سەنات دەپۋتاتى اندرەي لۋكيننىڭ ايتۋىنشا, ەلىمىزدە جەتىم بالالاردى تۇرعىن ۇيمەن قامتاماسىز ەتۋ ماسەلەسى ءالى دە وزەكتى كۇيىندە قالىپ وتىر. ول زاڭناماعا وزگەرىس ەنگىزىپ, جەتىم بالالار ءۇشىن باسپانا الۋدا باسىم قۇقىق بەرۋدى ۇسىندى, دەپ حابارلايدى Egemen.kz.
سەناتوردىڭ دەرەگىنشە, بۇگىندە تۇرعىن ءۇي كەزەگىندە شامامەن 61 مىڭ جەتىم بالا تىركەلگەن. ولاردىڭ 43 مىڭنان استامى كامەلەت جاسىنا جەتكەنىمەن, باسپانا الا الماي وتىر. ال الداعى جىلدارى بۇل كەزەكتىڭ ايتارلىقتاي قىسقارۋى كۇتىلمەيدى.
ەڭ كوپ كەزەكتە تۇرعاندار الماتى وبلىسىندا (شامامەن 7,2 مىڭ ادام), شىعىس قازاقستان وبلىسىندا (6,4 مىڭ), قاراعاندى وبلىسىندا (5,9 مىڭ), قوستاناي وبلىسىندا (5,7 مىڭ) جانە اقتوبە وبلىسىندا (3 مىڭعا جۋىق) تىركەلگەن.
بازاداعى قاتەلىك: اباي وبلىسىندا جەتىم بالانى باسپاناسىز قالدىردى
سەناتوردىڭ ايتۋىنشا, سوڭعى جىلدارى بەرىلگەن 60 مىڭعا جۋىق تۇرعىن ءۇيدىڭ تەك 7 مىڭى عانا جەتىم بالالارعا بولىنگەن, بۇل جالپى كولەمنىڭ 11,8 پايىزىن عانا قۇرايدى.
سونىمەن قاتار, كەيبىر كۇردەلى ماسەلەلەر دە بار. اتاپ ايتقاندا, كامەلەتكە تولماعان جەتىم بالالاردىڭ كەزەكتە بولۋىنا بايلانىستى ەرەسەك تۇلەكتەر باسپانا الا الماي جاتادى. ال كامەلەتكە تولماعاندار جاس ەرەكشەلىگىنە بايلانىستى تۇرعىن ءۇي قۇقىعىن پايدالانا المايدى. ناتيجەسىندە, كەيبىر جاعدايلاردا تۇرعىن ۇيلەر باسقا ساناتتاعى ازاماتتارعا بەرىلىپ جاتادى.
سونداي-اق وڭىرلەردە زاڭسىز تۇرۋ جاعدايلارى, اقپاراتتىق جۇيەلەردەگى دەرەكتەردىڭ جوعالۋى سياقتى ولقىلىقتار دا انىقتالعان.
سەناتوردىڭ پىكىرىنشە, بۇل ماسەلەلەر جەرگىلىكتى اتقارۋشى ورگانداردىڭ باقىلاۋىنىڭ السىزدىگىن جانە تۇرعىن ءۇي ساياساتىنىڭ جەتكىلىكتى دەڭگەيدە ورىندالماي وتىرعانىن كورسەتەدى.
باسپانا باسەكەسى: باق شابا ما, باپ شابا ما؟
وسىعان بايلانىستى ول جەتىم بالالاردى باسپانامەن قامتاماسىز ەتۋ بويىنشا ناقتى كورسەتكىشتەرى بار كەشەندى جول كارتاسىن ازىرلەۋدى, سونداي-اق تۇرعىن ءۇي ءبولۋدىڭ اشىقتىعىن ارتتىرۋ ءۇشىن تسيفرلىق جۇيەلەردى (Smart Data Ukimet, kezekte.kz جانە باسقا پلاتفورمالار) كۇشەيتۋدى ۇسىندى.
سونىمەن بىرگە اندرەي لۋكين جەتىم بالالاردىڭ تۇرعىن ءۇي الۋ قۇقىعىن زاڭمەن بەكىتىپ, ولارعا باسىمدىق بەرۋدى ۇسىندى. بۇل باستامانى ەڭبەك جانە حالىقتى الەۋمەتتىك قورعاۋ, وقۋ-اعارتۋ, ادىلەت مينيسترلىكتەرى بىرلەسىپ قاراستىرۋى قاجەت ەكەنىن ايتتى.