الماتى قالاسىنداعى ۇلتتىق ۇلان 5571 اسكەري ءبولىمىنىڭ مەرزىمدى اسكەري قىزمەتشىسى ءازيز تەمىربەك جاۋىنگەرلىك مىندەتىن ابىرويمەن ورىنداۋمەن قاتار, اسكەريلەر اراسىندا ۇلتتىق ونەردى ناسيحاتتاپ ءجۇر.
قىزىلوردا وبلىسىنىڭ سىرداريا اۋدانىندا دۇنيەگە كەلگەن ءازيز دومبىراعا بالا كۇنىنەن اۋەس بولىپ وسكەن. مەكتەپتە العاشقى ۇستازى گۇلناز سەراليەۆادان كۇي ونەرىنىڭ الىپپەسىن ۇيرەنىپ, كەيىن قىزىلوردا قالاسىنداعى قازانعاپ اتىنداعى مۋزىكالىق جوعارى كوللەدجدە ءبىلىم الىپ, ۇستازى جانسۇلتان جۇمابەكتەن كۇيشىلىك شەبەرلىگىن شىڭداعان. وسى جىلداردا ول جۇزگە جۋىق كۇي ۇيرەنىپ, «سارىارقا», «سەرپەر», «اقساق كيىك», «تورەمۇرات», «بايجۇما» سياقتى ايگىلى كۇيلەردىڭ باسىم بولىگىن نوتا ارقىلى مەڭگەرگەن.
ءازيز اسكەري ءبولىمنىڭ قۇرامىندا الماتى قالاسىنىڭ قاۋىپسىزدىگىن كۇزەتىپ, بوس ۋاقىتىندا قارۋلاستارىنىڭ وتىنىشىمەن كۇي تارتادى.
– دومبىرادا كۇي ورىنداۋ ماعان حالقىمىزدىڭ مادەنيەتىن, سالت-ءداستۇرىن ناسيحاتتاۋ جاۋاپكەرشىلىگىن جۇكتەيدى. سىر كۇي مەكتەبى وكىلدەرىنىڭ ءىزىن جالعاپ جۇرگەندىگىمدى ماقتان ەتەمىن, – دەيدى ءازيز.
ول دومبىرانىڭ قوڭىر ۇنىمەن قاسيەتتى ونەردى دارىپتەپ, عاسىرلاردان جەتكەن كۇي ءداستۇرىن جاڭا بۋىنعا جەتكىزىپ كەلەدى. ونىڭ ورىنداۋىنداعى اسەرلى كۇيلەر ساربازداردىڭ كوڭىل كۇيىن كوتەرىپ, جاۋىنگەرلىك رۋحىن ارتتىرا تۇسەدى.
الماتى