ۆيتسە-پرەمەر قانات بوزىمباەۆ ەنەرگەتيكا جانە كوممۋنالدىق سەكتوردى جاڭعىرتۋ جونىندەگى ۇلتتىق جوبانى (ەكسج) جۇزەگە اسىرۋعا ارنالعان جوبالىق كەڭسەنىڭ وتىرىسىن وتكىزدى.
بۇگىندە تۇرعىن ءۇي-كوممۋنالدىق شارۋاشىلىق سالاسىنداعى 2026 جىلعا ارنالعان ينۆەستيتسيالاردىڭ جالپى كولەمى 1,2 ترلن تەڭگەنى قۇرايدى: 634 ملرد تەڭگە – ۇلتتىق جوبا مەحانيزمى بويىنشا, 542 ملرد تەڭگە تاريف بەلگىلەۋ مەحانيزمى بويىنشا قولدانىستاعى ينۆەستيتسيالىق باعدارلامالار اياسىندا.
ەكسج ەلەكتروندىق پلاتفورماسى ارقىلى كونكۋرستىق راسىمدەردى وتكىزۋگە دايىن 482 ملرد تەڭگە سوماسىنا 206 جوبا وتەدى. ونىڭ ىشىندە 168 جوباعا قاتىستى قازىردىڭ وزىندە بەلسەندى جۇمىستار جۇرگىزىلىپ جاتىر.
ينفراقۇرىلىمنىڭ توزۋىن تومەندەتۋ جونىندەگى جوسپاردىڭ 100% ورىندالعانىنا قاراماستان, بىرقاتار وڭىرلەردە 2026 جىلعا ارنالعان ۇلتتىق جوبانى ىسكە اسىرۋدىڭ بەكىتىلگەن كەستەسىنەن ايتارلىقتاي قالىس قالۋ بايقالادى. جىلۋمەن جابدىقتاۋ سالاسىندا ماڭعىستاۋ, سولتۇستىك قازاقستان, شىعىس قازاقستان, جامبىل, الماتى, اباي وبلىستارى, ەلەكترمەن جابدىقتاۋ سالاسىندا اباي, سولتۇستىك قازاقستان, قىزىلوردا, قاراعاندى, پاۆلودار, باتىس قازاقستان وبلىستارى, سۋمەن جابدىقتاۋ سالاسىندا باتىس قازاقستان, قىزىلوردا, پاۆلودار وبلىستارى, استانا, الماتى, شىمكەنت قالالارى, سۋ بۇرۋ سالاسىندا: باتىس قازاقستان, ماڭعىستاۋ, اقمولا, سولتۇستىك قازاقستان, اباي وبلىستارى, استانا قالاسى قالىس قالىپ كەلەدى. سونداي-اق كەلەسى جىلعا وتىنىمدەر بەرۋ بارىسىندا دا وڭىرلەردىڭ تومەن بەلسەندىلىگى بايقالادى.
ۆيتسە-پرەمەر 2027 جىلعا قاراي اكىمدىكتەر تۇرعىن ءۇي-كوممۋنالدىق شارۋاشىلىق سالاسىنداعى «قىزىل ايماق» ماسەلەسىن تولىعىمەن جويۋعا ءتيىس ەكەنىن اتاپ ءوتتى. ءساۋىر ايىنىڭ سوڭىنا دەيىن بارلىق جوبالار بويىنشا ەكسج پلاتفورماسىنا, ءبىرىنشى كەزەكتە «قىزىل ايماقتاعى» كاسىپورىندارعا قاتىستى وتىنىمدەر بەرۋدى قامتاماسىز ەتۋ تاپسىرىلدى. مەرزىمدەر بۇزىلعان, ساپاسىز ورىندالعان جاعدايدا دەربەس جاۋاپكەرشىلىك شارالارى قابىلدانادى.
وتىرىس بارىسىندا قارجىلاندىرۋ ماسەلەلەرى دە قارالدى. ۇلتتىق جوبا اياسىندا «بايتەرەك» حولدينگى 1500-دەن استام ءوتىنىمدى پىسىقتادى, ولاردىڭ ىشىنەن ەكىنشى كەزەڭدە 520,6 ملرد تەڭگە سوماسىنا 231 ءوتىنىم كەلىسىلدى. قارجىلاندىرۋ «قازاقستاننىڭ دامۋ بانكى» اق, ەكىنشى دەڭگەيدەگى بانكتەر جەلىسى بويىنشا تىكەلەي كرەديتتەۋ ارقىلى دا, «قتك» اق قاتىسۋىمەن اكىمدىكتەردىڭ مەملەكەتتىك باعالى قاعازدارىن ساتىپ الۋ مەحانيزمى ارقىلى دا قاراستىرىلادى. بۇگىندە 231 جوبانىڭ 37 جوباسى بويىنشا جوبالىق-سمەتالىق قۇجاتتاما ازىرلەندى. بۇل جوبالار ىسكە اسىرۋعا دايىن.
كۇن تارتىبىندە سالانى تسيفرلاندىرۋ ماسەلەسى دە ارنايى قارالدى. تۇرعىن ءۇي-كوممۋنالدىق شارۋاشىلىعىنا قاتىستى دەرەكتەردى جيناۋدىڭ, بەرۋدىڭ, تالداۋدىڭ كوپ دەڭگەيلى جۇيەسىن قالىپتاستىرۋ قاجەتتىلىگى اتاپ ءوتىلدى. مۇنداي جۇيە «تومەننەن جوعارىعا» قاعيداتى بويىنشا – تۇتىنۋشىلاردان كوممۋنالدىق كاسىپورىندارعا دەيىن, كەيىننەن «EnergyTech», «WaterTech» پلاتفورمالارىنا, «Smart Turmys» جۇيەسىنە ەنگىزۋ ەرەجەسى بويىنشا جۇمىس ىستەۋگە ءتيىس.
وتىرىس قورىتىندىسىندا ەنەرگەتيكا, ونەركاسىپ جانە قۇرىلىس مينيسترلىكتەرىنە, سونداي-اق «تكش قازورتالىعى» اق-عا ءتيىستى تاپسىرمالار بەرىلدى.