ەلوردالىق وقۋشى باتىرحان مۇحتارحان ەكونوميكا جانە قارجى بويىنشا رەسپۋبليكالىق وليمپيادادا ءابسوليۋتتى جەڭىمپاز اتاندى. استانا حالىقارالىق قارجى ورتالىعىندا وتكەن ءبىلىم دوداسىنىڭ فينالدىق كەزەڭىنە ەلىمىزدىڭ بارلىق وڭىرىنەن ىرىكتەلگەن 115 وقۋشى قاتىسىپ, 50 جۇلدە ساراپقا سالىنعان ەدى. سول ۇزدىكتەردىڭ قاتارىنان سۋىرىلىپ شىققان باتىرحان بۇل جولى دا ءوزىنىڭ العىرلىعىن تاعى ءبىر مارتە دالەلدەدى.
باتىرحان – نازارباەۆ زياتكەرلىك مەكتەبىنىڭ 11-سىنىپ وقۋشىسى. ول بۇعان دەيىن دە حالىقارالىق دەڭگەيدە ەل نامىسىن ابىرويمەن قورعاپ جۇرگەن دارىندى وقۋشىلاردىڭ ءبىرى. اتاپ ايتقاندا, 2024 جىلى گونكونگتە وتكەن ەكونوميكادان حالىقارالىق وليمپيادادا قولا مەدال يەلەنسە, 2025 جىلى ازەربايجانداعى سايىستا التىن مەدال جەڭىپ الدى. سونىمەن قاتار گرەكيادا وتكەن EO-2025 حالىقارالىق وليمپياداسىندا ءابسوليۋتتى جەڭىمپاز اتانىپ, الەمدىك دەڭگەيدە مىقتىلىعىن كورسەتتى.
جاس دارىننىڭ ايتۋىنشا, تابىسقا جەتۋدىڭ كىلتى – جۇيەلى دايىندىق. ول ارنايى وقۋلىقتاردى كونسپەكتىلەۋ, حالىقارالىق قارجى ماماندارى كەڭ قولداناتىن CFA جۇيەسىنە سۇيەنۋ كوپ كومەكتەسكەنىن ايتادى. وسىنداي ءتاسىل كۇردەلى تاقىرىپتاردى تەرەڭىرەك تۇسىنۋگە جول اشقان.
ەكونوميكا مەن قارجىعا قىزىعۋشىلىعى بىردەن قالىپتاسا قويماعان. باتىرحان ءتۇرلى جارىس كەزەڭىنەن ءوتىپ, ارنايى دايىندىق ورتالىقتارىندا وقي ءجۇرىپ, بۇل عىلىمنىڭ الەمدىك ماڭىزدى ماسەلەلەرگە جاۋاپ بەرە الاتىن اۋقىمدى سالا ەكەنىن تۇسىنگەن. سول ساتتەن باستاپ وسى باعىتقا شىنداپ دەن قويعان.
ول ءوز قاتارلاستارىنا اعىلشىن ءتىلىن جەتىك مەڭگەرۋدى, ۋاقىتتى بوسقا شىعىندايتىن دۇنيەلەردى شەكتەۋدى, ءبىلىمدى جۇيەلەپ وقۋدى ۇسىنادى.
ءابسوليۋتتى جەڭىمپاز اتانۋ – ەكىنىڭ بىرىنە بۇيىرا بەرمەيتىن جەتىستىك. مۇنداي ناتيجە تەرەڭ بىلىممەن قاتار, تاباندىلىقتى, ۇدايى ىزدەنىستى جانە باسەكەلى ورتادا شىڭدالۋدى تالاپ ەتەدى. باتىرحان سەكىلدى تالاپتى جاستاردىڭ جەتىستىگى ءوز قاتارلاستارىنا دا ۇلگى. ويتكەنى ءبىلىم مەن ءتارتىپتى سەرىك ەتكەن جاس ورەندەر ەرتەڭ ەل ەكونوميكاسىن جاڭا دەڭگەيگە كوتەرەتىن بۋىنعا اينالماق.