جامبىل وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسىنىڭ ۇيىمداستىرۋىمەن انالار كۇنىنە وراي «جۇرەك كوزىمەن كورەتىن انا» اتتى ينكليۋزيۆتى بايقاۋ ءوتتى. اتالعان شارانىڭ باستى ماقساتى – كورۋ قابىلەتى شەكتەۋلى انالاردىڭ قوعامداعى ورنىن ايقىنداپ, ولاردىڭ ومىرگە دەگەن قۇشتارلىعىن, شىعارماشىلىق قابىلەتتەرىن جانە انالىق مەيىرىمىن كوپشىلىككە تانىتۋ بولدى. كەش شەرحان مۇرتازا اتىنداعى «رۋحانيات جانە تاريحتانۋ» ورتالىعىندا ۇيىمداستىرىلىپ, ەرەكشە جاندارعا قۇرمەت پەن قولداۋ كورسەتۋدى كوزدەگەن تاعىلىمدى باسقوسۋعا اينالدى, دەپ حابارلايدى Egemen.kz.
ءىس-شارا بارىسىندا قاتىسۋشى انالار وزدەرىنىڭ ونەرىن, تاپقىرلىعىن, ومىرلىك ۇستانىمدارىن ورتاعا سالىپ, كورەرمەندەرگە ەرەكشە اسەر سىيلادى.
ينكليۋزيۆتى كەش ءتورت كەزەڭنەن تۇردى. العاشقى «مەن – باقىتتى انامىن» كەزەڭىندە قاتىسۋشىلار وزدەرىن تانىستىرىپ, وتباسى, انا باقىتى جانە ومىرلىك كوزقاراستارى تۋرالى جۇرەكجاردى اڭگىمەلەرىن ءبولىستى. «انانىڭ قولى ءبارىن ەسكە الادى» اتتى تاكتيلدى كەزەڭدە انالار سيپاپ سەزۋ ارقىلى ءتۇرلى زاتتاردى انىقتاپ, سەزىمتالدىق پەن زەرەكتىكتەرىن كورسەتتى. ال «ونەرمەن ورىلگەن ءومىر» بولىمىندە ءان ايتىپ, ولەڭ وقىپ, شىعارماشىلىق قىرلارىن پاش ەتتى.
قالامگەر ەسبولات ايدابوسىن «مەتسەنات» بايقاۋىنىڭ جەڭىمپازى اتاندى
سوڭعى «سيپاپ ايتىلعان بەسىك جىرى» كەزەڭىندە ۇلتتىق ناقىشتاعى بەسىك جىرلارىن ورىنداپ, انا جۇرەگىنىڭ مەيىرىمى مەن قازاقى تاربيەنىڭ قۇندىلىعىن دارىپتەدى. بايقاۋعا قاتىسقان انالاردىڭ ارقايسىسى ومىرگە دەگەن جىگەرىمەن, ونەرىمەن جانە توزىمدىلىگىمەن كوپشىلىككە ۇلگى بولدى. قاتىسۋشىلار اراسىندا بايزاق, مەركى, جامبىل اۋداندارىنان جانە تاراز قالاسىنان كەلگەن وقىرماندار ءوز باقتارىن سىنادى. كەش بارىسىندا اندەر ورىندالىپ, كورەرمەندەرگە كوتەرىڭكى كوڭىل-كۇي سىيلادى. سونىمەن قاتار قاتىسۋشىلاردىڭ ونەرىن ارنايى قازىلار القاسى باعالاپ, بايقاۋ قورىتىندىسى بويىنشا ءتۇرلى نوميناتسيالار تابىستالدى. اتاپ ايتقاندا, «ەڭ سەزىمتال انا» وڭعارباەۆا قولقانات l-توپ كوز مۇگەدەگى, تاراز قالاسى,«ەڭ ونەرلى انا» تايشىبەكوۆا قارلىعا ساياقبايقىزى ll-توپ كوز مۇگەدەگى, بايزاق اۋدانى «ەڭ شەبەر انا» شوپشەكوۆا قۇرالاي بەكبولاتقىزى l-توپ كوز مۇگەدەگى جانە جامبىل اۋدانى جانە «كورەرمەن كوزايىمى» تولەباەۆا كاميلا l-توپ كوز مۇگەدەگى, مەركى اۋدانى.
كەلگەن ءار قاتىسۋشىلاردىڭ اراسىنان جەڭىمپازدار انىقتالىپ, ديپلومدار مەن ەستەلىك سىيلىقتارمەن ماراپاتتالدى. اتالعان مادەني شارا ەرەكشە جانداردىڭ قوعام ومىرىنە بەلسەندى ارالاسۋىنا مۇمكىندىك بەرىپ قانا قويماي, ينكليۋزيۆتى مادەنيەتتىڭ دامۋىنا, ادامگەرشىلىك پەن رۋحاني قۇندىلىقتاردىڭ ارتۋىنا زور ۇلەس قوستى. «جۇرەك كوزىمەن كورەتىن انا» كەشى انانىڭ مەيىرىمى مەن جۇرەك جىلۋى كوزبەن ەمەس, جۇرەكپەن سەزىلەتىنىن تاعى ءبىر مارتە دالەلدەگەن تاعىلىمى مول رۋحاني كەش بولدى.
«ۇلتتىق كىتاپ» رەسپۋبليكالىق بايقاۋىنىڭ جەڭىمپازدارى ماراپاتتالدى