ۇكىمەت يۋنەسكو جانە يسەسكو اياسىندا مادەني مۇرانى ساقتاۋ مەن ىلگەرىلەتۋدىڭ 2026-2028 جىلدارعا ارنالعان كەشەندى جوسپارىن بەكىتتى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى. بۇل قۇجات ۇلتتىق قۇندىلىقتاردى ساقتاۋ ءىسىن جۇيەلەپ قانا قويماي, ونى حالىقارالىق دەڭگەيدە كەڭىنەن تانىتۋعا باعىتتالعان ماڭىزدى باستاما رەتىندە باعالانىپ وتىر.
جوسپاردا تاريحي-مادەني ەسكەرتكىشتەردى ساقتاۋ, ماتەريالدىق ەمەس مادەني مۇرانى قولداۋ, ماماندار دايارلاۋ, سونداي-اق ەلىمىزدىڭ وسى سالاداعى حالىقارالىق باعدارلامالار مەن باستامالارعا قاتىسۋىن كەڭەيتۋ تۋرالى ناقتى شارالار كوزدەلگەن. نەگىزگى مىندەتتەردىڭ قاتارىندا دۇنيەجۇزىلىك مۇرا نىساندارىن قورعاۋ ساپاسىن ارتتىرۋ, ۇلتتىق مادەني قۇندىلىقتاردى حالىقارالىق دەڭگەيدە ىلگەرىلەتۋ, ساراپتامالىق جانە ءبىلىم بەرۋ بازاسىن دامىتۋ, سونداي-اق مادەني مۇرانى ساقتاۋ ىسىنە قوعامدى كەڭىنەن تارتۋ ماسەلەلەرى قامتىلعان.
كەشەندى جوسپار ءۇش نەگىزگى باعىتتى قامتيدى. ءبىرىنشىسى – ماتەريالدىق مادەني مۇرا نىساندارىن ساقتاۋ مەن ناسيحاتتاۋ. بۇل باعىت اياسىندا حالىقارالىق ماڭىزى بار ەسكەرتكىشتەردىڭ جاي-كۇيىنە تۇراقتى مونيتورينگ جۇرگىزۋ, ەلىمىزدەگى يۋنەسكو-نىڭ بۇكىلالەمدىك مۇرا نىساندارىن باسقارۋداعى ادىستەمەلىك قۇرال ازىرلەۋ, سونداي-اق مادەني مۇرا وبەكتىلەرىنىڭ الدىن الا ءتىزىمىن كەڭەيتۋ ارقىلى ولاردى حالىقارالىق دەڭگەيدە ىلگەرىلەتۋ كوزدەلىپ وتىر.
ەكىنشى باعىت – قازاق حالقىنىڭ ماتەريالدىق ەمەس مادەني مۇراسىن دامىتۋ مەن قولداۋ. بۇل رەتتە جويىلىپ كەتۋ قاۋپى بار ۇلتتىق قۇندىلىقتارعا ەرەكشە نازار اۋدارىلعان. اتاپ ايتقاندا, قازاقتىڭ كيىز ءۇيىن دايىنداۋ, بەزەندىرۋ ءداستۇرى, كىلەم توقۋ ونەرى, سونداي-اق ەلىمىزدىڭ بىرقاتار وڭىرىندە ساقتالعان تەرمە ەپيكالىق جانرى قورعاۋعا الىناتىن نەگىزگى ەلەمەنتتەردىڭ قاتارىندا.
ءۇشىنشى باعىت – يۋنەسكو-نىڭ «الەم جادى» باعدارلاماسىن ىلگەرىلەتۋ. بۇل باستاما تاريحي جادىنى ساقتاۋعا جانە قۇجاتتىق مۇرالاردى جۇيەلى تۇردە قورعاۋعا باعىتتالعان. جوسپاردا حالىقارالىق ىنتىماقتاستىقتى نىعايتۋعا دا ەرەكشە ءمان بەرىلگەن. اتاپ ايتقاندا, «جىبەك جولى: كاسپي – ەدىل ءدالىزى» نوميناتسياسىن دايىنداۋ بويىنشا ۆەدومستۆوارالىق جانە ساراپتامالىق كونسۋلتاتسيالار وتكىزۋ جوسپارلانعان. سونىمەن قاتار كوپۇلتتى «الپامىس باتىر» ەپوسىن يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگىزۋ ماقساتىندا ازەربايجان, تۇركيا, وزبەكستان جانە تۇرىكمەنستانمەن بىرلەسكەن جۇمىس جالعاسادى.
تاعى ءبىر ماڭىزدى باعىت – قازاقستاننىڭ يككروم, ياعني, مادەني قۇندىلىقتاردى ساقتاۋ مەن قالپىنا كەلتىرۋ ماسەلەلەرىن زەرتتەيتىن حالىقارالىق ورتالىققا كىرۋگە دايىندىق. بۇل قادام كاسىبي ىنتىماقتاستىقتى كەڭەيتىپ, مادەني مۇرا نىساندارىن ساقتاۋ مەن قالپىنا كەلتىرۋدە زاماناۋي تاسىلدەردى قولدانۋعا مۇمكىندىك بەرەدى.
كەشەندى جوسپاردىڭ ماڭىزدى بولىگى كادر دايارلاۋعا ارنالعان. يۋنەسكو-نىڭ ماتەريالدىق ەمەس مادەني مۇرانى قورعاۋ كونۆەنتسياسىن جۇزەگە اسىرۋ اياسىندا جىل سايىن كەمىندە 30 ساراپشى ارنايى وقىتۋدان وتەدى. سونىمەن قاتار حالىقارالىق ءبىلىم كورپوراتسياسىنىڭ باكالاۆريات جانە ماگيستراتۋرا باعدارلامالارى شەڭبەرىندە ەسكەرتكىشتەردى ساقتاۋ بويىنشا تۇجىرىمدامالىق جانە ەسكيزدىك جوبالار ازىرلەۋ قاراستىرىلعان.