مەديتسيناداعى العاشقى قازاقشا سايت

قازاق ونكولوگيا جانە راديولوگيا عىلىمي-زەرتتەۋ ينستيتۋتىندا www.asylana.kz اقپاراتتىق پورتالىنىڭ تۇساۋ­كەسەرى ءوتتى. بۇل ءسۇت بەزىنىڭ قاتەرلى ىسىگىنە ارنالعان قازاق تىلىندەگى العاشقى سايت. بۇگىنگى تاڭدا ءسۇت بەزى قاتەرلى ىسىگى ونكولوگيالىق اۋرۋلار اراسىندا ءبىرىنشى جانە ءولىم-ءجىتىم بويىنشا ءتورتىنشى ورىندا تۇر. قازىر قازاقستاندا 25 مىڭ ايەل ءسۇت بەزى قاتەرلى ىسىگىنە شالدىققاندار تىزىمىنە الىنعان. بۇعان قوسا, جىل سايىن 3500 ايەلدەن ءسۇت بەزىنىڭ قاتەرلى ىسىگى انىقتالادى. جانە ءبىر جىلدا 1400 ايەل وسى دەرتتەن كوز جۇمادى. سوڭعى بەس جىلداعى كورسەتكىش بويىنشا قازاقستانداعى ءسۇت بەزى قاتەرلى ىسىگىنە شالدىققان ايەلدەردىڭ ءومىر ءسۇرۋ ۇزاقتىعى 51,4 پايىز, ياعني مۇنداي دەرتكە شالدىققان ايەلدەردىڭ تەك جارتىسى عانا بەس جىلدان ارتىق ءومىر سۇرەدى. ال, اقش-تا بۇل كورسەتكىش – 89,2, ال ۇلىبريتانيادا 86,6 پايىزعا تەڭ. مىنە, بۇل كورسەتكىشتەرگە قازاقستاندىقتاردىڭ دا جەتۋى ءۇشىن ءسۇت بەزىنىڭ قاتەرلى ىسىگىن ەرتە ساتىسىندا انىقتاۋ, ەمدەلۋ كۋرسىن ەرتە باستاۋ اسەر ەتەرى ءسوزسىز. وسى رەتتە «اسىل انا» جوباسى تۇرعىنداردى ومىراۋدىڭ قاتەرلى ىسىگى تۋرالى اقپاراتتاندىرۋدا ما­ڭىزدى ءرول اتقارماق. ءدال وسى ماق­ساتپەن  اشىلعان سايت قازىرگى تاڭدا 5 مىڭعا جۋىق وقىر­مان جيناپ ۇلگەردى. بۇل مەديتسينا ما­مان­دارىنىڭ قازاق تىلىندە جاساعان العاشقى جوباسى. قازاق ونكولوگيا جانە راديو­لوگيا عزي ارنايى كەڭەس بەرۋ-دياگنوستي­كا­لىق ءبولىمىنىڭ جەتەكشىسى, مەديتسينا عىلىمدارى­نىڭ دوكتورى الما جىل­قاي­داروۆانىڭ ايتۋىنشا, مۇندا وقىرمان ءۇشىن ءبارى بار: قاتەرلى ىسىكپەن كۇرەستە جەڭىسكە جەتكەندەردىڭ قۋانىشقا تولى جازباسى, ناۋقاستاردىڭ تاعدىرلى حاتى, ءجۇرىپ وتكەن جولى, وزگەلەرگە رۋح سىيلاپ, كۇرەسۋ ءۇشىن كۇش بەرەتىن وقيعالار ت.ت. ءارى وقىرماندار ءبىر-بىرىمەن پىكىر الماسا الادى. ال «اسىل انا» جوباسى قالاي دۇنيەگە كەلدى دەسەك, 2012 جىلى دەنساۋلىق ساقتاۋ مينيسترلىگى مەن «قازاق ونكولوگتارى مەن راديولوگتارى» قوعامدىق بىرلەستىگى «سانوفي» كومپانياسىنىڭ قارجىلىق قولداۋىمەن ەلىمىزدەگى ءسۇت بەزى قاتەرلى ىسىگىنىڭ كەڭ تارالۋىنا قارسى كۇرەسۋ ءۇشىن «اسىل انا» جوباسىن قولعا العان بولاتىن. ءبىر ايتا كەتەرلىگى, «سانوفي» كومپانياسى قاشاندا الەۋمەتتىك جوبالارعا ءجيى قاتىسىپ, ءوز تاراپتارىنان قولداۋ كورسەتىپ وتىرادى. – ۇستانعان باعىتىمىز ناۋ­قاستارعا مەديتسينالىق قىز­مەت­تەردىڭ قولجەتىمدى بولۋىن قامتاماسىز ەتۋ, – دەدى قازاق­ستان­داعى سانوفي كومپانياسى تۇپنۇسقا پرەپاراتتار دايىنداۋ دەپارتامەنتىنىڭ ديرەكتورى ناتاليا جاقسىبەكوۆا. – ال ول ءۇشىن بۇل سالاعا قاتىستى تاراپتاردىڭ ءوزارا ارىپتەستىك قارىم-قاتىناس ورناتۋى ماڭىز­دى. مىنە, «اسىل انا» جوباسى ءدال وسىنداي بايلا­نىسقا جول اشىپ, ناۋقاستار مەن ءدارى­گەر­لەر قاۋىمداستىعى, دەنساۋ­لىق ساق­تاۋ ۇيىمدارى جانە فارما­تسەۆت­يكالىق كومپانيالار اراسىندا كوپىر ورناتتى. جاڭا سايت حالىقتىڭ ءسۇت بەزى قاتەرلى ىسىگى تۋرالى ساۋاتىن كوتەرىپ, ونىڭ سەبەپتەرى مەن ەمدەۋ تاسىلدەرى, جولدارى جانە دياگنوستيكاسى تۋرالى اقپارات بەرۋدى ماقسات ەتەدى. www.asylana.kz سايتىنان وقىرمان كەز كەلگەن ۋاقىتتا تۇراقتى تەكسەرىلۋ, ماستوپاتيا دياگنوستيكاسى جانە ءسۇت بەزى قاتەرلى ىسىگىن ەمدەۋ جونىندە پايدالى ءارى تولىق اقپارات تابا الادى. سايتتى جاساۋ جۇمىستارىنا ونكولوگيا جانە راديولوگيا سالاسىنىڭ ۇزدىك ماماندارى اتسالىستى. سايتتى جاساۋشىلار بۇل جوبانىڭ حالىق سۇرانىسىنا يە بولىپ, كەز كەلگەن ناۋقاستىڭ ەڭ سەنىمدى دوسىنا, كومەكشىسىنە اينالارىنان ءۇمىتتى. – جالپى, قاتەرلى ىسىك تۋرالى بىلگىسى كەلەتىندەر كوپ. اسىرەسە, قازاق تىلىندە. ءسۇت بەزى قاتەرلى ىسىگى تۋرالى اقپاراتتى بىرەۋ بىلسە, ەكىنشىسى بىلمەيدى. ايەلدەر اراسىندا «ءسۇت بەزى قاتەرلى ىسىگىن تۇبەگەيلى ەمدەۋگە بولا ما؟ ەمدەۋ تاسىلدەرى زيان ەمەس پە؟» دەگەن سۇراقتار ءبىرىنشى ورىندا تۇرادى. ال  وقىرماندار وزدەرىن مازالاعان سۇراقتارعا ناقتى جاۋ­اپ الادى. جالپى, بۇدان وزگە دە كەۋدە قاتەرلى ىسىگىنە قاتىستى ساۋالدارعا جاۋاپ وسى سايتتا جازىلعان. بۇل سايتتىڭ تۇراقتى وقىرماندارى ەرتە تەكسەرىلۋدەن ءوتۋدىڭ ماڭىزىن تۇسىنەدى. ال بۇل ءبىر ادامدى بولسىن قاتەرلى ىسىكتەن قۇتقارىپ قالۋعا مۇمكىندىك بەرەدى. ەڭ باستىسى, ءسۇت بەزى قاتەرلى ىسىگىن العاشقى ساتىسىندا انىقتاۋ ادام ءومىرىن ساقتاپ قالۋ مۇمكىندىگىن كوبەيتەدى, – دەدى قازاق ونكولوگيا جانە راديولوگيا عزي ءباسپاسوز ورتالىعىنىڭ جەتەكشىسى ايگەرىم اعىلتاەۆا. سونداي-اق, تۇساۋكەسەر ءراسى­مىندە ينستيتۋت ماماندارى مەن وكىلدەرى ءسۇت بەزى قاتەرلى ىسىگى­نىڭ سكرينينگى مەن ونكۇندىك ءناتي­جەلەرىنە توقتالىپ, ستاتيس­تيكالىق ەسەپتەرىمەن ءبولىستى. قازاقستاندا ءسۇت بەزى قاتەر­لى ىسىگىن ەمدەۋ تەگىن. ال نەگىزگى كەدەرگى – ايەلدەردىڭ ءوز دەنساۋ­لىعىنا سالعىرت قاراپ, سكرينينگتەن وتپەۋى نەمەسە وتە كەش تەكسەرىلۋى. ال ول كەزدە ناۋقاسقا كومەكتەسۋ مۇمكىندىگى تومەندەيدى. ەلىمىزدە 2008 جىلدان بەرى ءسۇت بەزى قاتەرلى ىسىگىن ەرتە ساتىسىندا انىقتاۋ ماقساتىندا 50 مەن 60 جاس ارالىعىنداعى ايەلدەرگە ارنالعان باعدارلاما جۇزەگە اسىرىلىپ كەلەدى. سونىمەن بىرگە, جيىندا «ءسۇت بەزى قاتەرلى ىسىگىمەن بىرگە كۇرەسەيىك!» باعدارلاماسى اياسىندا وتەتىن شارالار تۋرالى ايتىلدى. گۇلزەينەپ سادىرقىزى, «ەگەمەن قازاقستان».