يتاليانىڭ پارما قالاسى ماڭىنداعى مۇراجايدا الەمگە ايگىلى سۋرەتشىلەردىڭ قۇندى كارتينالارى ۇرلاندى. ۇرلىق قىسقا ۋاقىت ىشىندە, بار بولعانى ءۇش مينۋتتا جۇزەگە اسقان, دەپ حابارلايدى Egemen.kz.
22 ناۋرىز كۇنى ءتورت بەتپەردە كيگەن ادام Magnani Rocca Foundation عيماراتىنا باسىپ كىرىپ, پەر-وگيۋست رەنۋاردىڭ «Les Poissons», پول سەزانننىڭ «Still Life with Cherries» جانە انري ءماتيستىڭ «Odalisque on the Terrace» اتتى كارتينالارىن الىپ كەتكەن.
پوليتسيانىڭ مالىمەتىنشە, قىلمىسكەرلەر مۇراجايعا كۇشپەن كىرىپ, ىشكى بولمەلەردىڭ بىرىنەن ونەر تۋىندىلارىن ۇرلاعان. قىلمىستىق توپ وتە جىلدام ارەكەت ەتىپ, نەبارى 3 مينۋت ىشىندە عيماراتتان شىعىپ كەتكەن. الايدا ولاردىڭ جوسپارى مۇراجايدىڭ دابىل جۇيەسى ىسكە قوسىلعاننان كەيىن ءۇزىلىپ, باسقا كارتينالاردى الىپ كەتۋ مۇمكىن بولماي قالعان.
مۇراجاي باسشىلىعى ۇرىلاردىڭ ارەكەتى «جۇيەلى ءارى ۇيىمداسقان» تۇردە بولعانىن اتاپ ءوتتى. قىلمىسكەرلەردىڭ ماقساتى تەك 3 كارتينامەن شەكتەلمەگەن, الايدا قاۋىپسىزدىك جۇيەسىنىڭ ىسكە قوسىلۋى ولاردىڭ جوسپارىن توقتاتتى.
كارتينالاردىڭ جالپى قۇنى شامامەن 9 ملن ەۋروعا (شامامەن 7,8 ملن فۋنت ستەرلينگ) باعالانىپ وتىر. اسىرەسە, قۇنى 6 ملن ەۋروعا جۋىق رەنۋاردىڭ تۋىندىسى ەڭ قىمبات كارتينالاردىڭ ءبىرى سانالادى.
قازىرگى تاڭدا وقيعاعا قاتىستى يتاليانىڭ قۇقىق قورعاۋ ورگاندارى, سونىڭ ىشىندە كارابينەرلەر جانە بولونياداعى مادەني مۇرالاردى قورعاۋ ءبولىمى تەرگەۋ جۇرگىزىپ جاتىر. ۇرىلاردىڭ عيمارات قورشاۋىنان اسىپ قاشقانى انىقتالعان.
لۋۆردان قۇندى جادىگەر ۇرلاعاندار قالاي قۇرىقتالدى؟
ۇرلانعان كارتينالار الەمدىك ونەر تاريحىندا ەرەكشە ورىن الادى. پەر-وگيۋست رەنۋار (Pierre-Auguste Renoir) يمپرەسسيونيزم باعىتىنىڭ نەگىزىن قالاۋشىلاردىڭ ءبىرى بولسا, پول سەزان (Paul Cézanne) پوستيمپرەسسيونيزمنىڭ كورنەكتى وكىلى سانالادى. ال انري ماتيس (Henri Matisse) حح عاسىرداعى مودەرنيستىك ونەردىڭ ءىرى تۇلعالارىنىڭ ءبىرى رەتىندە تانىمال.
تەرگەۋ جالعاسىپ جاتىر, ال ۇرلانعان ونەر تۋىندىلارىنىڭ تاعدىرى ازىرگە بەلگىسىز.
ديماش قۇدايبەرگەن 70 اسپابىن مۋزەيگە تاپسىردى