پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن ينفلياتسيانى تۇراقتاندىرۋ تۋرالى كەزەكتى كەڭەستە ءبىرىنشى توقساننىڭ الدىن الا قورىتىندىسى قارالدى.
ساۋدا جانە ينتەگراتسيا مينيسترلىگىنىڭ مالىمەتىنشە, ناۋرىز ايىندا الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ ورتاشا ءوسۋ يندەكسى 0,3%-دى قۇرادى. بۇل وتكەن جىلدىڭ ناۋرىز ايىمەن سالىستىرعاندا ءۇش ەسە تومەن. جالپى العاندا, ءبىرىنشى توقساندا باعا ءوسىمى 1,2% بولدى, بۇل دا 2025 جىلدىڭ وسى كەزەڭىندەگى دەڭگەيدەن ءۇش ەسە تومەن. وسى ديناميكا باعا ءوسىمىنىڭ تۇراقتى باياۋلاۋىن كورسەتەدى.
كەڭەستە رەسمي ستاتيستيكا تۇتىنۋ باعالارى يندەكسىن ەسەپتەۋدىڭ حالىقارالىق ادىستەمەسىنە سايكەس قالىپتاستىرىلاتىنى ءارى 537 تاۋار مەن قىزمەت ءتۇرىن قامتيتىنى ايتىلدى. مونيتورينگ بۇكىل ەل ىشىندە 12 مىڭنان استام ساۋدا نىسانىندا جۇرگىزىلەدى. ىشكى ساۋدا جۇيەسىندە شامامەن 760 مىڭ كاسىپكەرلىك سۋبەكتىسى جۇمىس ىستەيدى, ولاردىڭ 300 مىڭنان استامى ازىق-ت ۇلىك ونىمدەرىن ساتۋمەن اينالىسادى.
باعانىڭ نەگىزگى تومەندەۋى كوكونىس توبى بويىنشا تىركەلدى. قىرىققابات 1,9%-عا, قىزاناق 2,6%-عا, پياز 10,9%-عا, قيار 22,6%-عا ارزاندادى. جىل باسىنان بەرى قيار باعاسى 31,1%-عا تومەندەدى. ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆانىڭ ايتۋىنشا, نارىقتى وتاندىق ونىممەن قامتۋ كوبىنە جىلىجاي شارۋاشىلىعى ارقاسىندا جاقسى ىسكە استى. بىلتىرعى قورىتىندىدا جىلىجايلاردىڭ جالپى الاڭى 1,33 مىڭ گەكتاردى قۇراپ, 2024 جىلمەن سالىستىرعاندا 12,6 گەكتارعا ارتتى. نەگىزگى ءوسىمدى فەرمەرلىك جىلىجايلار بەرگەن. 713,3 گەكتاردان 799,4 گەكتارعا دەيىن ارتقان.
«قازىر مينيسترلىك ونەركاسىپتىك جىلىجايلارمەن قىزاناق پەن قيار باعاسىن تۇراقتاندىرۋ جونىندە مەموراندۋم جاساسۋ اياسىندا كەلىسسوزدەر جۇرگىزىپ جاتىر», دەپ حابارلادى ايجان بيجانوۆا.
وعان قوسىمشا «قتج» ۇك» اق الەۋمەتتىك ماڭىزى بار ازىق-ت ۇلىك تاۋارلارىنىڭ بارلىق ءتۇرىن, سونداي-اق الەۋمەتتىك نان وندىرۋگە ارنالعان ۇندى تاسىمالداۋدا تەمىرجول تاريفتەرىنە ايتارلىقتاي جەڭىلدىك بەرۋ ماسەلەسىن پىسىقتاماق. كوكتەمدە ەرتە پىسەتىن كوكونىستەرگە باعانىڭ ماۋسىمدىق ءوسۋى ەسكەرىلە وتىرىپ, ەل نارىعىنداعى وتكەن جىلعى ءونىم قورى مەن باسقا ەلدەردەن جەتكىزىلەتىن ەرتە پىسەتىن ونىمدەردىڭ جاعدايى دا ءوز الدىنا بولەك قارالدى. قازىر تۇراقتاندىرۋ قورلارىنداعى وتكەن جىلعى ءونىم قورلارى قارقىندى تۇردە ساتىلىپ جاتىر. اۋىل شارۋاشىلىعى مينيسترلىگىنىڭ دەرەكتەرىنە سايكەس, ولاردىڭ قالدىعى جالپى قور كولەمىنىڭ شامامەن 24%-ىن قۇرايدى.
ناۋرىز ايىنىڭ باسىنان باستاپ ەلدىڭ ىشكى نارىعىنا قىتايدان جاڭا كوكونىستىڭ كۇندەلىكتى جەتكىزۋ ۇيىمداستىرىلدى. قازىر 3 200 توننا كارتوپ, 800 توننا ءسابىز, 14 توننا اق قىرىققابات جەتكىزىلدى. 31 ناۋرىز كۇنى ساۋدا جانە ينتەگراتسيا مينيسترلىگىنىڭ ساۋدا كوميتەتى, وڭىرلىك اكك, ءىرى ساۋدا جەلىلەرى, KTZ-Express, QazTrade وكىلدەرىنەن قۇرالعان دەلەگاتسيا ەرتە پىسەتىن ونىمدەردى ساتىپ الۋ ماقساتىندا وزبەكستاننىڭ وڭتۇستىك وڭىرلەرىنە بارادى.
باعانىڭ تومەندەۋىنە ناۋرىز مەيرامى كەزەڭىندە وتكەن مەرەكەلىك جارمەڭكەلەر دە قوسىمشا اسەر ەتتى. ەل بويىنشا مەرەكە كۇندەرى 200-دەن استام تاقىرىپتىق جارمەڭكە وتكىزىلدى. جالپى, جىل باسىنان بەرى 1,5 مىڭ جارمەڭكە ۇيىمداستىرىلدى. Nauryz sale اكتسياسىنا 70%-عا دەيىنگى جەڭىلدىك ۇسىنعان 300 ساۋدا سۋبەكتىسى قاتىسىپ, 4 ميلليوننان استام ادام قامتىلدى.