شىمكەنتتە وتكەن «Digital Qazaqstan» فورۋمىندا مەملەكەتتىك قارجى جۇيەسىن جەتىلدىرۋگە باعىتتالعان جاڭا تسيفرلىق شەشىمدەر كوپشىلىك نازارىنا ۇسىنىلدى. قارجى مينيسترلىگى ەلەكتروندىق قارجى ورتالىعىمەن بىرلەسىپ ازىرلەگەن «مەملەكەتتىك قارجىنىڭ تسيفرلىق كارتاسى» ءمودۋلى تاۋار اينالىمىن تالداۋدىڭ جاڭا مۇمكىندىكتەرىن اشىپ, ەكونوميكالىق ۇدەرىستەردى جەدەل باعالاۋعا جول بەرمەكشى.
فورۋمدا قارجى مينيسترلىگى ەلەكتروندىق قارجى ورتالىعىمەن بىرلەسىپ جۇزەگە اسىرعان «ە-قارجىمينى» اقپاراتتىق جۇيەسىندەگى «مەملەكەتتىك قارجىنىڭ تسيفرلىق كارتاسى» ءمودۋلىنىڭ مۇمكىندىكتەرىن تانىستىردى. جاڭا قۇرال ەلىمىزدەگى تاۋار اينالىمىنىڭ تۇتاس كورىنىسىن قالىپتاستىرىپ, وڭىرلەر بولىنىسىندە قولجەتىمدى ءارى ناقتى اناليتيكا جاساۋعا مۇمكىندىك بەرەدى.
وزىق شەشىم قازاقستان كارتاسى نەگىزىندە بولشەك ساۋدا كورسەتكىشتەرىن ۆيزۋاليزاتسيالاپ, كەڭ اۋقىمدى تالداۋ جۇرگىزۋگە جاعداي جاسايدى. جۇيە باقىلاۋ-كاسسالىق ماشينالار دەرەكتەرىن, ساۋدا نىساندارى مەن اكىمشىلىك-اۋماقتىق بىرلىكتەردى قامتىپ, بىرىڭعاي اناليتيكالىق بازا قالىپتاستىرادى. ءارتۇرلى كەزەڭدەر بويىنشا سالىستىرمالى دەرەكتەردى سارالاۋعا, تاۋارلار رەيتينگىن ايقىنداۋعا, وڭىرلىك ەرەكشەلىكتەردى باعالاۋعا مۇمكىندىك بار.
قولدانىستاعى نۇسقادا تالداۋ فيسكالدىق چەكتەر نەگىزىندە جۇرگىزىلەدى. الداعى ۋاقىتتا ەلەكتروندىق شوت-فاكتۋرالار مەن تاۋارلارعا ىلەسپە جۇكقۇجاتتاردى بىرىكتىرۋ جوسپارلانعان. بۇل دەرەكتەر اۋقىمىن كەڭەيتىپ, تالداۋدىڭ دالدىگىن ارتتىرۋعا ىقپال ەتەدى. ۇلتتىق كاتالوگتەگى تاۋارلاردىڭ بىرەگەي تسيفرلىق كودى – NTIN يدەنتيفيكاتورىن قولدانۋ اقپاراتتى سايكەستەندىرۋ مەن سالىستىرۋدى جەڭىلدەتەدى. بيىلعى 1 قاڭتاردان باستاپ NTIN قولدانۋدىڭ مىندەتتەلۋى تاۋار اينالىمىن اشىق ءارى سالىستىرمالى تالداۋعا نەگىز قالادى.
مودۋل وڭىرلەر, ساۋدا نىساندارى مەن سالىق تولەۋشىلەر دەڭگەيىندە سالىستىرمالى تالداۋ جۇرگىزۋگە جول اشادى. سۇرانىس قۇرىلىمى مەن تاۋار اعىندارىنداعى وزگەرىستەردى جەدەل انىقتاۋعا مۇمكىندىك بەرەتىن جۇيە ەكونوميكالىق بەلسەندىلىكتىڭ ناقتى كورىنىسىن ۇسىنادى.
قارجى ۆيتسە-ءمينيسترى اسەت تۇرىسوۆتىڭ ايتۋىنشا, تسيفرلىق كارتا نەگىزىندەگى تاۋار اناليتيكاسى ەكونوميكالىق ۇدەرىستەردى تاۋار مەن اۋماق تۇرعىسىنان باعالاۋعا جاعداي جاسايدى. بۇل تۇتىنۋشىلىق قۇرىلىمدى تەرەڭىرەك تۇسىنۋگە ءارى وزگەرىستەرگە دەر كەزىندە دەن قويۋعا كومەكتەسەدى.
فورۋم بارىسىندا «كاسىپكەردىڭ بىرىڭعاي جەكە كابينەتى» جوباسى دا تانىستىرىلدى. ء«بىر تەرەزە» قاعيداتىنا نەگىزدەلگەن بۇل جۇيە بيزنەس وكىلدەرىنىڭ مينيسترلىك اقپاراتتىق جۇيەلەرىمەن ءوزارا ءىس-قيمىلىن جەڭىلدەتۋگە باعىتتالعان. پورتال مەملەكەتتىك قىزمەتتەر مەن دەرەكتەردى ءبىر كەڭىستىكتە بىرىكتىرىپ, كاسىپكەرلەردىڭ قاجەتتى سەرۆيستەرگە جەدەل قول جەتكىزۋىن قامتاماسىز ەتەدى.
كابينەت فۋنكتسيونالى بىرىڭعاي اۆتوريزاتسيالاۋ, رولدەردى باسقارۋ, قىزمەتكەرلەرگە وكىلەتتىك بەرۋ, ورتالىقتاندىرىلعان حابارلاندىرۋ جۇيەسى, كونتراگەنتتەرمەن ءوزارا بايلانىسقا ارنالعان ىشكى چات, اناليتيكالىق قۇرالدار مەن دەرەكتەردى ۆيزۋاليزاتسيالاۋ قىزمەتتەرىن قامتيدى. بۇدان بولەك, جاساندى ينتەللەكت نەگىزىندەگى بيزنەس-كومەكشى مەن سالىق سەرۆيستەرى ەنگىزىلگەن. جۇيە مەملەكەتتىك اقپاراتتىق پلاتفورمالارمەن ىقپالداسا وتىرىپ, بيزنەس ءۇشىن ءبىرتۇتاس تسيفرلىق ەكوجۇيە قالىپتاستىرۋعا باعىتتالعان.
قازىر جۇيەدە 15 مىڭنان استام پايدالانۋشى تىركەلگەن. بازالىق فۋنكتسيونال ىسكە قوسىلىپ, سەرۆيستەردى جەتىلدىرۋ جۇمىستارى جالعاسىپ جاتىر. جوبا بارىسىندا كاسىپكەرلەردىڭ ۇسىنىستارى دا ەسكەرىلگەن.
ءا.تۇرىسوۆتىڭ پىكىرىنشە, بۇل باستاما مەملەكەت پەن بيزنەس اراسىنداعى ءوزارا ىقپالداستىقتىڭ ءتيىمدى مودەلىن قالىپتاستىرۋعا مۇمكىندىك بەرەدى. بىرىڭعاي تسيفرلىق ورتا اكىمشىلىك جۇكتەمەنى ازايتىپ, ۇدەرىستەردىڭ اشىقتىعىن ارتتىرادى.
«Digital Qazaqstan» فورۋمىندا ۇسىنىلعان جاڭا شەشىمدەر مەملەكەتتىك قارجى جۇيەسىنىڭ تالدامالىق ينفراقۇرىلىمىن دامىتۋعا ءارى كاسىپكەرلەرگە ارنالعان زاماناۋي تسيفرلىق قىزمەتتەردى كەڭەيتۋگە باعىتتالعان كەشەندى جۇمىستىڭ جالعاسى سانالادى.