باتىس قازاقستان وبلىسىندا ء«بىلىم بەرۋدى اقپاراتتاندىرۋ جانە جوبالاۋ ورتالىعى» اشىلىپ, وڭىردەگى ءبىلىم جۇيەسىن تسيفرلاندىرۋ مەن يننوۆاتسيالىق دامىتۋ باعىتىندا جۇيەلى جۇمىس باستالدى.
بۇل ورتالىقتىڭ قىزمەتى نەگىزگى ءتورت سالاعا باعىتتالىپ, زامان تالابىنا ساي ناقتى جوبالار جۇزەگە اسىپ جاتىر.
ء«بىزدىڭ ورتالىق ينفراقۇرىلىمدى دامىتىپ قانا قويماي, ءبىلىم سالاسىنا ستارتاپ فورماتىنداعى جاڭا باستامالاردى ەنگىزۋىمەن ەرەكشەلەنىپ كەلەدى. بۇل جوبالار ءبىلىم بەرۋدىڭ تيىمدىلىگىن ارتتىرىپ قانا قويماي, وڭىردە تسيفرلىق مادەنيەتتى قالىپتاستىرۋعا ىقپال ەتەدى. ءبىز جاڭاشىل باستامالار ارقىلى باتىس قازاقستان وبلىسىنداعى ءبىلىم جۇيەسىن جاڭا دەڭگەيگە كوتەرۋدى ماقسات ەتىپ وتىرمىز», دەيدى ورتالىق ديرەكتورى اقان بيجانوۆ.
ورتالىق قولعا العان ءبىرىنشى باعىت – ءبىلىم سالاسىن تسيفرلاندىرۋ جانە IT-ينفراقۇرىلىمدى دامىتۋ. بۇل باعىت اياسىندا «Smart School ZKO» ستارتاپ جوباسى ىسكە اسىرىلا باستادى. جوبا مەكتەپتەردىڭ تسيفرلىق ەكوجۇيەسىن قالىپتاستىرۋعا باعىتتالعان. ياعني ەلەكتروندىق جۋرنال, تسيفرلىق كىتاپحانا, بەينەباقىلاۋ جانە مەكتەپىشىلىك باسقارۋ جۇيەلەرى ءبىر پلاتفورماعا بىرىكتىرىلەدى. سونىمەن قاتار «IT Support 24/7» جوباسى ارقىلى ءبىلىم ۇيىمدارىنا تاۋلىك بويى تەحنيكالىق قولداۋ كورسەتەتىن جۇيە ىسكە قوسىلادى.
ەكىنشى باعىت – ءبىلىم مونيتورينگىلەۋ جانە تالداۋ. ورتالىق بۇل باعىتتا «Bilim Analytics» ستارتاپ جوباسىن جۇزەگە اسىرۋعا كىرىسكەن. بۇل جوبا ءبىلىم ۇيىمدارىنىڭ كورسەتكىشتەرىن اۆتوماتتى تۇردە جيناقتاپ, تالداۋعا مۇمكىندىك بەرەدى. جۇيە ارقىلى مەكتەپتەردىڭ رەيتينگى, ءبىلىم ساپاسى, قاتىسۋ دەڭگەيى سەكىلدى نەگىزگى ينديكاتورلار ناقتى ۋاقىت رەجىمىندە كورىنىپ تۇرادى. بۇل باسقارۋ شەشىمدەرىن جەدەل قابىلداۋعا جاعداي جاسايدى.
ورتالىقتىڭ ءۇشىنشى باعىتى – مەديا جانە اقپاراتتىق سۇيەمەلدەۋ. بۇل بويىنشا «EduMedia Hub» ستارتاپ جوباسى ىسكە قوسىلعان. جوبا اياسىندا مۇعالىمدەر مەن وقۋشىلارعا ارنالعان ساپالى تسيفرلىق كونتەنت (بەينەساباقتار, پودكاستتار, الەۋمەتتىك روليكتەر) ازىرلەنەدى. سونىمەن قاتار «Digital Teacher» باستاماسى ارقىلى پەداگوگتەردىڭ جەكە برەندىن دامىتۋعا, الەۋمەتتىك جەلىلەردە كاسىبي كونتەنت جۇرگىزۋگە قولداۋ كورسەتىلەدى.
ال سوڭعى, ءتورتىنشى باعىت – جوبالاۋ جانە يننوۆاتسيالىق باستامالارعا ارنالعان. بۇل باعىتتا «AI Mektep» قاناتقاقتى ستارتاپ جوباسى جۇزەگە اسىرىلىپ جاتىر. جوبا جاساندى ينتەللەكت ەلەمەنتتەرىن وقۋ ۇدەرىسىنە ەنگىزۋدى كوزدەيدى. اتاپ ايتقاندا, وقۋشىنىڭ ءبىلىم دەڭگەيىن تالدايتىن ءاداپتيۆتى جۇيەلەر, اۆتوماتتى تەكسەرۋ پلاتفورمالارى جانە تسيفرلىق اسسيستەنتتەر ەنگىزىلەدى. سونىمەن قاتار «Startup School ZKO» جوباسى ارقىلى وقۋشىلاردىڭ كاسىپكەرلىك جانە ستارتاپ مادەنيەتىن دامىتۋعا ەرەكشە كوڭىل بولىنەدى.
مىنە, مەملەكەت باسشىسى قاسىم-جومارت توقاەۆ جاريالاعان تسيفرلاندىرۋ جانە جاساندى ينتەللەكت جىلىندا اقجايىق وڭىرىندە وسىنداي جۇيەلى جۇمىس قولعا الىندى. اقان مالىك ۇلىنىڭ ايتۋىنشا, بۇل يگى باستامالاردىڭ جەمىسى كوپ كەشىكپەي كورىنە باستاۋعا ءتيىس.
باتىس قازاقستان وبلىسى