قازاقستان رەسپۋبليكاسىنىڭ سانكت-پەتەربۋرگ قالاسىنداعى باس كونسۋلدىعى ۋست-لۋگاداعى ۆاحتالىق كەنتتە بولعان وقيعاعا قاتىستى رەسمي مالىمەت تاراتىپ, وتاندىق ازاماتتاردىڭ جاعدايى باقىلاۋدا ەكەنىن ءمالىم قىلدى, دەپ حابارلايدى Egemen.kz.
2026 جىلعى 28 ناۋرىزدا كونسۋلدىق قىزمەتكەرلەرى اتالعان كەنتتە ەڭبەك ەتىپ جۇرگەن قازاقستان ازاماتتارىمەن, سونىڭ ىشىندە تۇرمىستىق جانجال سالدارىنان ۇستالعان ازاماتتارمەن كەزدەسۋ وتكىزدى. ۋست-لۋگاداعى ۆاحتالىق كەنتتە شامامەن 15 مىڭعا جۋىق ادام تۇرادى, ولاردىڭ بارلىعى رەسەيدەگى ءىرى ەكسپورتتىق پورت قۇرىلىسىنا تارتىلعان ءتۇرلى مەردىگەر ۇيىمداردىڭ قىزمەتكەرلەرى.
الدىن الا مالىمەتكە سايكەس, تارتىپسىزدىكتەرگە بىرنەشە ءجۇز ادام قاتىسقان. وقيعادان كەيىن ءارتۇرلى ەلدەردىڭ 30-دان استام ازاماتى ۇستالدى. تەرگەۋدىڭ باستاپقى كەزەڭى اياقتالعان سوڭ, ۇستالعانداردىڭ باسىم بولىگى بوساتىلعان. دەگەنمەن, بىرقاتار ازاماتتارعا, ونىڭ ىشىندە قازاقستان ازاماتتارىنا قاتىستى 10 تاۋلىككە اكىمشىلىك قاماۋ تۋرالى سوت شەشىمى شىقتى. سونىمەن قاتار قازاقستاننىڭ تاعى 3 ازاماتىنا قاتىستى تەرگەۋ امالدارى جالعاسىپ جاتىر.
كونسۋلدىقتىڭ مالىمەتىنشە, قازاقستان ازاماتتارى اراسىندا زارداپ شەككەندەر نەمەسە مەديتسينالىق كومەككە مۇقتاج جاندار جوق. بارلىق ازاماتتارعا قاجەتتى كونسۋلدىق-قۇقىقتىق كومەك تولىق كولەمدە كورسەتىلىپ وتىر.
اتىراۋداعى تۇرمەدە تۇتقىن توبەلەستەن كەيىن كوز جۇمدى
وقيعادان كەيىن ۆاحتالىق كەنتتىڭ وزىندە ارنايى كەزدەسۋ ۇيىمداستىرىلىپ, وعان كومپانيا قىزمەتكەرلەرى, وتاندىق جۇمىسشىلار مەن ۋچاسكە بريگاديرلەرى, رەسەي فەدەراتسياسىنىڭ قۇقىق قورعاۋ ورگاندارى, جۇمىس بەرۋشى جانە كۇزەت ۇيىمدارىنىڭ وكىلدەرى قاتىستى. جيىندا ورىن العان جاعداي جان-جاقتى تالقىلانىپ, وسىنداي كەلەڭسىزدىكتەردىڭ الدىن الۋ شارالارى قاراستىرىلدى.
قازىرگى ۋاقىتتا ۆاحتالىق كەنتتەگى احۋال تۇراقتى. وقيعاعا قاتىسقان تاراپتارعا قاتىستى تەرگەۋ ءىس-شارالارى جالعاسىپ جاتىر. ونىڭ قورىتىندىسى بويىنشا جانجالعا قاتىسۋشىلاردىڭ ارەكەتتەرىنە قۇقىقتىق باعا بەرىلەدى.
رەسەيدە قازاقستاندىقتار قاتىسقان جاپپاي توبەلەس جايلى جاڭا دەرەكتەر شىقتى