زەينەتاقى جۇيەسى ەڭبەك وتىلىنە نەگىزدەلۋى مۇمكىن. سەناتور امانگەلدى نۇعمانوۆ جاسقا بايلانىستى ەمەس, ەڭبەك وتىلىنە نەگىزدەلگەن زەينەتاقى جۇيەسىنە كەزەڭ-كەزەڭىمەن كوشۋدى ۇسىندى. ونىڭ پىكىرىنشە, بۇل قادام ەلدەگى الەۋمەتتىك ساياساتتى جاڭعىرتىپ, ەڭبەككە ىنتالاندىرۋدى كۇشەيتەدى, دەپ جازادى Egemen.kz.
سەناتوردىڭ ايتۋىنشا, قازاقستان ادامي كاپيتالدى دامىتۋعا باسىمدىق بەرەتىن جاڭا دامۋ كەزەڭىنە اياق باستى. وسىعان بايلانىستى الەۋمەتتىك كودەكستى جاڭارتىپ, زەينەتاقى جۇيەسىن ەڭبەك نارىعىنىڭ قازىرگى تالاپتارىنا بەيىمدەۋ قاجەت. ول قازىرگى «جاسقا قاراي زەينەتكە شىعۋ» ۇلگىسىنەن باس تارتىپ, ازاماتتارعا ەڭبەك ءوتىلى جەتكىلىكتى بولعان جاعدايدا زەينەتكە شىعۋ ۋاقىتىن ءوز بەتىنشە انىقتاۋ قۇقىعىن بەرۋدى ۇسىنادى.
نۇعمانوۆتىڭ پىكىرىنشە, مۇنداي ءتاسىل بىرقاتار ماڭىزدى ناتيجەلەرگە جەتكىزەدى:
جۇمىسسىزدىق دەڭگەيىن تومەندەتەدى; ماسىلدىق كوزقاراستى ازايتادى; ازاماتتاردىڭ ەڭبەككە جاۋاپكەرشىلىگىن ارتتىرادى; مەرزىمىنەن بۇرىن نەگىزسىز زەينەتكە شىعۋدى تەجەيدى; مەملەكەتتىك بيۋدجەت پەن بىرىڭعاي جيناقتاۋشى زەينەتاقى قورىنا تۇسەتىن جۇكتەمەنى ازايتادى.ونىڭ سوزىنشە, بۇل وزگەرىستەردىڭ ناتيجەسىندە زەينەتاقى جۇيەسىندە قارجىلىق تەڭگەرىم نىعايا تۇسەدى.
قازاقستان زەينەتكەرلەر ءۇشىن ەڭ قولايلى ەلدەر رەيتينگىنە ەندى
سەناتور سونداي-اق قازىرگى زاڭناماداعى بىرقاتار ولقىلىقتارعا توقتالدى. اتاپ ايتقاندا, مۇگەدەكتىك بەلگىلەنبەي, بىراق دەنساۋلىق جاعدايىنا بايلانىستى جۇمىس ىستەۋى قيىنداعان ازاماتتارعا مەرزىمىنەن بۇرىن زەينەتكە شىعۋ تەتىگى جوق. قولدانىستاعى جۇيە تەك رەسمي مۇگەدەكتىكتى تانۋعا باعىتتالعان, ال سوزىلمالى جانە كاسىبي سىرقاتتارى بار ادامداردىڭ جاعدايى جەتكىلىكتى ەسكەرىلمەيدى.
وسىعان بايلانىستى ول الەۋمەتتىك كودەكسكە وزگەرىس ەنگىزىپ, دەنساۋلىق ساقتاۋ سالاسىنىڭ ۋاكىلەتتى ورگانى بەكىتەتىن اۋرۋلار تىزبەسى نەگىزىندە مەديتسينالىق ايعاقتار ارقىلى زەينەتاقى تاعايىنداۋ مۇمكىندىگىن قاراستىرۋدى ۇسىندى. مۇنداي تەتىك ەڭبەككە قابىلەتتىلىگىن جوعالتقان ازاماتتارعا قولداۋ بولماق.
سونىمەن قاتار ەگەر ادامنىڭ دەنساۋلىعى جاقسارىپ, ەڭبەككە قابىلەتتىلىگى قالپىنا كەلسە, ونىڭ قايتا جۇمىس ىستەۋ قۇقىعى ساقتالۋى ءتيىس دەگەن ۇسىنىس تا ايتىلدى.
ايەلدەردىڭ زەينەتكە شىعۋ جاسى وزگەرەدى
سەناتور كوتەرگەن باستاما – زەينەتاقى جۇيەسىن جاڭعىرتۋعا باعىتتالعان كەشەندى وزگەرىستەردىڭ ءبىرى. ول ەلدەگى الەۋمەتتىك ادىلەتتىلىكتى ارتتىرىپ قانا قويماي, ەڭبەك نارىعىنداعى جاڭا تالاپتارعا ساي يكەمدى جۇيە قالىپتاستىرۋعا مۇمكىندىك بەرۋى مۇمكىن.
پاۆلودار وبلىسىندا كيبەرپوليتسەيلەر زەينەتكەردىڭ 5 ملن تەڭگەسىن الاياقتاردان ساقتاپ قالدى