قۇدىق تۇبىندەگى ءبىر قاپ سنارياد

قاراعاندى وبلىسىنداعى پريشاح­تينسك ەلدى مەكەنىندە تۇراتىن سۇلتانبەك ەسىمدى بوزبالا قۇدىقتىڭ تۇبىندە جاتقان ءبىر قاپ سناريادتى تاۋىپ الدى. نە ىستەرىن بىلمەگەن جاس جىگىت ونى سۋرەتكە ءتۇسىرىپ, عالامتورعا سالعان. «مۇن­داي جاعدايدا نە ىستەۋ كەرەك؟», – دەپ جەرلەستەرىنەن اقىل-كەڭەس سۇراعان ءتۇرى عوي. ول ول ما, بۇدان كەيىن سۇلتانبەك قۇدىقتىڭ ىشىندەگى الگى سناريادتاردى سىرتقا شىعارىپ, ۇيىنە الىپ كەلگەن. اناسى ۇرسىپ, العان جەرىڭە اپارىپ تاستا دەگەن سوڭ, سناريادتاردى ءۇيدىڭ جانىنا قويا سالىپتى. ءتۇنى بويى سول جەردە جاتقان جويقىن وقتىڭ ەكەۋىن بەلگىسىز بىرەۋلەر ۇرلاپ تا كەتىپتى. عالامتورعا سۋرەتتەر جارق ەتىپ جاريالانىسىمەن قۇتقارۋشىلار مەن ءورت سوندىرۋشىلەر جانە پوليتسيا قىزمەتكەرلەرى رۋدنيچنايا كوشەسىنە جەدەل جەتىپ, سۇلتانبەكتىڭ ءۇيىنىڭ ماڭىن ءتىرى جان وتپەستەي قورشاپ تاستاعان. سودان, ساپەرلەر كەلىپ, زەڭبىرەكتىڭ وعىن زيان كەلتىرمەيتىندەي ەتكەننەن كەيىن عانا كوشە كۇندەلىكتى كەيپىنە ەنەدى. شىنىندا دا, قاپ ىشىندەگى بەس سنا­ريادتىڭ كەز كەلگەن ۋاقىتتا جارىلىپ كەتۋى عاجاپ ەمەس ەدى... قايرات ءابىلدينوۆ, «ەگەمەن قازاقستان». قاراعاندى.