اقش-تىڭ فلوريدا شتاتى جاعالاۋىندا سۋ استىندا جۇرگىزىلگەن ىزدەۋ جۇمىستارى ناتيجەسىندە قۇنى شامامەن 1 ملن دوللار بولاتىن يسپان قازىناسى تابىلدى. قۇتقارۋ جۇمىستارىمەن اينالىساتىن كومپانيا سۇڭگۋىرلەرى 1 000-نان استام التىن جانە كۇمىس تەڭگەنى تەڭىز تۇبىنەن الىپ شىققان, دەپ جازادى Egemen.kz.
مامانداردىڭ مالىمەتىنشە, تابىلعان تەڭگەلەردىڭ باسىم بولىگى بوليۆيا, مەكسيكا جانە پەرۋ اۋماعىنداعى يسپان وتارلارىندا سوعىلعان. قازىنا بيىل جازدا اتلانت مۇحيتىنىڭ فلوريداعا قاراستى بولىگىنەن تابىلعان. بۇل اۋماق بۇرىننان تاريحي ولجالارىمەن بەلگىلى.
تاريحي دەرەكتەرگە سۇيەنسەك, 1715 جىلعى 31 شىلدەدە يسپانياعا قايتىپ بارا جاتقان التىن, كۇمىس جانە اسىل تاستارعا تولى كەمەلەر كۇشتى داۋىلعا تاپ بولىپ, اپاتقا ۇشىراعان. سالدارىنان قازىنانىڭ باسىم بولىگى تەڭىز تۇبىنە كەتكەن. كەيىن بۇل ايماق «1715 جىلعى فلوت قازىناسى» رەتىندە تاريحتا قالدى.
سودان بەرى مەلبۋرننان فورت-پيرسكە دەيىنگى جاعالاۋ بويىنان قازىنا ىزدەۋشىلەر بىرنەشە رەت باعالى بۇيىمدار تاپقان. جاڭا ولجانىڭ ەرەكشەلىگى – كەيبىر تەڭگەلەردە سوعىلعان ۋاقىتى مەن تاڭبالارى انىق ساقتالعان, بۇل تاريحشىلار مەن كوللەكتسيونەرلەر ءۇشىن اسا قۇندى دەرەك كوزى سانالادى.
كومپانيا وكىلى سەل گۋتتۋزونىڭ ايتۋىنشا, بۇل ولجا تەك قازىنانىڭ ءوزى عانا ەمەس, ونىڭ ارتىندا جاتقان تاريحىمەن ماڭىزدى. ءاربىر تەڭگە – يسپانيا يمپەرياسىنىڭ گۇلدەنگەن داۋىرىندە ءومىر سۇرگەن ادامداردىڭ ناقتى ءىزى. ءبىر جولعى ىزدەۋ بارىسىندا 1 000 تەڭگەنىڭ تابىلۋى – سيرەك ءارى ەرەكشە جاعداي.
قازىنا ىزدەۋ جۇمىستارى ارنايى تەحنيكا كومەگىمەن جۇرگىزىلەدى. سۇڭگۋىرلەر مەتالل انىقتايتىن قۇرىلعىلاردى پايدالانىپ, تەڭىز تۇبىندەگى قۇمدى قولمەن نەمەسە ارنايى قۇرالدارمەن ارشىپ شىعادى.
قۇنى الپىس جىلقى ساۋكەلە
ايتا كەتۋ كەرەك, فلوريدا زاڭناماسىنا سايكەس, شتات اۋماعىنداعى نەمەسە سۋلارىنداعى تاريحي جادىگەرلەر مەملەكەت مەنشىگى سانالادى. دەگەنمەن ارنايى رۇقسات العان كومپانيالار ولاردى ىزدەپ تابۋ جۇمىستارىن جۇرگىزە الادى. زاڭ بويىنشا, تابىلعان ولجانىڭ شامامەن 20%-ى مەملەكەتكە تيەسىلى بولىپ, مۋزەيلەر مەن عىلىمي زەرتتەۋلەرگە بەرىلەدى. قالعان بولىگى قازىنا ىزدەۋشىلەر اراسىندا بولىنەدى.
سەل گۋتتۋزو اتاپ وتكەندەي, بارلىق زاتتىڭ تولىق ءتىزىمى جاسالىپ, مەملەكەتكە ۇسىنىلادى. قازىنانىڭ ءبىر بولىگى حالىق يگىلىگىنە اينالىپ, مۋزەيلەرگە قويىلادى. باستىسى ءبارىن زاڭ اياسىندا, دۇرىس جاساۋ كەرەك.
مۇنداي ولجالار تاريحي مۇرا عانا ەمەس, سونىمەن قاتار, تۋريزم مەن عىلىمي زەرتتەۋلەردىڭ دامۋىنا سەرپىن بەرەتىن ماڭىزدى رەسۋرس سانالادى.
الەمگە تانىمال اكتەر چاك نورريس ومىردەن ءوتتى