اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ 1-كۋرس ستۋدەنتى 8-قاباتتان قۇلاپ, قازا تاپتى. قايعىلى جاعدايدان كەيىن قوعامدا جوعارى وقۋ ورىندارىنداعى پسيحولوگيالىق قىسىم مەن سەسسيا كەزىندەگى باعالاۋ جۇيەسى قىزۋ تالقىلانا باستادى, دەپ حابارلايدى Egemen.kz.
قايعىلى وقيعا 6 مامىر كۇنى تاڭعى ساعات 09:00 شاماسىندا بولعان. مارقۇم «فيلوسوفيا» ماماندىعىندا مەملەكەتتىك گرانت نەگىزىندە ءبىلىم العان. ۋنيۆەرسيتەتتىڭ ءباسپاسوز قىزمەتى ستۋدەنتتىڭ وقۋ ۇلگەرىمى جاقسى بولعانىن ءارى وسى ۋاقىتقا دەيىن تارتىپتىك ەسكەرتۋ الماعانىن مالىمدەدى. سونداي-اق ونىڭ پسيحولوگيالىق قولداۋ قىزمەتىنە جۇگىنبەگەنى ايتىلدى.
18 جاستاعى ستۋدەنتتىڭ ءولىمى: استانادا سوت پروتسەسى باستالدى
وقيعادان كەيىن الەۋمەتتىك جەلىلەردە وقۋ پروتسەسىنە قاتىستى ءتۇرلى پىكىرلەر جاريالاندى. كەيبىر ستۋدەنتتەر وقىتۋشىلار تاراپىنان قىسىم بولاتىنىن ايتىپ, جاسىرىن تۇردە شاعىمدانعان.
«كەيبىر مۇعالىمدەر ساباق ءوتۋدىڭ ورنىنا ءوز ءومىربايانىن ايتىپ كەتەدى», دەپ جازدى ستۋدەنتتەردىڭ ءبىرى.
تاعى ءبىر ستۋدەنت باعالاۋ جۇيەسىنە قاتىستى نارازىلىعىن بىلدىرگەن.
«ساباققا تۇراقتى قاتىسساڭ دا, باعالاۋ كەزىندە ادىلەتسىزدىككە تاپ بولاسىڭ. نەگە تومەن باعا قويعانىن سۇراساڭ, ء«تۇرىڭدى كوپ كورمەپپىن» دەپ جاۋاپ بەرەدى», دەيدى ول.
جەلى قولدانۋشىسى نۇرىم سۇلتانمۇراتتىڭ پىكىرىنشە, قايعىلى جاعدايعا سەسسيا كەزىندەگى شامادان تىس قىسىم اسەر ەتۋى مۇمكىن. ونىڭ ايتۋىنشا, اسىرەسە ورىس ءتىلى پانىنە قاتىستى ستۋدەنتتەردىڭ شاعىمى كوبەيگەن.
«اسپاننان باعا قوياتىن وقىتۋشىلاردىڭ قاجەتى جوق. بۇل جاعدايدى «ۋنيۆەرسيتەتكە قاتىسى جوق» دەپ جابا سالۋعا بولمايدى», دەيدى تاعى ءبىر ستۋدەنت.
ال ۋنيۆەرسيتەت اكىمشىلىگى بۇل ايىپتاۋلاردى جوققا شىعارىپ, وقيعاعا سەسسيانىڭ نەمەسە وقىتۋشىلاردىڭ قاتىسى جوق ەكەنىن مالىمدەدى. ۋنيۆەرسيتەت باسشىلىعى مارقۇمنىڭ وتباسىنا كوڭىل ايتىپ, قاجەتتى كومەك كورسەتىلەتىنىن جەتكىزدى.
پاۆلوداردا 2 ستۋدەنت قاتارلاستارىنان اقشا بوپسالاماق بولعان
قازىر وقيعانىڭ ناقتى سەبەبىن انىقتاۋ ءۇشىن قۇزىرلى ورگاندار تەرگەۋ جۇرگىزىپ جاتىر.
اسىلجان قۇرمانعالي