گۇل ءوسىرىپ تابىسىن ەسەلەگەن ستۋدەنت

ادال ەڭبەگىمەن ناپاقا تاپقىسى كەلگەن جاس جىگىت گۇل كوشەتتەرى كەل­گەن سوڭ بولمە گۇلدەرىن باپ­تاۋ­عا كىرىسەدى. ۋاقىتى جەتكەندە وسكەن گۇلدەردى رەت-رەتىمەن نارىق باعاسىنا ساي ساتى­لىمعا شىعارا باستاپتى. ستۋ­دەنتتىڭ قولعا العان كاسىبى اي وتكەن سايىن العا جىلجىپتى. اي­تۋىنشا, باستاپقىدا ايىنا 500 مىڭ تەڭگە شاماسىندا كىرىس كىرسە, قازىر 5 ميلليون تەڭگە كولە­مىندە تابىس تاۋىپ وتىر ەكەن. اري­نە, ءوز ءىسىن جەتىك مەڭگەرۋگە دەن قوي­عان ازاماتتىڭ العا قويعان اۋقىم­دى جوسپارى دا بار. بولاشاقتا كاسىبىنىڭ اياسىن كەڭەي­تۋگە تاۋەكەل ەتكەن.

ول توسىننان تىڭ جول تاۋىپ تۇرەن سالماسا دا, باستاپقىدا اناسى داعدىلانعان كاسىپتى تاڭداعان كورىنەدى. قايىربەك قازىر وڭىردەگى ەڭ جاس كاسىپكەرلەردىڭ ساناتىنا ەنىپ ۇلگەرگەن. ۋاقىت وتە كەلە, ول ءوزىنىڭ دوستارى مەن باۋىرلارىن دا وسىنداي كاسىپ باستاۋعا ۇگىتتەپتى. بۇگىندە 10 ازاماتتى جۇمىسپەن قامتىپ, اي سايىن 200 مىڭ تەڭگە شاماسىندا جالاقى بەرىپ وتىر.

«حالىقارالىق ارۋلار مەرە­كە­سى قارساڭىندا 15-20 ملن تەڭگە شاماسىندا شىعىندالعان ەدىك. بۇگىنگە دەيىن شىققان شىعىننىڭ جارتىسىن قايتارىپ ۇلگەرگەنىمىزدى ايتا كەتكەن ءجون. كەز كەلگەن كاسىپ سەكىلدى تۇسىنە بىلگەن ادامعا بۇل دا وڭاي شارۋا ەمەس. ءار نارسەنىڭ مەحناتىنا توزۋگە تۋرا كەلەدى. گۇلدى ءوزىمىز مۇقيات باپتاپ, ءوسىرىپ جۇرگەن جايىمىز بار. ۋاقتىلى سۋارىپ تۇرامىز. ەرىنبەي ەڭبەكتەنسەڭ, گۇل دە جايقالىپ وسەدى, وعان دەگەن سۇرانىس تا ارتادى.

ءدال قازىر تەز ارادا گۇلدەمەيتىن گۇلدەردى ءوسىرۋدىڭ ماڭىزى زور دەپ ەسەپتەيمىن. ماسەلەن, ماكلا ماكفيكۋس, فيكۋس بەنجەمين, شەفلەرا جانە فيكۋستىڭ وزگە دە سۇرىپتى گۇلدەرى ەشقانداي گۇل اشپايتىنىن ەسكەرگەن ءلازىم. ءبىز دە وسى ماسەلەگە ايرىقشا نازار اۋدارىپ ءجۇرمىز. مۇنىڭ ءبارى ۋاقىتپەن, تاجىريبەمەن كەلەتىنىن ءبىر كىسىدەي تۇسىندىك», دەيدى جاس كاسىپكەر.

قايىربەك بۇل كاسىپكە توسىننان كەلمەگەن ەكەن. گۇل ءوسىرۋ ءىسى 12 جىل بۇرىن وتباسىلىق باستامادان باستاۋ العان كورىنەدى. اناسى ءۇي جاع­دايىندا جارتى مىڭعا جۋىق گۇل­دى باپتاپ, كىشىگىرىم ساۋ­دامەن اينالىسۋعا بەت بۇرىپتى. سودان بەرى بۇل وتباسى وسى كاسىپتى تابىس كوزىنە اينالدىرا باستاپتى. ال قايىربەكتىڭ بويىنداعى قىزىعۋ­شىلىق 9-سىنىپتا ويانعان ەكەن. ۇلىنىڭ بويىنداعى قۇلشى­نىستى بايقاعان اتا-اناسى قول­داۋ كورسەتىپ, جىگەرلەندىرگەن. وسى­لايشا, ول ىزدەنىس ىزىنە ءتۇسىپ, كاسىپتى ارمەن قاراي دامىتۋ جولىن قاراستىرعان.

قازىر گۇل ساۋدالاپ تولايىم تابىس­قا كەنەلىپ وتىرعان جاس كاسىپكەر اۋەلگى تابىسىن 8-سىنىپتا تاۋىپ ۇلگەرىپتى. ول كەزدە قايىربەك ەلىمىزدەگى كارانتيندى پايدالانىپ, مەديتسينالىق بەتپەردە ساتۋعا دەن قويعان. سول ۋاقىتتا كاسىپ اشۋعا, ونى دامىتۋعا دەگەن قۇلشىنىسى ايتارلىقتاي ارتقان كورىنەدى.

قايىربەكتىڭ قالاۋىمەن سا­لىن­­عان جىلىجاي ءدال قازىر قۇل­پى­رىپ-اق تۇر. مۇنداعى سان ءتۇرلى بوياۋ­ كوزدىڭ جاۋىن الاتىنى اقيقات. جىلى­جايدا قازىرگى كەزدە گۇلدىڭ 50 ءتۇرىنىڭ 6 مىڭ داناسى جايقا­لىپ ءوسىپ تۇر. ايتۋىنشا, گاردە­نيا جانە تسيكلومەن سەكىلدى گۇلدەر مينۋس 10 گرادۋسقا ءتوزىمدى كورىنەدى.

قاراپايىم وتباسىندا وسكەن ازامات قازىر شەرحان مۇرتازا اتىن­داعى تاراز ۋنيۆەرسيتەتىنىڭ زاڭ فا­كۋلتەتىنىڭ 1-كۋرس ستۋدەن­تى. ۇدايى ىزدەنىس ىزىندە جۇرگەن جاس كاسىپكەر قانداي دا ءبىر كاسىپتى باستار الدىندا ونى تولىق­قان­دى زەردەلەۋدىڭ ماڭىزى زور دەپ ەسەپتەيدى. ونىڭ ايتۋىنشا, تىنىمسىز ىزدەنىس قانا تۇراقتى تابىسقا باستايدى. ءوز ءىسىن جان-جاقتى زەرتتەگەن ادام عانا تاۋەكەلگە بەل بۋا الادى. گۇل ءوسى­رىپ ناپاقا ايىرىپ, ادامداردى جۇمىسپەن قامتىپ وتىرعان ازا­ماتقا تابىسىڭ ورتايماسىن دەگەننەن باسقا ايتارىمىز جوق.

جامبىل وبلىسى