قازاقستاندا حالىقارالىق جارىستاردا ەل نامىسىن ابىرويمەن قورعاعان سپورتشىلار مەن ولاردىڭ باپكەرلەرىن قولداۋ جۇيەلى تۇردە جالعاسىپ كەلەدى. وسى باعىتتاعى كەزەكتى قادام سۋردليمپيادا جۇلدەگەرلەرىنە قوماقتى سىياقى تولەۋ بولدى, دەپ جازادى Egemen.kz.
تۋريزم جانە سپورت مينيسترلىگىنىڭ مالىمەتىنشە, ۇكىمەت قاۋلىسىنا سايكەس حالىقارالىق ارەنادا جوعارى ناتيجە كورسەتكەن سپورتشىلار مەن جاتتىقتىرۋشىلاردى ىنتالاندىرۋ ءۇشىن شامامەن 5,5 ملرد تەڭگە ءبولىندى. بۇل قاراجات 2025 جىلى توكيودا وتكەن XXV جازعى سۋردليمپيادادا جۇلدە العان سپورتشىلار مەن ولاردىڭ جاتتىقتىرۋشىلارىن ماراپاتتاۋعا باعىتتالعان. ناتيجەسىندە 32 سپورتشى مەن 42 جاتتىقتىرۋشى سىياقى الدى.
سىياقى مولشەرى قولدانىستاعى زاڭناماعا ساي بەلگىلەنگەن. اتاپ ايتقاندا, التىن مەدال ءۇشىن – 130 ملن تەڭگە, كۇمىس مەدال ءۇشىن – 78 ملن تەڭگە, قولا مەدال ءۇشىن – 39 ملن تەڭگە تولەندى. بۇدان بولەك, 4-6 ورىن العان سپورتشىلارعا 2,5 ملن تەڭگەدەن 15 ملن تەڭگەگە دەيىن قارجىلاي قولداۋ كورسەتىلدى.
فاينا مەيرمانوۆا سۋردليمپيادا رەكوردىن ورناتىپ, چەمپيون اتاندى
اتالعان سۋردليمپياداعا 81 ەلدەن شامامەن 3 مىڭ سپورتشى قاتىسقان. قازاقستان قۇراماسى سپورتتىڭ سەگىز تۇرىنەن سىنعا ءتۇسىپ, جالپىكوماندالىق ەسەپتە 9-ورىنعا تۇراقتادى. ۇلتتىق قۇراما قورجىنىنا 25 مەدال – 8 التىن, 4 كۇمىس جانە 13 قولا ءتۇستى.
مينيسترلىك وكىلدەرىنىڭ ايتۋىنشا, مۇنداي تولەمدەر سپورتتى مەملەكەتتىك دەڭگەيدە جۇيەلى قولداۋدىڭ ءبىر بولىگى سانالادى. بۇل باستاما جوعارى جەتىستىكتەردى ودان ءارى دامىتۋعا جانە قازاقستاننىڭ حالىقارالىق ارەناداعى بەدەلىن نىعايتۋعا باعىتتالعان.
سۋردليمپيادا جۇلدەگەرلەرى ماراپاتتالدى