تاراز قالاسىنداعى جەكە مەكتەپتىڭ 11-سىنىپ وقۋشىسى سوت ارقىلى ءوز اكەسىنەن اليمەنت ءوندىرىپ الدى. اي سايىن 68 مىڭ تەڭگە كولەمىندە وقۋ اقىسىن تولەيتىن قىز ۇزاق جىلدار بويى ومىرىنە ارالاسپاعان جانە ماتەريالدىق قولداۋ كورسەتپەگەن اكەسىنەن زاڭ جۇزىندە كومەك الۋعا ءماجبۇر بولعان, دەپ حابارلايدى Egemen.kz.
2008 جىلى اكەسى ەكى بالاسىنان, سونىڭ ىشىندە قىزىنا دا قاتىستى اتا-انا قۇقىعىنان نوتاريالدى تۇردە باس تارتقان. ال 2018 جىلى وتباسىندا قايعىلى جاعداي بولىپ, اناسى مەن اعاسى قازا تاپقاننان كەيىن, قىز اجەسىنىڭ قولىندا تۇرىپ كەلگەن. وسى ۋاقىتقا دەيىن اكەسى ەشقانداي كومەك كورسەتپەگەن, كەرىسىنشە بايلانىستان قاشىپ, قىزى حابارلاسۋعا تىرىسقاندا تەلەفون ءنومىرىن بۇعاتتاپ تاستاعان.
قارجى جاعدايىنىڭ اۋىرلىعىنا بايلانىستى مەكتەپ وقۋشىسى سوتقا جۇگىنىپ, اليمەنت ءوندىرۋدى تالاپ ەتتى. بارلىق شىعىندار اجەسىنىڭ موينىندا بولعاندىقتان, قاراجات تەك كۇندەلىكتى قاجەتتىلىككە عانا جەتكەن.
اليمەنت جۇيەسىن رەتتەيتىن زاڭ ماقۇلداندى
سوت وتىرىسىندا اكەسى تالاپتى ءىشىنارا قاناعاتتاندىرۋدى سۇراپ, باسقا نەكەدەن ءتورت بالاسى بار ەكەنىن جانە نەسيەلىك مىندەتتەمەلەرىن العا تارتتى. الايدا سوت ونىڭ بىرنەشە كاسىپتەن تابىس تاباتىنىن جانە ەڭبەككە قابىلەتتى ەكەنىن انىقتادى.
سونىمەن قاتار, سوت شەشىمى شىققان كۇنى ونىڭ جەكە كاسىپكەر رەتىندە تىركەۋدەن شىققانى جانە بۇعان دەيىن تاعى ءتورت بالانىڭ اكەلىگىن رەسمي مويىنداعانى بەلگىلى بولدى. سوت بۇل ارەكەتتەردى اليمەنت مولشەرىن ادەيى ازايتۋ ارەكەتى دەپ باعالادى.
ناتيجەسىندە تاراز قالالىق سوتى ونى قىزىنا وقۋىن اياقتاعانعا دەيىن اي سايىن 17 ايلىق ەسەپتىك كورسەتكىش (66 844 تەڭگە) كولەمىندە اليمەنت تولەۋگە مىندەتتەدى.
اتىراۋدا اليمەنت تولەمەگەندەردىڭ بەرەشەگى 3 ملرد تەڭگەدەن اسقان
اپەللياتسيالىق شاعىم ناتيجە بەرمەدى, جامبىل وبلىستىق سوتى شەشىمدى وزگەرىسسىز قالدىردى.
ۇكىم زاڭدى كۇشىنە ەندى.