سەمەي قالاسىنىڭ شىعىس كەنتىندە «كەلەشەك مەكتەپتەرى» ۇلتتىق جوباسى اياسىندا سالىنعان №53 جالپى ورتا ءبىلىم بەرەتىن 300 ورىندىق مەكتەپ پايدالانۋعا بەرىلدى. اشىلۋ سالتاناتىنا وبلىس اكىمى بەرىك ءۋالي, وقۋ-اعارتۋ ۆيتسە-ءمينيسترى جايىق شاراباسوۆ, قازاقستاننىڭ ەڭبەك ەرى, ۇستاز الما شۇكىجانوۆا, پارلامەنت سەناتىنىڭ دەپۋتاتتارى قايرات تاستەكەەۆ, اينۇر ارعىنبەكوۆا, پارلامەنت ءماجىلىسىنىڭ دەپۋتاتتارى رينات زايىتوۆ, ماقسات تولىقباي قاتىستى.
شىعىس كەنتىنىڭ بالالارى ەندى ەڭسەلى دە زاماناۋي عيماراتتا ءبىلىم الادى. بۇل – «كەلەشەك مەكتەپتەرى» جوباسى شەڭبەرىندە بوي كوتەرگەن سەمەي قالاسىنداعى ءۇشىنشى, ال اباي وبلىسى بويىنشا بەسىنشى مەكتەپ. جاڭا ءبىلىم ورداسى زاماناۋي تالاپتارعا ساي سالىنعان. جالپى اۋماعى 2,56 گەكتاردى قۇرايدى, 300 وقۋشىعا ارنالعان. مەكتەپتە 30 وقۋ كابينەتى, 2 ينفورماتيكا سىنىبى, روبوتتەحنيكا كابينەتى, حيميا, فيزيكا جانە بيولوگيا پاندىك زەرتحانالارى بار. سونداي-اق توكارلىق جانە مەتالل وڭدەۋ شەبەرحاناسى, اسپازدىق جانە تىگىن بولمەلەرى قاراستىرىلعان.
مەكتەپ 17 ينتەراكتيۆتى پانەلمەن جابدىقتالعان, 84 ورىندىق ءماجىلىس زالى, 78 ورىندىق اسحانا, وقۋ زالى مەن كىتاپحانا جۇمىس ىستەيدى. STEM-زەرتحانالار, حورەوگرافيا زالى, 673 شارشى مەترلىك سپورت زالى, ويىن الاڭدارى بار. مەكتەپ اۋماعىندا فۋتبول, ۆولەيبول, حوككەي الاڭدارى مەن 400 مەترلىك جۇگىرۋ جولى قاراستىرىلعان.
ەرەكشە ءبىلىم بەرۋدى قاجەت ەتەتىن بالالارعا دا بارلىق جاعداي جاسالعان. عيماراتتا ليفت, تاكتيلدى جولدار ورناتىلعان. ءىس-شارادا ءوڭىر باسشىسى ۇستازدار, وقۋشىلار مەن اتا-انالاردى ماڭىزدى وقيعامەن قۇتتىقتادى.
«بۇگىن – وبلىسىمىزدىڭ الەۋمەتتىك سالاسىنداعى ماڭىزدى كۇن. مەملەكەت باسشىسى قاسىم-جومارت توقاەۆتىڭ تاپسىرماسىمەن قولعا الىنعان «كەلەشەك مەكتەپتەرى» ۇلتتىق جوباسى اياسىندا شىعىس كەنتىندەگى جاڭا ءبىلىم وشاعىن ەل يگىلىگىنە تابىستاپ وتىرمىز. جوبا شەڭبەرىندە وبلىسىمىزدا جالپى سىيىمدىلىعى 3000 ورىندىق 5 زاماناۋي مەكتەپتىڭ قۇرىلىسى تولىق اياقتالدى. بۇل نىساننىڭ تەحنيكالىق جاراقتالۋى تيپتىك مەكتەپتەردەن 4 ەسە جوعارى, ال عيمارات اۋدانى 20 پايىزعا كەڭ ەتىپ جوسپارلانعان. وسى مەكتەپتى ىسكە قوسۋ ارقىلى شىعىس كەنتىندەگى مەملەكەتتىك مەكتەپكە قاتىستى وزەكتى ماسەلەنى تولىق شەشتىك. ەندى وقۋشىلاردىڭ باسقا اۋداندارعا قاتىناۋىنىڭ قاجەتى جوق. وڭىردەگى بالالاردىڭ ساپالى ءبىلىم الۋى مەن ۇستازداردىڭ ءتيىستى جاعدايدا جۇمىس ىستەۋى بارىسىندا جۇيەلى قولداۋ كورسەتۋدى جالعاستىرا بەرەمىز. جاڭا ءبىلىم ورداسى قۇتتى بولسىن!» دەدى بەرىك ءۋالي.
ءىس-شارا بارىسىندا وقۋ-اعارتۋ ۆيتسە-ءمينيسترى جايىق شاراباسوۆ ءوڭىردىڭ ءبىلىم سالاسىنا ۇزاق جىل بويى ەڭبەك سىڭىرگەن ارداگەر ۇستازدارى مارياما بيتەباەۆا مەن باقىت قاجىباەۆاعا «ەڭبەك ارداگەرى» مەدالىن تابىس ەتتى. وبلىس اكىمى قۇرمەتتى قوناقتارمەن بىرگە مەكتەپتىڭ سىنىپتارىن ارالاپ, وقۋشىلارمەن, مۇعالىمدەرمەن پىكىرلەستى.
«بۇل ءبىلىم ورداسىنىڭ شىعىس كەنتىنىڭ ءدال وسى ايماعىندا اشىلۋى بالالارىمىزعا دا, بىزگە دە زور قۋانىش. سەبەبى بالالارىمىز مەكتەپكە الىسقا قاتىناپ, قيىندىق كورىپ, ۇيىرمەلەرگە دۇرىس بارا الماي جۇرگەن ەدى. شىعىس كەنتىنىڭ وڭ جاعالاۋىندا تۇراتىن وقۋشىلاردىڭ كوپتەن كۇتكەن ارمانى ورىندالدى. جارقىراعان, زاماناۋي وقىتۋ قۇرالدارىمەن جابدىقتالعان ءبىلىم ورداسى ەل بولاشاعىنا جاسالىپ جاتقان ينۆەستيتسيا دەۋگە بولادى. اتا-انالار اتىنان ريزاشىلىعىمىزدى ءبىلدىرىپ, العىسىمىزدى ايتامىز», دەدى شىعىس كەنتىنىڭ تۇرعىنى شالقار حاميلاەۆ.
قازىر وبلىستا مەكتەپ تاپشىلىعىن شەشۋدە جۇيەلى جۇمىس جۇرگىزىلىپ جاتىر. جارما اۋدانىنىڭ سۋىقبۇلاق اۋىلىنداعى باستاۋىش مەكتەپتى جاڭا وقۋ جىلىندا پايدالانۋعا بەرۋ جوسپارلانعان. سەمەي قالاسىنداعى №4, №30 مەكتەپتەرگە قوسىمشا عيماراتتار سالىنىپ, اباي اۋدانى كەڭگىرباي بي اۋىلىنداعى قاراشوقى شاتقالىندا بالالار لاگەرىنىڭ قۇرىلىسى اياقتالۋعا جاقىن. سونىمەن قاتار الداعى جىلدارى سەمەيدىڭ قاراعايلى شاعىن اۋدانىندا 400 ورىندىق ء«بىلىم-يننوۆاتسيا» ليتسەيىن, 1400 ورىندىق مەكتەپ پەن اقسۋات جانە ەكپىن اۋىلدارىندا 300 ورىندىق ەكى مەكتەپ سالۋ جوسپارلانىپ وتىر.
اباي وبلىسى