ءساۋىردىڭ العاشقى كۇنى ەلىمىزدە ءداستۇرلى فرانكوفونيا كوكتەمى فەستيۆالىمەن باستالدى. وسىمەن 16-رەت ۇيىمداستىرىلعان فەستيۆال اياسىندا ەلىمىزدىڭ بىرنەشە شاھارىندا – الماتى, استانا, شىمكەنت, قاراعاندى, وسكەمەن, قوستاناي قالالارىندا ءتۇرلى ءىس-شارا جوسپارلانعان.
فرانتسۋز ءتىلى مەن ءفرانتسۋزتىلدى مادەنيەتتەرىنىڭ الۋان قىرىنا ارنالعان مادەني ءىس-شارانى ەلدەگى توعىز ەلشىلىك – بەلگيا كورولدىگى, كانادا, فرانتسيا, ليۋكسەمبۋرگ, ليتۆا, ماروككو كورولدىگى, رۋمىنيا, ارمەنيا, شۆەيتساريا ەلشىلىكتەرى بىرلەسىپ ۇيىمداستىرادى.
ون بەس كۇنگە سوزىلعان باعدارلاماعا سايكەس كينو كورسەتىلىمدەرى, كونتسەرتتەر, كونفەرەنتسيالار, ادەبي كەزدەسۋلەر, كورمەلەر, فرانتسۋز ءتىلى بويىنشا بايقاۋلار سىندى ءتۇرلى ءىس-شارالار وتەدى.
«فرانكوفونيا كوكتەمى فەستيۆالىن وتكىزۋ ارقىلى ءبىز سىزدەرگە فرانتسۋز ءتىلىنىڭ بايلىعىن كورسەتكىمىز كەلەدى. سوندىقتان بۇل ءىس-شارانىڭ ماڭىزى زور. مەن وسكەمەنگە بارىپ, فرانتسۋز كينوسى فەستيۆالىن اشامىن. سونداي-اق كورەرمەن ارمەنيا, كانادا, ماروككو جانە باسقا ەلدەردەن كەلگەن فيلمدەرمەن تانىسا الادى», دەدى فرانتسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگە.
فەستيۆال شىمىلدىعىن پيانيست كريستين فونليۋپتتىڭ الماتىداعى (30 ناۋرىز) كونتسەرتى اشتى. ال 2 ساۋىردە قاراعاندى ساحناسىندا جوسپارلانعان. سونداي-اق فرانتسۋز ورىنداۋشىسى Voyou ەلىمىزگە گاسترولدىك ساپارمەن كەلەدى. ونىڭ كونتسەرتتەرى الماتىدا (10 ءساۋىر), شىمكەنتتە (11 ءساۋىر), استانادا (12 ءساۋىر) وتەدى. ال ليتۆالىق پيانيست مۋزا رۋباتسكيتە 15 ساۋىردە استاناداعى ق.قۋانىشباەۆ اتىنداعى تەاتر ساحناسىندا جەكە كونتسەرتىن بەرەدى.