استانادا پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن ارالدى قۇتقارۋ حالىقارالىق قورىنىڭ (اقحق) باسقارما وتىرىسى ءوتتى.
وتىرىسقا تاجىكستان رەسپۋبليكاسى پرەمەر-ءمينيسترىنىڭ ورىنباسارى سۋلايمون زيەزودا, تۇرىكمەنستان مينيسترلەر كابينەتى توراعاسىنىڭ ورىنباسارى تانگرىگۋلى اتاحاللىەۆ, وزبەكستان رەسپۋبليكاسى پرەزيدەنتىنىڭ كەڭەسشىسى شۋحرات گانيەۆ, قازاقستان رەسپۋبليكاسى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ جانە اقحق اتقارۋ كوميتەتىنىڭ توراعاسى اسحات ورازباي قاتىستى.
قىرعىز رەسپۋبليكاسى وتىرىسقا باقىلاۋشى ەل رەتىندە قاتىستى. دەلەگاتسيانى سۋ رەسۋرستارى قىزمەتىنىڭ ديرەكتورى, ءمينيستردىڭ ورىنباسارى الماز جەەناليەۆ باسقاردى.
اتالعان وتىرىستىڭ ماڭىزى ەرەكشە. ول قازاقستان رەسپۋبليكاسىنىڭ اقحق توراعالىعىنىڭ قورىتىندى كەزەڭىندە ءوتىپ وتىر جانە قوردى قۇرعان مەملەكەتتەر باسشىلارى كەڭەسىنىڭ وتىرىسىنا دايىندىقتىڭ نەگىزگى كەزەڭى بولىپ سانالادى.
«ەلدەرىمىزدىڭ بىرلەسكەن جۇمىسى مەن مەملەكەت باسشىلارىنىڭ ساياسي ەرىك-جىگەرىنىڭ ارقاسىندا ترانسشەكارالىق سۋ رەسۋرستارىن باسقارۋ جانە ارال تەڭىزى باسسەينىندەگى جاعدايدى جاقسارتۋعا باعىتتالعان وڭىرلىك باستامالاردى ىلگەرىلەتۋ بويىنشا تۇراقتى ءوزارا ءىس-قيمىل جۇيەسىن ساقتاپ قالا الدىق. وتكەن كەزەڭدە قوردىڭ جۇيەلى جۇمىسىن قامتاماسىز ەتىپ, سىندارلى ديالوگتى ساقتاۋعا جانە بىرقاتار ماڭىزدى باستامانى ىلگەرىلەتۋگە قول جەتكىزدىك. بۇگىنگى كەزدەسۋ الداعى ۋاقىتتا مەملەكەت باسشىلارىنىڭ قاراۋىنا ۇسىنىلاتىن نەگىزگى ماسەلەلەر بويىنشا كەلىسىلگەن تاسىلدەرگە كەلۋگە مۇمكىندىك بەرەدى دەپ سەنەمىن», - دەدى ق.بوزىمباەۆ iس-شارانى اشۋ بارىسىندا.
وتىرىس قورىتىندىسى بويىنشا بەس بىرلەسكەن شەشىمگە قول قويىلدى. اتاپ ايتقاندا, 2026 جىلعى 22 ساۋىردە استانادا وتەتىن قوردى قۇرۋشى مەملەكەتتەر باسشىلارى كەڭەسىنىڭ الداعى وتىرىسىنا دايىندىق, ەسەپتى كەزەڭدەگى اقحق اتقارۋ كوميتەتىنىڭ قورىتىندى جۇمىسى, سونداي-اق قوردىڭ ۇيىمداستىرۋشىلىق قۇرىلىمى مەن شارتتىق-قۇقىقتىق بازاسىن جەتىلدىرۋ ماسەلەلەرى بويىنشا شەشىمدەر قابىلداندى.
سونىمەن قاتار اقحق اتقارۋ كوميتەتى مەن حالىقارالىق دامۋ سەرىكتەستەرىنىڭ بىرلەسكەن باعدارلامالاردى جۇزەگە اسىرۋداعى قىزمەتىن ۇيلەستىرۋ ءتارتىبىن رەتتەيتىن قۇجات جانە قور باسقارماسىنىڭ كەلەسى وتىرىسىنىڭ كۇن ءتارتىبى بەكىتىلدى.
بۇدان بولەك, سىرداريا وزەنى باسسەينىندە سۋ رەسۋرستارىن ەسەپكە الۋ, مونيتورينگ جۇرگىزۋ, باسقارۋ جانە ءبولۋدىڭ بىرىڭعاي اۆتوماتتاندىرىلعان جۇيەسىن ەنگىزۋ جونىندەگى جۇمىس جوسپارىنىڭ جوباسىن ازىرلەۋ, سونداي-اق 2026–2036 جىلداردى «ورتالىق ازيادا سۋدى ۇتىمدى پايدالانۋ بويىنشا پراكتيكالىق ءىس-قيمىلدار ونجىلدىعى» دەپ جاريالاۋ ماسەلەلەرى قارالىپ, نازارعا الىندى.