بايلانىس – ادامزاتتىڭ بۇگىنگى ءومىرىنىڭ اجىراماس بولشەگىنە اينالعان سالا. ءباسپاسوز وكىلدەرىمەن قاتار كەلەتىن بايلانىس كۇنىندە شىعىس قازاقستان وبلىستىق تەلەكوممۋنيكاتسيا ديرەكتسياسىنىڭ باس ديرەكتورى ەرمەك قۋانىشبەكوۆپەن اڭگىمەلەسكەن ەدىك. كاسىپورىن باسشىسى وڭىردە بايلانىس سالاسىنىڭ وركەندەپ كەلە جاتقانىن, «ايشىلىق الىس جەرلەردەن جىلدام حابار العىزعان» جاڭا تەحنولوگيامەن قامتۋ جونىندە جۇيەلى جۇمىستار جاسالىپ جاتقانىن جەتكىزدى.
– ەرمەك بولات ۇلى, ەلىمىزدىڭ ءىرى ەكونوميكالىق ايماقتارىنىڭ ءبىرى – شىعىس قازاقستان وڭىرىندەگى بايلانىس سالاسىنا باسشىلىق قىزمەتكە تاعايىندالعانىڭىزعا كوپ ۋاقىت وتە قويعان جوق. جەدەلدىكتى ۇناتاتىن سالا ايماقتا قانشالىقتى جولعا قويىلىپ وتىر؟
– ەلىمىزدە «اقپاراتتىق قازاقستان – 2020» مەملەكەتتىك باعدارلاماسى قابىلدانعانىن بىلەسىزدەر. اتالعان باعدارلامانى ءجۇزەگە اسىرۋ شەڭبەرىندە «قازاقتەلەكوم» اق شىعىس قازاقستان وڭىرىندە كوپقاباتتى ۇيلەردە وپتيكالىق كابەل تالشىقتارى جەلىسىن ورناتۋ جوباسىن جۇزەگە اسىرىپ جاتىر. ايتالىق, 2014 جىلى وڭىرىمىزدەگى وبلىستىق دارەجەسى بار ەكى قالادا, اتاپ ايتقاندا, وسكەمەن مەن سەمەي قالالارىنداعى كوپقاباتتى ۇيلەردە وپتيكالىق كابەل تالشىقتارى جەلىسىنىڭ قۇرىلىسى اياقتالدى. بۇل قالالاردا ءار بەسىنشى وتباسى جەدەل ينتەرنەت قۇرىلعىلارىنا يە دەۋىمىزگە بولادى. بۇل كورسەتكىش اي سايىن ارتپاسا, كەمىگەن جوق.
كەلەسى كەزەڭدە, ياعني اعىمداعى جىلى ريددەر مەن زىريان قالالارىندا GPON تەحنولوگياسى بويىنشا كەڭجولاقتى ينتەرنەتتى دامىتۋ ءۇشىن جەلى قۇرىلىسى ءجۇرگىزىلىپ, جىل سوڭىنا دەيىن العاشقى ابونەنتتەرگە قوسىلاتىن بولادى.
– وڭىرىمىزدە ينتەرنەت قىزمەتى سولعىن اۋدانداردىڭ ءبىرى اباي اۋدانى ەكەنىن بىلەمىز. ابايلىقتار ساپالى ينتەرنەت قىزمەتىنە قاشان قول جەتكىزەدى؟
– «قازاقتەلەكوم» اق شىعىس قازاقستان وبلىسى فيليالىنىڭ تاعى ءبىر ماڭىزدى جەتىستىگى رەتىندە وپتيكالىق كابەل تالشىقتارى جەلىسى قۇرىلىسىنىڭ بارلىق جەردە جاپپاي جۇرگىزىلىپ جاتقانىن ايتار ەدىم. بۇل ستراتەگيالىق باعدارلاما ءوڭىردىڭ ءاربىر اۋدان ورتالىقتارىنا جەتكىزىلدى. 2007 جىلى باستالعان باعدارلاما بيىل تولىعىمەن اياقتالادى. ءسىز ايتقان اباي اۋدانىنىڭ ورتالىعى – قاراۋىل اۋىلى جاقىندا, جاز ماۋسىمىنىڭ سوڭىندا اتالعان جەلىنىڭ نەگىزگى ماگيسترالىنە قوسىلادى. وسىلايشا, اۋدان ورتالىقتارىن ساندىق جۇيەگە كوشىرۋ 100 پايىزعا تولىعىمەن ورىندالادى. بۇل جوبا كەڭ جولاقتى ينتەرنەت قىزمەتىن ۇسىنىپ قانا قويمايدى. سونىمەن بىرگە, اۋدان ورتالىقتارىنىڭ تۇرعىندارى ينتەراكتيۆتى ساندىق تەلەديدار كورۋگە مۇمكىندىك الادى جانە اۋدان حالقىنىڭ كومپيۋتەرلىك ساۋاتىن كوتەرۋگە ايتارلىقتاي ۇلەس قوسادى دەگەن ويدامىز.
– بۇگىندە ۇيالى بايلانىس وپەراتورلارى ۋاقىتپەن, نارىقپەن بىرگە جەتىلىپ كەلە جاتقانى ايقىن. قالالىق, اۋىلدىق تەلەفوندار قاجەت بولماۋعا اينالدى...
– جىل سايىن حالىققا عانا ەمەس, سونىمەن بىرگە زاڭدى تۇلعالارعا ارنالعان جاڭا تەحنولوگيا مەن قىزمەت تۇرلەرى ەنگىزىلۋدە. ولارعا كورسەتىلەتىن قىزمەت ساپاسى دا جاقسارىپ كەلەدى. FMS شەشىم بازاسىندا «امبەباپ نومەر» اتتى جاڭا قىزمەت ءتۇرىن ۇسىنۋ باستالعانىن ايتقىم كەلەدى. بۇل – قالالىق جانە ءموبيلدى نومەرلەردى بىرىكتىرۋمەن بىرگە ەلىمىز بويىنشا شەكتەۋسىز قوڭىراۋ شالۋعا مۇمكىندىك بەرەدى. اتالعان قىزمەت ءتۇرى وسكەمەن مەن سەمەي قالالارىنان وزگە ريددەر, سەرەبريانسك قالالارى مەن گلۋبوكوە كەنتىن قامتىپ وتىر. جىل سوڭىنا دەيىن وسى قىزمەت ءتۇرىن وبلىستىڭ بارلىق اۋدان ورتالىقتارىنىڭ تۇرعىندارى پايدالانىپ, وزدەرىنىڭ باعاسىن بەرەتىن بولادى.
دەرەك رەتىندە ايتار بولساق, 2015 جىلدىڭ 1 ماۋسىمىنداعى مالىمەت بويىنشا, شىعىس قازاقستان وڭىرىندە 749 ەلدى مەكەن تەلەفونمەن قامتىلىپ, 467 اۋىل كەڭ جولاقتى ينتەرنەتكە قول جەتكىزدى. تىركەلگەن تەلەفون قىزمەتىنە 385 مىڭ ابونەنت قوسىلسا, 123 مىڭنان استام ابونەنت (2013 جىلدان بەرى 17 پايىزعا وسكەن) كەڭ جولاقتى ينتەرنەت جەلىسىن پايدالانادى. ونىڭ ىشىندە 44 مىڭ ابونەنت (2013 جىلدان بەرى 64 پايىزعا وسكەن) «ID Net» قىزمەتىن پايدالانسا, 20 مىڭنان استام ابونەنت (2013 جىلدان بەرى 56 پايىزعا وسكەن) «ID TV» قىزمەتىنە قوسىلعان جانە 12 مىڭنان اسا ابونەنت (2013 جىلدان بەرى 104 پايىزعا وسكەن) «ID Phone» قىزمەتىنىڭ تۇتىنۋشىسى اتاندى. بۇگىندە 3 مىڭنان استام ابونەنت «امبەباپ نومەر» قىزمەتىنىڭ ارتىقشىلىقتارىنا كوز جەتكىزىپ ۇلگەردى.
مۇنىڭ بارلىعى بايلانىس ماماندارىنىڭ ءتيىمدى تەحنولوگياعا يەك ارتا وتىرىپ, تىنىمسىز جۇمىس ىستەۋىنىڭ ناتيجەسى دەپ ويلايمىن. سونىڭ ناتيجەسىندە, شىعىس قازاقستان وبلىستىق تەلەكوممۋنيكاتسيا ديرەكتسياسى 2014 جىلى «قازاقتەلەكوم» اق-تىڭ ۇزدىك فيليالى دەپ تانىلدى. سونداي-اق, بىلتىر فيليالىمىزدىڭ 2 قىزمەتكەرى قازاقستان رەسپۋبليكاسى اقپارات جانە بايلانىس اگەنتتىگىنىڭ قۇرمەت گراموتالارىمەن ماراپاتتالىپ, 1 قىزمەتكەرىمىز «جىلدىڭ ۇزدىك قىزمەتكەرى» اتتى ۇجىمدىق ماراپاتقا يە بولدى. ءۇش بىردەي قىزمەتكەرىمىز قازاقستان رەسپۋبليكاسىنىڭ ينۆەستيتسيا جانە دامۋ مينيسترلىگىنىڭ «ۇزدىك بايلانىسشى» اتاعىمەن, كاسىپورىندا 20 جىلدان ارتىق جۇمىس ىستەگەن 37 قىزمەتكەرىمىز «قازاقتەلەكوم» اق 20 جىلدىق مەرەيتويلىق بەلگىسىمەن ماراپاتتالدى.
اڭگىمەلەسكەن
دۋمان اناش,
«ەگەمەن قازاقستان»
شىعىس قازاقستان وبلىسى.