اقپان-ناۋرىز ايلارىندا سولتۇستىك قازاقستان وبلىسىندا ەسىرتكى زاتتارىن قولدانۋ مەن تاراتۋعا قاتىستى قىلمىستىق ءىس ءجيى انىقتالدى.
ماسەلەن, اققايىڭ اۋدانىنداعى جانارماي قۇيۋ بەكەتىندە «Lada Granta» اۆتوكولىگىمەن كەلگەن 25 جاستاعى ازاماتتان 5 گرامم سينتەتيكالىق ەسىرتكى تابىلدى. سەگىز ورامعا ءبولىپ سالىنعان پسيحوتروپتىق زاتتاردىڭ ارنايى تاراتۋ ماقساتىندا دايىندالعانى كورىنىپ تۇر. مۇنداي ەسىرتكىنىڭ 2,5 گرامىن الىپ جۇرگەن ادامنىڭ ءوزى ۇزاق مەرزىمگە سوتتالادى. ال بۇل بۇرىن دا بىرنەشە مارتە سوتتى بولعان كۇدىكتى جازاسىن وتەپ شىققان بويدا ءبىر اي بويى ەسىرتكى تاراتۋمەن اينالىسقان. ەندى ول 12 جىلعا دەيىن باس بوستاندىعىنان ايىرىلۋى مۇمكىن.
سونداي-اق پەتروپاۆل قالاسىندا كۇدىككە ىلىنگەن 19 جاستاعى جىگىتتەن دە سينتەتيكالىق ەسىرتكى زاتتارى تابىلعان. ۇستاۋ كەزىندە جاس جىگىتتەن ۇنتاق ءتارىزدى زاتى بار 19 وراما تاركىلەندى. ساراپتاما ناتيجەسىندە ونىڭ α-PVP دەپ اتالاتىن پسيحوتروپتىق زات ەكەنى انىقتالعان. تاركىلەنگەن زاتتىڭ سالماعى – 35 گرامم. قازىر بۇل ىسكە قاتىستى سوتقا دەيىنگى تەرگەپ-تەكسەرۋ جۇرگىزىلىپ جاتىر. پوليتسيانىڭ مالىمەتىنشە, كۇدىكتى تىيىم سالىنعان زاتتاردى ساتۋمەن اينالىساتىن ينتەرنەت-دۇكەندەردىڭ بىرىنە «جاسىرىن ورنالاستىرۋشى» رەتىندە ءبىر اي بۇرىن جۇمىسقا تۇرعان. قازىر قاماۋدا وتىر. ەسىرتكى زاتتارىن اسا ءىرى مولشەردە وتكىزۋ فاكتىسى بويىنشا وعان دا 7 جىلدان 12 جىلعا دەيىن باس بوستاندىعىنان ايىرۋ جازاسى قاۋپى ءتونىپ تۇر.
پەتروپاۆل قالاسى جۇمىسشى كەنتىنىڭ 39 جاستاعى تۇرعىنى دا قالا اۋماعىندا ەسىرتكى وتكىزۋمەن اينالىستى دەگەن كۇدىكپەن ۇستالدى. كۇدىكتىنىڭ تۇرعىلىقتى جەرىن تەكسەرۋ بارىسىندا ءتارتىپ ساقشىلارى شامامەن 75 گرامم گەروين تاركىلەدى. بۇل اسا ءىرى مولشەرگە جاتادى. ءوزىنىڭ ايتۋىنشا, ول گەرويندى ەلوردادان الىپ كەلگەن. مەديتسينالىق كۋالاندىرۋ ناتيجەسى ۇستالعان ادامنىڭ وپيويدتەردى قولدانعانىن كورسەتتى. ايتا كەتۋ كەرەك, كۇدىكتى بۇعان دەيىن دە ۇرلىق جانە ەسىرتكى زاتتارىنىڭ زاڭسىز اينالىمى بويىنشا سوتتالعان. الايدا وتكەننەن ەش ساباق الماعان ونى ەندى قاتاڭ جازا كۇتىپ تۇر. بۇل – جىل باسىنان بەرى وبلىستا گەروين انىقتالعان جالعىز دەرەك. جالپى, قاڭتار ايىنان باستاپ وڭىردە پوليتسەيلەر 39 ەسىرتكى قىلمىسىن تىركەپ, زاڭسىز اينالىمنان 1 600 گرامنان اسا ءتۇرلى ەسىرتكى زاتتارىن تاركىلەدى. ونىڭ 900 گرامى – سينتەتيكالىق ەسىرتكىلەر.
پەتروپاۆل قالاسىنداعى گاراج كووپەراتيۆتەرىنىڭ ءبىرىنىڭ اۋماعىندا پوليتسەيلەر كۇدىككە ىلىنگەن «Volkswagen Golf» اۆتوكولىگىن توقتاتادى. كولىكتەگى جولاۋشى سولتۇستىك قازاقستان وبلىسى اۋداندارىنىڭ بىرىندە تۇراتىن 28 جاستاعى جىگىت ەكەن. ونىڭ بەل سومكەسىنەن سۇيىقماي ءتارىزدى زات قۇيىلعان 5 كاپسۋلا جانە شىلىم شەگۋگە ارنالعان قۇرالدار شىقتى. بۇل – ەسىرتكى زاتتارىن جاسىرىن ورىندارعا قالدىرۋ ماقساتىندا جاسالاتىن قۇرالدار. وسى تاسىلمەن كۇدىكتى پسيحوتروپتىق زاتتار تاراتقانى بەلگىلى بولدى. ساراپتاما ناتيجەسىندە تاركىلەنگەن زات كاننابيس سىعىندىسى, ياعني گاشيش مايى بولىپ شىقتى. كۇدىكتىنىڭ تۇرعىلىقتى مەكەنجايىنان تاعى 10 كاپسۋلا ەسىرتكى زاتى, 24 بوس كاپسۋلا تاركىلەندى. مەديتسينالىق كۋالاندىرۋ ەر ادامنىڭ ەسىرتكى قولدانعانىن كورسەتتى. كۇدىكتىنىڭ ايتۋىنشا, ول شامامەن ەكى اي بويى «زاكلادچيك» رەتىندە جۇمىس ىستەگەن. قازىرگى ۋاقىتتا ول قاماۋعا الىندى. اسا ءىرى مولشەردە پسيحوتروپتىق زاتتاردى وتكىزۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. كۇدىكتىگە 6-دان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
ال مىنا وقيعا وبلىستىڭ «باتىس» باقىلاۋ-وتكىزۋ بەكەتىندە تىركەلدى. پوليتسيا قىزمەتكەرلەرى پەتروپاۆل قالاسىنىڭ 37 جاستاعى تۇرعىنى جۇرگىزىپ كەلە جاتقان «Lada Granta» اۆتوكولىگىن توقتاتىپ, تەكسەرىس جۇرگىزگەندە جالپى سالماعى 405,36 گرامم بولاتىن α-PvP اتتى سينتەتيكالىق ەسىرتكى زاتى سالىنعان ورامالار تاركىلەندى. بۇل – بيىل وبلىستا انىقتالعان ەڭ ءىرى سينتەتيكالىق ەسىرتكى پارتياسى. جۇرگىزۋشى ەسىرتكى زاتتارىن ينتەرنەت ارقىلى ساتۋمەن اينالىساتىن زاڭسىز «ناركوشوپتاردىڭ» بىرىندە جۇمىس ىستەيتىن بولىپ شىقتى. ول 2025 جىلدىڭ جەلتوقسان ايىندا ەسىرتكىنى جاسىرۋشى بولىپ كىرىسىپ, كەيىنگى ۋاقىتتا قىلمىستىق يەرارحيادا «جوعارىلاپ», تاسىمالداۋمەن اينالىسۋعا كەلىسكەن ەكەن. الايدا قوستانايدان پەتروپاۆل قالاسىنا پسيحوتروپتىق زاتتاردى جەتكىزۋگە باعىتتالعان العاشقى ساپارىندا قولعا ءتۇستى.
مىنە, وسىلايشا «وڭاي» ولجا تابۋ جولىنا تۇسكەندەر ءوز ءومىرىنىڭ باسىم بولىگىن تەمىر توردىڭ ارتىندا وتكىزۋگە ءوز ەرىكتەرىمەن قادام باسىپ كەلەدى. ال ەڭبەك ەتەمىن دەگەن ازاماتتار ءۇشىن پەتروپاۆل قالاسىندا لايىقتى جۇمىس ورىندارى جەتكىلىكتى. ونىڭ ۇستىنە, وڭىردە قانشاما جاڭا ءوندىرىس ورىندارى اشىلىپ جاتىر.
سولتۇستىك قازاقستان وبلىسى