر بويى باس بوستاندىعىنان ايىرىلادى.
تانىمال اكتەردىڭ نەمەرەسىن ءولتىرىپ كەتتى
نيۋ-يورك قالاسىندا تانىمال اكتەر مورگان فريمەننىڭ نەمەرەسى يدەن ءحاينستى ءولتىرىپ كەتتى. «اسسوشەيتەد پرەسس» اگەنتتىگىنىڭ حابارلاۋىنشا, قايعىلى وقيعا قالانىڭ ەڭ كورىكتى اۋدانى مانحەتتەندە بولعان.
وتىز ءۇش جاستاعى ي.حاينسكە بەلگىسىز بىرەۋ كەۋدە تۇسىنان بىرنەشە رەت پىشاق سىلتەگەن. اۋرۋحاناعا جەتكىزىلگەنىمەن, اۋىر جاراقات العان ول قايتىس بولدى. وقيعا بولعان جەرگە شۇعىل جەتكەن پوليتسەيلەر زارداپ شەككەن ءحاينستىڭ جانىندا تۇرعان وتىزدار شاماسىنداعى ەر ادامدى ۇستادى. پوليتسەيلەر بۇرىن ونىڭ جۇيكەسى سىر بەرگەنىن انىقتاعان.
1,5 ساعاتتا 70 قاپ كارتوپ جينادى
بەلارۋس پرەزيدەنتى الەكساندر لۋكاشەنكو جەكسەنبى كۇنگى دەمالىسىنىڭ ءبىر بولىگىن ءوزىنىڭ رەزيدەنتسياسىندا كوكونىس ونىمدەرىن جيناۋعا جۇمسادى. ونىمەن بىرگە كىشى ۇلى نيكولاي دا ەڭبەك ەتتى, دەپ حابارلادى پرەزيدەنتتىڭ ءباسپاسوز قىزمەتى.
ون سەگىز سوتىق ۋچاسكەگە ەگىلگەن كارتوپتى ولار 1,5 ساعات ءىشىندە جيناپ ۇلگەرگەن. جينالعان ءونىم 70 قاپتى قۇراپتى. ءباسپاسوز قىزمەتى تاراتقان حابارلامادا جينالعان ونىمدەردىڭ بارلىعى جاقىن كۇندەرى بالالار ۇيلەرى مەن قارتتار ۇيلەرىنە بەرىلەتىنى اتالعان. مەملەكەت باسشىسىنىڭ رەزيدەنتسياسىندا جەكسەنبى كۇنى, سونداي-اق, باقشا داقىلدارى – قاربىز بەن قاۋىندى جيناۋ باستالعان. ال ساباعىنان ءۇزىلىپ الىنعان العاشقى قاربىزدىڭ ءدامىن تاتۋ ءراسىمى القاپتىڭ وزىندە بولعان ەكەن.
50 سايتتىڭ جۇمىسىنا توسقاۋىل قويىلدى
قىتاي بيلىگى وسى ەلدىڭ كيبەركەڭىستىك اكىمشىلىگىنىڭ تالابى بويىنشا 50 سايتتىڭ جۇمىسىنا توسقاۋىل قويدى. بۇعان ينتەرنەتتە تيانتسزيندەگى جارىلىستىڭ سالدارى جونىندە انىق ەمەس اقپاراتتاردى تاراتۋ سەبەپ بولعان.
قازىرگى كەزدە قاداعالاۋشى ورگان 18 سايتتىڭ جۇمىسىن توقتاتتى جانە ليتسەنزياسىنان ايىردى. ەندى تاعى 32 پورتالدىڭ قىزمەتى توقتاتىلادى. ويتكەنى, ولار جارىلىستان قۇربان بولعاندار سانى تۋرالى ناقتىلانباعان اقپاراتتى تاراتقان جانە وڭىردە تارتىپسىزدىكتەر مەن توناۋشىلىق ورىن الدى دەگەن جالعان فاكتىلەر كەلتىرگەن. بۇل جاعدايدى ادەيى ۋشىقتىرۋ بولىپ تابىلادى. سوڭعى مالىمەتتەرگە قاراعاندا, اپاتتان 112 ادام قازا تاپقان, 95 ادام ءىز-ءتۇزسىز كەتكەندەردىڭ قاتارىندا.
ينتەرنەت ماتەريالدارى نەگىزىندە ازىرلەندى.