وڭىردە جول قوزعالىسى بىرتىندەپ تارتىپكە ءتۇسىپ كەلەدى. الدىڭعى اپتادا وتكەن اۋقىمدى ساپتىق تاراتىلىم جول ەرەجەسىن ەلەمەيتىن جۇرگىزۋشىلەرگە «زاڭ بارىنە ورتاق» ەكەنىن ەستەرىنە سالدى. بۇل جولى «جاناشىرلارىنا» سەنىپ, جاۋاپكەرشىلىكتەن جالتارۋ مۇمكىنشىلىگى مۇلدەم بولمادى. استانا قالاسى مەن اقمولا وبلىسىنان كەلگەن ءتارتىپ ساقشىلارى جانە ءوڭىردىڭ جول ساقشىلارى زاڭ بۇزعانداردى قاتاڭ جاۋاپقا تارتىپ, ايىپپۇل سالىپ, كولىكتەرىن ارنايى تۇراققا جونەلتتى.
وڭىرارالىق اۋقىمدى ساپتىق تاراتىلىم ۇيىمداستىرىلعانعا دەيىن وڭىردەگى ساقشىلار بىرقاتار پروفيلاكتيكالىق رەيد وتكىزدى. بۇعان ۋچاسكەلىك پوليتسيا ينسپەكتورلارى, پاترۋلدىك پوليتسيا باتالونى مەن پولك قىزمەتكەرلەرى, ۇلتتىق ۇلان جاۋىنگەرلەرى جۇمىلدىرىلدى. رەيد بارىسى وبلىستىق پوليتسيا دەپارتامەنتى اكىمشىلىك پوليتسيا باسقارماسى باسشىلىعىنىڭ تىكەلەي باقىلاۋىندا ءوتتى.
اكىمشىلىك پوليتسيا باسقارماسىنىڭ باستىعى باعدات كاكيموۆتىڭ ايتۋىنشا, جۇرگىزىلگەن شارالاردىڭ نەگىزگى ماقساتى – قۇقىق بۇزۋشىلىقتىڭ الدىن الۋ, جۇرگىزۋشىلەرگە ءتۇسىندىرۋ جۇمىسىن كۇشەيتۋ, جول قوزعالىسى مادەنيەتىن قالىپتاستىرۋ.
كەڭ كولەمدى پروفيلاكتيكالىق جۇمىسقا قاراماستان, ءبىر تاۋلىكتىڭ وزىندە وبلىس اۋماعىندا 800-دەن استام جول ەرەجەسىن بۇزۋ دەرەگى تىركەلگەن. ونىڭ 70-ءى – ورەسكەل زاڭ بۇزۋشىلىق.
رەيد بارىسىندا 3 جۇرگىزۋشىنىڭ ماس كۇيىندە كولىك تىزگىندەگەنى انىقتالدى. جۇرگىزۋ قۇقىعىنان ايىرىلعان 2 ازاماتتىڭ قايتا رۋلگە وتىرعانى بەلگىلى بولدى. بۇدان بولەك, كولىك اينەكتەرىن زاڭسىز قاراڭعىلاۋ – 22, جۇرگىزۋ كۋالىگىنسىز كولىك باسقارۋ – 8, ساقتاندىرۋسىز ءجۇرۋدىڭ 16 فاكتىسى تىركەلدى. جالپى, 34 اۆتوكولىك ايىپ تۇراعىنا قويىلعان.
پوليتسيا ەرەكشە نازار اۋدارعان ماسەلەنىڭ ءبىرى – بۇرىن ماس كۇيىندە ۇستالىپ, جۇرگىزۋ قۇقىعىنان ايىرىلعان ازاماتتاردىڭ قايتا زاڭ بۇزۋى. وكىنىشكە قاراي, مۇنداي جاعداي ازايماي تۇر.
– ماس كۇيىندە كولىك باسقارۋ – اسا قاۋىپتى ارەكەت. بۇل اۋىر جول-كولىك وقيعاسىنا اكەلۋى مۇمكىن. سوعان قاراماستان, كەيبىر ازاماتتار زاڭ تالاپتارىن ەلەمەيدى. ماسەلەن, 38 جاستاعى تۇرعىن بۇرىن قۇقىعىنان ايىرىلسا دا, قايتادان ماس كۇيىندە رۋلگە وتىرعان. قازىر وعان قاتىستى قىلمىستىق ءىس قوزعالدى, – دەدى باسقارما باسشىسى.
ءۇش كۇنگە جوسپارلانعان ساپتىق تاراتىلىم اياقتالىسىمەن قالا كوشەلەرىندە اۋقىمدى رەيدتىك شارالار باستالدى. ءبىز دە پاترۋلدىك ەكيپاجبەن بىرگە جولعا شىعىپ, ءتارتىپ ساقشىلارىنىڭ جۇمىس بارىسىن كوزبەن كوردىك. قىزمەتتىك كولىك ىشىندە اعا ينسپەكتور, پوليتسيا كاپيتانى ايبەك بايباتىروۆ, پوليتسيا كاپيتانى دۋلات ىدىرىسوۆ, ارنايى جاساق قىزمەتكەرى, اعا لەيتەنانت راحات عازيز ۇلى بار.
رەيد بارىسىندا ايبەك بايباتىروۆ كەيىنگى ۋاقىتتا قالادا ترانزيتتىك, ياعني ۋاقىتشا تىركەۋ نومىرىمەن جۇرگەن كولىكتەردىڭ كوبەيگەنىن اتاپ ءوتتى. ونىڭ ايتۋىنشا, بۇل باعىتتاعى باقىلاۋدى كۇشەيتۋ قاجەت.
– باستى ماقسات – زاڭ بۇزۋشىلىقتىڭ الدىن الۋ. جولعا شىققان ءاربىر جۇرگىزۋشى ءوز ومىرىنە عانا ەمەس, وزگەنىڭ دە قاۋىپسىزدىگىنە جاۋاپتى ەكەنىن ءتۇسىنۋى كەرەك, – دەدى ول.
پاترۋل قىزمەتكەرلەرى كولىكتەردى توقتاتىپ, زاماناۋي پلانشەتتەر ارقىلى مەملەكەتتىك نومىرلەردى بىردەن دەرەكقوردان تەكسەرىپ وتىردى. قۇجاتتارى كۇمان تۋدىرعان كولىكتەر بىردەن ەگجەي-تەگجەيلى قاراۋعا الىنادى.
جاۋىنگەر-ينتەرناتسيوناليستەر كوشەسىندە گرۋزيا تىركەۋىندەگى «KIA K5» كولىگى توقتاتىلدى. تەكسەرۋ بارىسىندا جۇرگىزۋشىنىڭ قازاقستان ازاماتى بولا تۇرا, شەتەلدىك نومىرمەن كولىك جۇرگىزگەن وعان 43 200 تەڭگە ايىپپۇل سالىنىپ, كولىك ايىپ تۇراعىنا جونەلتىلدى.
بىرنەشە ساعاتتىڭ ىشىندە ترانزيتتىك نومىرمەن جۇرگەن ونعا جۋىق كولىك انىقتالدى. ولاردىڭ بىرقاتارى ارنايى تۇراققا قويىلىپ, جۇرگىزۋشىلەرگە اكىمشىلىك حاتتامالار تولتىرىلدى.
پاترۋلدەۋ كەزىندە وزگە دە قۇقىق بۇزۋشىلىقتار تىركەلدى. ماسەلەن, قاۋىپسىزدىك بەلدىگىن تاقپاعان, تەحنيكالىق بايقاۋدان وتپەگەن «ۆاز-21099» كولىگى توقتاتىلدى. رەسەي ازاماتى باسقارعان قارا ءتۇستى «BMW» كولىگى دە تەكسەرىستەن ءوتتى. قۇجاتتارى تالاپقا ساي بولعاندىقتان, جۇرگىزۋشىگە تەك ءتۇسىندىرۋ جۇمىسىن جۇرگىزدى. تاعى ءبىر ترانزيتتىك نومىرمەن جۇرگەن كولىككە قاتىستى زاڭ بۇزۋشىلىق انىقتالىپ, جۇرگىزۋشىگە 43 200 تەڭگە كولەمىندە ايىپپۇل سالىندى. بۇل كولىك تە ايىپ تۇراعىنا قويىلدى.
ءتارتىپ ساقشىلارى رەيد بارىسىندا قۇقىق بۇزۋشىلىقتى انىقتاۋمەن عانا شەكتەلمەي, ازاماتتاردىڭ قاۋىپسىزدىگىنە قاتىستى جاعدايدا دا جەدەل ارەكەت ەتتى. سونىڭ ءبىر مىسالى – س.ەرۋباەۆ كوشەسىندەگى «ازات» ساۋدا ءۇيى ماڭىندا بولعان وقيعا. ماس كۇيىندە قۇلاپ قالعان ازامات تۋرالى حابار تۇسكەن ساتتە, پوليتسيا قىزمەتكەرلەرى دەرەۋ جەتىپ, جەدەل جاردەم شاقىردى.
«كەنشىلەر مادەنيەت سارايى» ايالداماسى ماڭىندا پاترۋلدەۋ كەزىندە ءتارتىپ ساقشىلارى ءوزىن جايسىز سەزىنگەن قىز بالانى بايقايدى. پوليتسەيلەر وعان العاشقى مەديتسينالىق كومەك كورسەتىپ, كەيىن شۇعىل تۇردە مەديتسينالىق مەكەمەگە جەتكىزدى.
مۇنداي ساتتەردە پوليتسيا قىزمەتىنىڭ ءمانى ايقىندالا تۇسەدى. ولار تەك زاڭ تالاپتارىنىڭ ورىندالۋىن قاداعالايتىن ورگان عانا ەمەس, قاجەت كەزدە ادام ومىرىنە اراشا تۇسەتىن, جاۋاپكەرشىلىگى جوعارى قىزمەت يەلەرى ەكەنىن كورسەتەدى.
كۇندەلىكتى قىزمەتتىك نۇسقامالاردا اۋىر زارداپقا اكەلۋى مۇمكىن ورەسكەل قۇقىق بۇزۋشىلىقتىڭ الدىن الۋ ماسەلەسىنە ايرىقشا ءمان بەرىلەدى. سونىڭ ىشىندە ماس كۇيىندە كولىك باسقارۋ, جالعان مەملەكەتتىك نومىرلەردى پايدالانۋ, جول قوزعالىسىنا قاۋىپ توندىرەتىن وزگە دە ارەكەتتەر قاتاڭ باقىلاۋدا تۇر.
رەيد بارىسىندا بالقاش قالاسىندا جالعان تىركەۋ بەلگىسىمەن جۇرگەن «Nissan» كولىگى انىقتالىپ, توقتاتىلدى. تەكسەرۋ كەزىندە 32 جاستاعى جۇرگىزۋشىدەن قولدان جاسالعان پىشاق تابىلىپ, تاركىلەندى. اتالعان دەرەك بويىنشا قىلمىستىق ءىس قوزعالدى.
ال تاعى ءبىر جاعدايدا «Volkswagen Passat» كولىگىنىڭ 22 جاستاعى جۇرگىزۋشىسى كولىگىنە ارنايى جارىق سيگنالدارىن – قىزىل جانە كوك ءتۇستى قۇرىلعىلاردى زاڭسىز ورناتقانى ءۇشىن جاۋاپكەرشىلىككە تارتىلدى. كولىك ارنايى ايىپ تۇراعىنا قويىلدى. وسى دەرەكتەردىڭ ءوزى رەيدتىك شارالاردىڭ جولداعى ءتارتىپتى كۇشەيتۋگە عانا ەمەس, قوعامدىق قاۋىپسىزدىككە تونەتىن ناقتى قاتەرلەردىڭ الدىن الۋعا باعىتتالعانىن ايقىن اڭعارتادى.
جالپى, پوليتسيا قىزمەتكەرلەرى كۇن سايىن شامامەن 2000-عا جۋىق اكىمشىلىك قۇقىق بۇزۋشىلىقتىڭ جولىن كەسەدى. ءبىز قاتىسقان ءبىر تاۋلىكتىڭ وزىندە ماس كۇيىندە كولىك باسقارعان 2 جۇرگىزۋشى, كولىك جۇرگىزۋ قۇقىعىنان ايىرىلعان 5 ادام, جالعان تىركەۋ بەلگىلەرىن پايدالانۋدىڭ 5 دەرەگى, قارسى جولاققا شىعۋدىڭ 7 فاكتىسى انىقتالدى. قىسقاسى, ءۇش كۇندىك رەيد قورىتىندىسى وڭىردەگى جول قوزعالىسى مادەنيەتىن ءالى دە جەتىلدىرە ءتۇسۋ قاجەتتىگىن كورسەتىپ وتىر.
قاراعاندى وبلىسى