زاڭسىز شىعارىلعان اكتيۆتەردى قايتارۋ تەك قارجىلىق كورسەتكىش ەمەس, ونىڭ ارتىندا ناقتى الەۋمەتتىك ماڭىزى بار جوبالار مەن ادامداردىڭ تاعدىرى جاتىر. بۇل – الەۋمەتتىك ادىلەتتىلىكتى قالپىنا كەلتىرۋدىڭ ماڭىزدى تەتىگى. سونىڭ ايقىن دالەلى رەتىندە شىمكەنت قالاسىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان جاڭا جاتاقحانا پايدالانۋعا بەرىلدى. بۇل تۋرالى باس پروكۋرور بەرىك اسىلوۆ الەۋمەتتىك جەلىدەگى پاراقشاسىندا جازدى, دەپ حابارلايدى Egemen.kz.
بۇعان دەيىن مەكتەپ-ينتەرنات تاربيەلەنۋشىلەرىنىڭ جاعدايى كۇردەلى بولعان. 1975 جىلى سالىنعان ەسكى عيماراتتا ورىن تاپشىلىعى بولىپ, 125 ورىنعا ەسەپتەلگەن نىساندا 290 بالا تۇرعان. ينفراقۇرىلىمنىڭ توزۋى بالالاردىڭ ءومىر ءسۇرۋ ساپاسىنا دا اسەر ەتكەن.
«جاڭا جاتاقحانا بۇل ماسەلەلەردى تولىق شەشۋگە باعىتتالعان. جالپى اۋدانى 8288,70 شارشى مەتردى قۇرايتىن نىسان 300 ورىنعا ارنالعان جانە زاماناۋي ستاندارتتارعا ساي سالىنعان. 3,5 گەكتار اۋماقتا بالالاردىڭ بوس ۋاقىتىن ءتيىمدى وتكىزۋى ءۇشىن فۋتبول الاڭى, ۆوركاۋت ايماعى, ويىن جانە دەمالىس الاڭدارى قاراستىرىلعان», دەلىنگەن جازبادا.
سقو-داعى اۋىلعا قايتارىلعان قارجى ەسەبىنەن اۋىز سۋ قۇبىرى تارتىلدى
عيمارات ىشىندە ۇلدار مەن قىزدارعا ارنالعان بولەك تۇرعىن بلوكتار, زاماناۋي مەديتسينالىق كابينەت, كەڭ ويىن بولمەلەرى جانە بالالاردىڭ دامۋىنا قولايلى باسقا دا فۋنكتسيونالدىق كەڭىستىكتەر بار. بۇل تاربيەلەنۋشىلەر ءۇشىن قاۋىپسىز ءارى جايلى ورتا قالىپتاستىرۋعا مۇمكىندىك بەرەدى.
جوبانى جۇزەگە اسىرۋ ءۇشىن مەملەكەت باسشىسىنىڭ تاپسىرماسىمەن قايتارىلعان اكتيۆتەر مەن ولاردى ساتۋدان تۇسكەن قاراجات جيناقتالعان ارناۋلى مەملەكەتتىك قوردان 2,6 ملرد تەڭگە ءبولىندى.
باس پروكۋراتۋرانىڭ مالىمەتىنشە, بۇل باعىتتاعى جۇمىس جۇيەلى تۇردە جالعاسىپ جاتىر. قايتارىلعان قاراجات ەسەبىنەن ەل بويىنشا شامامەن 500 ملرد تەڭگەگە 440 الەۋمەتتىك جانە كوممۋنالدىق نىساننىڭ قۇرىلىسى قارجىلاندىرىلدى. ولاردىڭ 319-ى قازىردىڭ وزىندە پايدالانۋعا بەرىلگەن. بۇل قاتاردا مەكتەپتەر, اۋرۋحانالار جانە سۋمەن جابدىقتاۋ جۇيەلەرى بار.
قايتارىلعان قارجى اۋرۋحانا قۇرىلىسىنا جۇمسالدى
جاۋاپتى ورگانداردىڭ ايتۋىنشا, قايتارىلعان ءاربىر تەڭگە حالىقتىڭ يگىلىگىنە جۇمسالۋى ءتيىس. بۇل قاراجات الەۋمەتتىك ماڭىزى بار جوبالاردى جۇزەگە اسىرۋعا, ازاماتتاردىڭ ءومىر ءسۇرۋ ساپاسىن ارتتىرۋعا جانە وڭىرلەردى دامىتۋعا باعىتتالىپ وتىر.