پرەزيدەنت مەملەكەتتىك ماراپات جانە اسكەري شەن تاپسىرۋ راسىمىندە ءسوز سويلەپ ەگەمەن ەلىمىز قارۋلى كۇشتەرگە زور سەنىم ارتىپ وتىرعانىنا توقتالدى, دەپ حابارلايدى Egemen.kz.
پرەزيدەنتتىڭ ايتۋىنشا, ەلىمىز تمد ىشىندەگى بۇۇ بىتىمگەرلىك ميسسياسىن دەربەس ورىنداۋ مارتەبەسىنە يە بولعان جالعىز مەملەكەت.
«بۇگىندە قازاقستاننىڭ ايبىندى ارمياسى باتىر بابالاردىڭ داڭقتى جولىن لايىقتى جالعاستىرىپ كەلەدى. سايىپقىران ساربازدارىمىز – قاسيەتتى تاۋەلسىزدىگىمىزدىڭ بەرىك قالقانى. ولار ەلىمىزدىڭ تىنىشتىعىن, جەرىمىزدىڭ تۇتاستىعىن قاس قاقپاي كۇزەتىپ تۇر. كۇشتىك قۇرىلىمدار زاڭ ۇستەمدىگىن, قوعامدىق ءتارتىپ پەن ۇلتتىق قاۋىپسىزدىكتى قامتاماسىز ەتۋدە. قۇتقارۋشىلار قاتەردەن قايمىقپاي ازاماتتاردىڭ اماندىعى ءۇشىن تىنىمسىز ەڭبەك ەتىپ ءجۇر. جاۋىنگەرلەرىمىز كۇردەلى مىندەتتەردى تابىستى ورىنداپ, حالىقارالىق تۇراقتىلىقتى نىعايتۋ ىسىنە دە زور ۇلەس قوسۋدا. قازاقستان – بىرىككەن ۇلتتار ۇيىمىنىڭ بىتىمگەرلىك ميسسياسىن دەربەس ورىنداۋ مارتەبەسىنە يە بولعان تاۋەلسىز مەملەكەتتەر دوستاستىعى ىشىندەگى جالعىز مەملەكەت. بۇل الەم ەلدەرىنىڭ قازاق ارمياسىنا دەگەن سەنىمى جوعارى ەكەنىن كورسەتەدى», دەدى مەملەكەت باسشىسى.مەملەكەت باسشىسى: سۇراپىل سوعىستا وتان ءۇشىن وت كەشكەن باتىرلاردىڭ رۋحىنا تاعزىم ەتەمىز
قاسىم-جومارت توقاەۆ ساربازدارىمىز ارنايى جاساقتار مەن كۇشتىك قۇرىلىمدار اراسىنداعى جاھاندىق دودالاردا تاماشا جەتىستىككە قول جەتكىزىپ جۇرگەنىن ايتتى.
«بيىل دۋبايدا وتكەن اۋقىمدى حالىقارالىق جارىسقا ەلىمىزدىڭ بەس كومانداسى قاتىسىپ, جۇلدەمەن ورالدى. بايراقتى باسەكەدە ءبىرىنشى جانە ەكىنشى ورىندى قازاقستان قۇراماسى ەنشىلەدى. اسىرەسە, ايەلدەر اراسىندا توپ جارعان «توميريس» كومانداسىنىڭ قارىم-قابىلەتىنە جاھان جۇرتى ءتانتى بولدى. مۇنىڭ ءبارى دە – رۋحى مىقتى, قاجىر-قايراتى مول, وتان الدىنداعى انتقا ادال ساربازدارىمىزدىڭ ەرەن ەڭبەگىنىڭ جەمىسى ەكەنى ايقىن. مەملەكەت وسىنداي ايبىندى جاۋىنگەرلەرىمىزدى قاشاندا قولدايدى. بۇل – ەڭ الدىمەن, ەل مۇددەسى ءۇشىن, ياعني, ۇلتىمىزدىڭ كەلەشەگى ءۇشىن اسا ماڭىزدى مىندەت», دەدى پرەزيدەنت.