پرەمەر-مينيستر ولجاس بەكتەنوۆتىڭ توراعالىعىمەن ۇكىمەت وتىرىسىندا مەملەكەت باسشىسىنىڭ ەنەرگەتيكالىق ينفراقۇرىلىمدى جاڭعىرتۋ جونىندەگى تاپسىرماسىن ورىنداۋ شەڭبەرىندە وتكەن جىلىتۋ ماۋسىمىنىڭ قورىتىندىسى مەن الداعى جىلۋ بەرۋ ماۋسىمىنا دايىندىق بارىسى قارالدى. جيىندا ەنەرگەتيكا ۆيتسە-ءمينيسترى سۇڭعات ەسىمحانوۆ, KEGOC كومپانياسىنىڭ باسقارما توراعاسى ءنابي ايتجانوۆ, «سامۇرىق-ەنەرگو» كومپانياسىنىڭ باسقارما توراعاسى قايرات ماقسۇتوۆ, سونداي-اق قاراعاندى, ماڭعىستاۋ, باتىس قازاقستان جانە جامبىل وبلىستارىنىڭ اكىمدەرى بايانداما جاسادى, دەپ حابارلايدى Egemen.kz.
پرەمەر-مينيستر وتكەن جىلۋ بەرۋ ماۋسىمى اسا ءبىر قاۋىپتى اپاتتىق جاعدايلارسىز اياقتالعانىن اتاپ ءوتتى. ەلەكتر ستانسالارىنداعى تەحنولوگيالىق بۇزۋشىلىقتار سانى بىلتىرمەن سالىستىرعاندا 15%-عا ازايدى.
17 مىڭ مۆت ەلەكتر ەنەرگياسى ءوندىرىلىپ, تاريحي ەڭ جوعارى دەڭگەيگە قول جەتكىزىلدى. بۇل – وتكەن جىلىتۋ كەزەڭىمەن سالىستىرعاندا 7%-عا جوعارى.
«اتالعان فاكتىلەر وتكەن قىس مەزگىلىنە دايىندىق جۇمىستارىنىڭ ەداۋىر جوعارى بولعانىن بىلدىرەدى مەملەكەت باسشىسى حالىققا جولداۋىندا ەنەرگەتيكالىق ينفراقۇرىلىمدى جانە كوممۋنالدىق شارۋاشىلىقتى جاڭعىرتۋ مىندەتىن قويدى. ء«تاريفتى ينۆەستيتسياعا ايىرباستاۋ» باعدارلاماسى اياسىندا بيىل ەلەكتر ستانسالارىن جوندەۋ جانە جاڭعىرتۋ جۇمىستارىنا شامامەن 384 ملرد تەڭگە قارالعان, بۇل وتكەن جىلمەن سالىستىرعاندا 9%-عا كوپ. سونداي-اق ەلىمىزدىڭ ەنەرگەتيكالىق ينفراقۇرىلىمىن جاڭعىرتۋ جونىندەگى ۇلتتىق جوبا قارقىندى جۇزەگە اسىرىلىپ جاتىر. تەك بيىلدىڭ وزىندە 130 شاقىرىم جىلۋ جەلىلەرى مەن 10,5 مىڭ شاقىرىم ەلەكتر جەلىلەرىن جاڭعىرتۋ جوسپارلانعان. اتالعان شارالار جەلىلەردىڭ توزۋ دەڭگەيىن تيىسىنشە 48 جانە 62%-عا دەيىن تومەندەتۋگە مۇمكىندىك بەرەدى», دەپ اتاپ ءوتتى ولجاس بەكتەنوۆ.
ۇكىمەتتە ءوندىرىستى لوكاليزاتسيالاۋ بويىنشا جاڭا كەلىسىمدەرگە قول قويىلدى
بۇل رەتتە پرەمەر-مينيستر ۆەدومستۆولار مەن اكىمدىكتەردىڭ جوندەۋ جۇمىستارىنىڭ كولەمى مەن ولاردى قارجىلاندىرۋدى قىسقارتۋعا جول بەرمەۋى قاجەتتىگىنە نازار اۋداردى. ءاربىر مۇنداي فاكت بويىنشا مەنشىك يەلەرىنە, سول سياقتى باسقارۋشى كومپانيالارعا قاتىستى شارالار قابىلدانادى. وسىعان بايلانىستى «KEGOC» كومپانياسىنا ەنەرگەتيكا مينيسترلىگىمەن بىرلەسىپ, 25 مامىرعا دەيىن ۇلتتىق ماڭىزى بار ستانسالارعا ارنالعان جابدىقتاردىڭ جۇمىس رەجيمدەرىن بەكىتۋدى تاپسىردى.
سونداي-اق كەلەسى جىلىتۋ ماۋسىمىنا دايىندىقتى قامتاماسىز ەتۋ ءۇشىن وڭىرلەرگە مەملەكەت تاراپىنان بارلىق قاجەتتى قارجىلىق قولداۋ كورسەتىلەتىنىن اتاپ ءوتىلدى. ەنەرگيا كوزدەرى مەن جەلىلىك جابدىقتاردى جوندەۋ جانە اۋىستىرۋ بويىنشا جوسپارلى جۇمىستاردى جالعاستىرۋ قاجەت.
جىلۋ جەلىلەرىن دەر كەزىندە ءارى ساپالى سىناقتان وتكىزۋ كەرەك. بارلىق جۇمىس بەلگىلەنگەن مەرزىمدە جانە تولىق كولەمدە ورىندالۋى ءتيىس.
ۇكىمەت تاراپىنان بارلىق قاجەتتى قولداۋ كورسەتىلەدى. ۇكىمەت رەزەرۆىنەن 25 ملرد تەڭگەدەن استام قارجى ءبولۋ تۋرالى شەشىم ماقۇلداندى. اتالعان قاراجات جەتىسۋ, اباي, اقمولا جانە شىعىس قازاقستان وبلىستارىندا جىلۋ كوزدەرىن جوندەۋ مەن سالۋعا, سونداي-اق ءتورت وڭىردە 30 شاقىرىمعا جۋىق جىلۋ جەلىلەرىن جوندەۋگە باعىتتالدى.
ولجاس بەكتەنوۆ بولىنگەن قاراجاتتىڭ ءتيىمدى جۇمسالۋىن جانە قول جەتكىزىلگەن ناتيجەلەردى باقىلاۋدا ۇستاۋ قاجەت ەكەنىن باسا ايتتى. وڭىرلەردە ەنەرگيا نىساندارىنىڭ دايىندىق پاسپورتتارىن المايتىن جاعدايلار تىركەلەتىن بولسا, وعان ءوڭىر اكىمدەرى تىكەلەي جاۋاپتى بولادى.
ءوڭىر اكىمدىكتەرىنە ەكى اپتا مەرزىمدە بارلىق كونكۋرستىق راسىمدەردى وتكىزىپ, جوندەۋ جۇمىستارىنا ناقتى كىرىسۋ تاپسىرىلدى.
«ەشقانداي باسى ارتىق بيۋروكراتيا بولماۋى كەرەك. جىلۋمەن قامتاماسىز ەتۋ نىساندارىن جوندەۋ جۇمىستارىن تامىز ايىنىڭ سوڭىنان كەشىكتىرمەي اياقتاۋ قاجەت. ونەركاسىپ جانە قۇرىلىس مينيسترلىگى, ءوڭىر اكىمدىكتەرى 1 قىركۇيەككە دەيىن ءبىلىم بەرۋ جانە دەنساۋلىق ساقتاۋ نىساندارىنىڭ تولىعىمەن دايىن بولۋىن قامتاماسىز ەتسىن. سولتۇستىك, ورتالىق جانە شىعىس وڭىرلەردە بارلىق ينجەنەرلىك ينفراقۇرىلىم مەن تۇرعىن ءۇي-كوممۋنالدىق شارۋاشىلىق نىساندارى 15 قىركۇيەككە دەيىن, ال قالعان وڭىرلەردە 15 قازانعا دەيىن تولىق ءازىر بولۋى ءتيىس. اكىمدەرگە جىلۋ نىساندارىنا تۇراقتى نەگىزدە بارىپ, جاعدايدى جەكە باقىلاۋعا الۋدى تاپسىرامىن», دەپ اتاپ ءوتتى پرەمەر-مينيستر.
اكىمدىكتەردە ۇيلەستىرۋ جوق: ۇكىمەت باسشىسى جەرگىلىكتى جەردەگى كەمشىلىكتەردى اتاپ ءوتتى
ەنەرگەتيكا مينيسترلىگىنە كولىك مينيسترلىگىمەن جانە اكىمدىكتەرمەن بىرلەسىپ, 1 قىركۇيەككە دەيىن جىلۋ كوزدەرى مەن تەمىرجول تۇيىقتارىندا وتىن قورىن الدىن الا جيناقتاۋدى قامتاماسىز ەتۋ تاپسىرىلدى.
تاپسىرمالاردىڭ ورىندالۋىن ۇيلەستىرۋ جانە باقىلاۋ پرەمەر-ءمينيستردىڭ ءبىرىنشى ورىنباسارىنا جۇكتەلدى.