پرەمەر-مينيستر ولجاس بەكتەنوۆ حالىقارالىق ارالدى قۇتقارۋ قورىنىڭ(حاقق) باسقارما مۇشەلەرىمەن كەزدەسۋ وتكىزدى. سونداي-اق ەلىمىز اتالعان قورعا توراعالىق ەتۋىن بيىل اياقتايدى.
جيىنعا تاجىكستان رەسپۋبليكاسى پرەمەر-ءمينيسترىنىڭ ورىنباسارى سۋلايمون زيوزودا, تۇرىكمەنستان مينيسترلەر كابينەتى توراعاسىنىڭ ورىنباسارى تانگرىگۋلى اتاحاللىەۆ, وزبەكستان پرەزيدەنتىنىڭ كەڭەسشىسى شۋحرات گانيەۆ, سۋ شارۋاشىلىعى ءمينيسترى شاۆكات حامراەۆ, قىرعىز رەسپۋبليكاسىنىڭ سۋ رەسۋرستارى, اۋىل شارۋاشىلىعى جانە قايتا وڭدەۋ ونەركاسىبى ءمينيسترىنىڭ ورىنباسارى – مينيسترلىك جانىنداعى سۋ رەسۋرستارى قىزمەتىنىڭ ديرەكتورى الماز جەەناليەۆ, حالىقارالىق ارالدى قۇتقارۋ قورى اتقارۋشى كوميتەتىنىڭ توراعاسى اسحات ورازباي, سونداي-اق ەلىمىزدىڭ سالالىق مينيسترلىكتەرى مەن ۆەدومستۆو باسشىلارى قاتىستى.
سۋ شارۋاشىلىعى سالاسىنداعى وڭىرلىك ىنتىماقتاستىقتى ءارى قاراي دامىتۋ, قور قىزمەتىنىڭ تيىمدىلىگىن ارتتىرۋ, سونداي-اق بيىلعى 22 ساۋىردە استانادا وتەتىن حاقق-عا مۇشە مەملەكەتتەر باسشىلارى كەڭەسىنىڭ وتىرىسىنا دايىندىق ماسەلەلەرى قارالدى.
ولجاس بەكتەنوۆ ۇلتتىق قۇرىلتايدىڭ V وتىرىسىندا مەملەكەت باسشىسى قاسىم-جومارت توقاەۆ ايقىنداعان ارالدى قۇتقارۋ جانە ترانسشەكارالىق سۋ رەسۋرستارىن تۇراقتى باسقارۋ ماسەلەلەرى باسىم باعىتتار قاتارىندا ەكەنىن اتاپ ءوتتى. حاقق وتىز جىلدان استام ۋاقىت بويى ورتالىق ازيا مەملەكەتتەرىنىڭ سۋ, ەكولوگيالىق جانە الەۋمەتتىك-ەكونوميكالىق سالالارداعى ءوزارا ارەكەتتەسۋىنىڭ نەگىزگى وڭىرلىك الاڭى بولىپ وتىرعانى باسا ايتىلدى.
«مۇندا سىرداريا جانە ءامۋداريا وزەندەرى باسسەيندەرىندە سۋ رەسۋرستارىن ەسەپكە الۋ, مونيتورينگ جۇرگىزۋ مەن بولۋدە بىرىڭعاي اۆتوماتتاندىرىلعان جۇيەنى كەزەڭ-كەزەڭىمەن ەنگىزۋ تۋرالى ءسوز بولىپ وتىر. تسيفرلاندىرۋ مەن ەسەپكە الۋ سۋ پايدالانۋدىڭ اشىقتىعىن قامتاماسىز ەتەدى دەپ ويلايمىن. سەنىمدى دەرەكتەردىڭ بولۋى مەن بىرلەسكەن مونيتورينگ مەملەكەتتەر اراسىنداعى سەنىمنىڭ نەگىزى ءارى سۋ رەسۋرستارىن باسقارۋدىڭ تيىمدىلىگىن ارتتىرۋعا مۇمكىندىك بەرەدى», دەدى و.بەكتەنوۆ.
قازىرگى زامانعى شارتتىق-قۇقىقتىق بازانى قالىپتاستىرۋ اياسىندا ەلىمىز ورتالىق ازيانىڭ سۋ رەسۋرستارىن پايدالانۋ جونىندەگى نەگىزدەمەلىك كونۆەنتسياسىن پىسىقتاۋدى قولدايدى. قۇجات سۋ رەسۋرستارىن ۇتىمدى پايدالانۋ, ترانسشەكارالىق زياننىڭ الدىن الۋ ءارى گيدرولوگيالىق اقپارات الماسۋدى دامىتۋداعى كەلىسىلگەن قاعيداتتاردى بەكىتۋگە ءتيىس.
پرەزيدەنت قاسىم-جومارت توقاەۆ جاھاندىق سۋ ماسەلەلەرىن شەشۋ ءۇشىن بىرىككەن ۇلتتار ۇيىمى اياسىندا حالىقارالىق سۋ ۇيىمىن قۇرۋدى ۇسىندى. بۇل باستاما كۇش-جىگەردى بىرىكتىرۋگە جانە قوسىمشا رەسۋرستاردى تارتۋعا, سونىڭ ىشىندە وڭىرلىك جوبالاردى جۇزەگە اسىرۋعا مۇمكىندىك بەرەدى.
كەزدەسۋ بارىسىندا قور جۇمىسىنىڭ تيىمدىلىگىن ارتتىرۋ, ونىڭ ينستيتۋتتارى اراسىنداعى ۇيلەستىرۋدى كۇشەيتۋ ماقساتىندا حالىقارالىق ارالدى قۇتقارۋ قورىنىڭ ۇيىمداستىرۋشىلىق قۇرىلىمىن جانە شارتتىق-قۇقىقتىق بازاسىن جەتىلدىرۋ ماسەلەلەرىنە ەرەكشە نازار اۋدارىلدى. سونداي-اق الداعى حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارى كەڭەسىنىڭ وتىرىسى قارساڭىندا نەگىزگى ماسەلەلەردە كەلىسىلگەن تاسىلدەردى ازىرلەۋدىڭ ماڭىزدىلىعى اتاپ ءوتىلدى.
كەزدەسۋ قورىتىندىسى بويىنشا تاراپتار سىندارلى ديالوگتى جالعاستىرۋعا, سۋ ديپلوماتياسىن دامىتۋعا جانە ءوڭىردىڭ سۋ رەسۋرستارىن تۇراقتى باسقارۋعا, سونداي-اق ارال تەڭىزى باسسەينىندەگى ەكولوگيالىق احۋالدى جاقسارتۋعا باعىتتالعان ورتاق شەشىمدەردى بىرلەسىپ ىزدەۋگە مۇددەلى ەكەنىن راستادى.