وڭىردە «بالالارعا بىرلەسىپ كومەكتەسەيىك!» ۇرانىمەن ءوتىپ جاتقان «مەكتەپكە جول» جالپى رەسپۋبليكالىق اكتسياسىنىڭ ءوتۋى جايلى سۇراعانىمىزدا وبلىستىق ءبىلىم باسقارماسىنىڭ كامەلەتتىك جاسقا تولماعاندار, جەتىم جانە اتا-اناسىنىڭ قامقورلىعىنسىز قالعان بالالاردىڭ قۇقىقتارىن قورعاۋ ءبولىمىنىڭ باس مامانى ايگۇل وسپانوۆا بىلاي جاۋاپ بەردى:
– جاڭا وقۋ جىلىندا 70 مىڭنان استام وقۋشى ءوز بىلىمدەرىن ودان ءارى جالعاستىرادى. ولاردىڭ 9 مىڭعا جۋىعى تۇرمىسى تومەن جانە كوپ بالالى وتباسىلاردان بولسا, 700-دەيى جەتىم جانە اتا-انانىڭ قامقورلىعىنسىز قالعاندار ساناتىنان.
كەشەندى جۇرگىزىلگەن رەيدتەر كەزىندە ىشكى ىستەر بولىمدەرىندە ەسەپتە تۇرعان اتا-انالاردىڭ بالالارىنا باسا نازار اۋدارىلىپ, مەكتەپكە بارۋدان باس تارتقان 10 وقۋشى انىقتالدى. ولاردى قالتالى ازاماتتار كەڭسە تاۋارلارىمەن, سپورت كيىمدەرىمەن قامتاماسىز ەتتى. ءار اۋدان بويىنشا از قامتىلعان وتباسىلاردىڭ سانى بەلگىلەنىپ, شارۋاشىلىقتارعا بەكىتىلىپ بەرىلدى. ءبىرىنشى قىركۇيەككە دەيىن 4500 وقۋشىعا جەرگىلىكتى قازىنا, 7600 وقۋشىعا بيۋدجەتتەن تىس كىرىس ەسەبىنەن 50 ميلليون تەڭگەنىڭ كومەگىن بەرۋ جوسپارلانعان. وبلىس اكىمىنىڭ ورىنباسارى انارحان دۇيسەنوۆانىڭ جەتەكشىلىگىمەن وتكەن ۇيىمداستىرۋ كوميتەتىنىڭ تاياۋداعى ماجىلىسىندە قوسىمشا شەشىمدەر قابىلدانىپ, اۋىلدىق جەرلەرگە ەرەكشە كوڭىل ءبولۋ مىندەتتەرى جۇكتەلدى.
«مەكتەپكە جول» اكتسياسى اياسىنداعى جاقسى باستامالار جان-جاقتى قولداۋ تاۋىپ كەلەدى. سولاردىڭ بىرىنە پەتروپاۆل قالاسىنىڭ اكىمى مارات تاسماعامبەتوۆتىڭ ساۆەلەۆتەر وتباسىنا 70 مىڭ تەڭگەنىڭ ماتەريالدىق قول ۇشىن بەرگەنىن ايتۋعا بولادى. تىلدەردى دامىتۋ, مال دارىگەرلىك, تابيعات رەسۋرستارى جانە تابيعات رەتتەۋ باسقارمالارى دا وزدەرى قامقورلىققا العان وقۋشىلارعا كەڭسە تاۋارلارىن جەتكىلىكتى تۇردە ساتىپ اپەردى. مۇنداي مىسالدار كوپ. شارانىڭ العاشقى كەزەڭىندە تۇرمىسى تومەن وتباسىلاردىڭ 171 بالاسىنا 791 مىڭ تەڭگەنىڭ ماتەريالدىق كومەگى بەرىلدى.
وزەكتى ماسەلەلەردىڭ ءبىرى – قاجەتتى وقۋلىقتارمەن, وقۋ قۇرالدارىمەن جەتكىلىكتى قامتۋ. بۇگىندە مەكتەپتەردەن وقۋلىقتارعا قاتىستى وتىنىشتەر قابىلدانىپ, بۇل ماقسات ءۇشىن جەرگىلىكتى قازىنادان 400 ميلليون تەڭگە قاراستىرىلعان. وسىنشا قاراجاتقا جاڭا وقۋلىقتار الىنىپ, تەگىن تاراتىلاتىن بولادى. وتكەن جىلعىداي بيىل دا وقۋشىلاردى وقۋلىقتارمەن تولىق قامتاماسىز ەتۋدىڭ بارلىق مۇمكىندىكتەرى قاراستىرىلعان. بۇل جونىندەگى شارا ءۇش كەزەڭگە ءبولىنىپ – «كىتاپ قورىن تەكسەر!», «مەكتەپ وقۋلىعى», «سىيلىققا – وقۋلىق!» اتاۋلارىن يەلەنگەن. وسىعان وراي ءبىلىم بەرۋ بولىمدەرى بويىنشا كىتاپ قورلارى تەكسەرىلىپ, مونيتورينگ جۇرگىزىلدى. ونىڭ بارىسىندا مەكتەپتەر اراسىندا وقۋ قۇرالدارىمەن الماسۋ جولدارى بەلگىلەندى. سول سياقتى وقۋشىلاردىڭ قولدانىستاعى كىتاپتارىن ۇقىپتاپ ۇستاپ, وزىنەن كەيىنگى ءىنى-قارىنداستارىنا سىيلاۋ, مەكتەپكە جاناشىر دەمەۋشىلەردى, ۇكىمەتتىك ەمەس ۇيىمداردىڭ وكىلدەرىن كەڭىنەن تارتۋ شارالارى كوزدەلگەن.
جاڭا وقۋ جىلىنىڭ العاشقى كۇنى ءبىرىنشى سىنىپ وقۋشىلارىنا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ اتىنان «مەنىڭ وتانىم – قازاقستان» اتتى كىتابى سىيعا تارتىلماق. ءبىلىم كۇنى ەلباسىنىڭ اتىنان تابىستالاتىن بۇل كىتاپقا مەكتەپ تابالدىرىعىن تۇڭعىش اتتاعالى وتىرعان 8 مىڭنان استام سولتۇستىكقازاقستاندىق يە بولادى.
اڭگىمەلەسكەن
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.