قىزىلوردا وبلىسىنىڭ كاسىپكەرلەر پالاتاسىنىڭ قارماقشى اۋداندىق فيليالىنداعى كاسىپكەرلىكتى قولداۋ ورتالىعى اۋدانداعى ماڭىزدى ماسەلەنى شەشۋگە كومەكتەستى. اۋدان وبلىس ورتالىعىنان 170 شاقىرىم قاشىقتىقتا ورنالاسقان. اۋداندا 2 كەنت, 12 اۋىلدىق وكرۋگ, 14 دەربەس ءبولىم, 31 ءبىلىم ورتالىعى بولعانىمەن, وسى ۋاقىتقا دەيىن بىردە-ءبىر جارناما اگەنتتىگى جوق ەدى. سوندىقتان اۋدانداعى مەكەمەلەر مەن كاسىپكەرلەر وزدەرىنە قاجەتتى سىرتقى جارناما قۇرالدارىن (بيلبورد, باننەر, ستەندتەر, ت.ب.) وبلىس ورتالىعى – قىزىلوردا قالاسىنا كەلىپ جاساتاتىن. قارماقشى اۋدانىنداعى كاسىپكەرلىكتى قولداۋ ورتالىعىنا مەيىربەك تولەپبەرگەنوۆ ەسىمدى جاس جىگىت: «كومپيۋتەرلىك جانە قوسالقى تەحنيكانى جوندەۋ جانە ولارعا قىزمەت كورسەتۋگە قاتىستى كاسىپ اشقىم كەلەدى» دەپ كەلگەندە, ورتالىق كەڭەسشىلەرى اۋداندا سۇرانىسقا يە كاسىپ ءتۇرى رەتىندە جارناما اگەنتتىگىن اشۋدى ۇسىندى. وسىعان وراي مەيىربەكتىڭ ءوزى: «مەن 2013 جىلدان بەرى ءتۇرلى قارجى ينستيتۋتتارىنا بارىپ, جوبامدى قارجىلاندىرا الماي ءجۇردىم. اۋدانىمىزدا كاسىپكەرلىكتى قولداۋ ورتالىعىنىڭ اشىلعانى جاقسى بولدى. بىرىنشىدەن, ورتالىق بيزنەستىڭ ءتيىمدى باعىتىن انىقتاپ بەرۋگە كومەكتەستى, ەكىنشىدەن, ساپالى بيزنەس-جوسپار ازىرلەپ بەردى. ناتيجەسىندە جالپى قۇنى 7,5 ملن. تەڭگە تۇراتىن جوبام «قىزىلوردا» وڭىرلىك ينۆەستيتسيالىق ورتالىعى ارقىلى قارجىلاندىرىلىپ, جۇمىستى باستاپ كەتتىم. قازىر اۋداندا مەنىڭ قىزمەتىمە سۇرانىس جوعارى», – دەيدى. ايتا كەتۋ كەرەك, قارماقشى اۋداندىق كاسىپكەرلىكتى قولداۋ ورتالىعى وسى كەزگە دەيىن 425 ازاماتقا 605 قىزمەت كورسەتتى, سونىڭ ىشىندە 61 جوبا قارجىلاندىرىلدى.
«ەگەمەن-اقپارات».