بيىلعى ناۋرىز مەيرامىندا الماتى تەاترلارى «قارا جورعا» ءبيىنىڭ ىرعاعىمەن توعىستى. الماتىنىڭ بەتكەۇستار تەاترلارى كوكتەمنىڭ كەلگەنىن ايگىلەيتىن مەرەكە قارساڭىندا ءبىر ءۇيدىڭ بالاسىنداي «قارا جورعا» بيلەدى.
وسىناۋ اۋقىمدى پەرفورمانسقا الماتىداعى ناتاليا ساتس اتىنداعى تەاتر مۇرىندىق بولدى. وعان مادەنيەت جانە اقپارات مينيسترلىگى مەن الماتى قالاسى اكىمدىگى قولداۋ كورسەتتى.
عالامات بي شەرۋىنە ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى, م.لەرمونتوۆ اتىنداعى مەملەكەتتىك اكادەميالىق ورىس دراما تەاترى, ق.قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى, رەسپۋبليكالىق اكادەميالىق نەمىس دراما تەاترى دا قوسىلدى.
جوعارىداعى تەاترلاردىڭ باعىتى مەن جانرى, شىعارماشىلىق مەكتەپتەرى باسقا بولسا دا, «قارا جورعا» ءبيىنىڭ ىرعاعى ولاردى ءبىرتۇتاس مەرەكەلىك ساحناعا اينالدىردى. بۇل ءارى تاريحتان تامىر العان ىنتىماقتىڭ جارقىن نىشانى ىسپەتتى ادەمى اسەر قالدىردى.
ءوز كەزەگىندە «سالتانات» مەملەكەتتىك بي ءانسامبلى بىرەگەي حورەوگرافيا ازىرلەپ, فلەشموبتىڭ كاسىبي دەڭگەيدە وتۋىنە ۇلەس قوستى. جوبانىڭ جۇزەگە اسۋىنا Almaty TV تەلەراديوكومپانياسى دا ەرەكشە ىقپال ەتكەنىن اتاپ وتكەن ءجون. ارنا حابار تاراتۋشى عانا ەمەس, نەگىزگى اقپاراتتىق سەرىكتەس ءارى يدەيالىق قولداۋشى رەتىندە ءتۇسىرىلىم جۇمىسىن ۇيىمداستىرىپ, مەديالىق قولداۋ كورسەتتى. سونىڭ ارقاسىندا مەرەكەلىك كوڭىل كۇيدى ميلليونداعان كورەرمەن ەكران ارقىلى سەزىنە الدى.
ەرەكشە توقتالا كەتەتىن تاعى ءبىر جايت, فلەشموبقا قاتىسقان دراما اكتەرلەرى كاسىبي بيشىلەرمەن بىرگە, نەبارى ءبىر اپتانىڭ ىشىندە دالا ءبيىن شەبەر مەڭگەرىپ, مادەني مۇراعا دەگەن سۇيىسپەنشىلىگىن سىيعىزا ءبىلدى.
الماتى